Amube “Amoyo Mutete Walubomba”
1. Ino bantu bayandika nzi mazuba aano?
1 Mazuba aano bantu bayandika kugwasyigwa calubomba kwiinda kaindi. Kucinca kwabukkale bwamunyika kwapa kuti bantu banji babule bulangizi, batyompwe, alimwi akutakkomana. Mamiliyoni aabantu bayandika lugwasyo, alimwi swebo Tobanakristo ndendiswe tukonzya kubapa lugwasyo lwini-lwini basimukoboma. (Mt. 22:39; Gal. 6:10) Ino inga twabagwasya munzila nzi?
2. Muunzila nzi mbotu motukonzya kutondezya lubomba?
2 Mulimo Uutondezya Moyo Walubomba: Luumbulizyo lwini-lwini alimwi lutamani lujanwa buyo kuli Leza. (2 Ko. 1:3, 4) Jehova utukulwaizya kumwiiya kwiinda mukuba “amoyo mutete” alimwi watupa mulimo wakuswaya basimukoboma akubaambila makani mabotu aa Bwami. (1 Pe. 3:8) Kuba bantu basungu mumulimo ooyu njenzila mbotu yakuumbulizya “batyokede mumyoyo,” akaambo kakuti Bwami bwa Leza njenzila ilikke iiyoomana mapenzi aabantu. (Is. 61:1) Akaambo kalubomba kubantu bakwe, lino-lino Jehova uyoogusya bubi boonse akuleta nyika mpya yabululami.—2 Pe. 3:13.
3. Mbuti mbotukonzya kubabona bantu mbuli Jesu mbwaakali kubabona?
3 Amubabone Bantu Mbuli Mbwaakali Kubabona Jesu: Nokuba ciindi naakali kukambaukila makamu aabantu, Jesu tanaakali kubabona buyo kuba nkamu yabantu. Pele wakali kubabona kweelana umwi aumwi mbwaakali kuyandika kugwasyigwa kutegwa abe acilongwe a Leza. Bakali mbuli mbelele zitajisi mweembezi uuzisololela. Jesu wakeetezyegwa anzyaakabona, alimwi eeci cakapa kuti abayiisye cakukkazyika moyo. (Mk. 6:34) Ikuti naa bantu twababona mbuli mbwaakali kubabona Jesu, ciyootukulwaizya kutondezya lweetelelo lwini-lwini kuli umwi aumwi wambabo. Eeci ciyoolibonya muŋambawido yesu alimwi ambotulibonya abusyu. Kukambauka tuyookubikkila maano, alimwi akucincauzya ŋambawido yesu kutegwa tutondezye mbotumubikkila maano muntu umwi aumwi.—1 Ko. 9:19-23.
4. Nkaambo nzi ncotweelede kulisamika moyo walubomba?
4 Nkamu mpati yabantu bazwa mumisyobo yoonse balautambula mulumbe wa Bwami alimwi balakkomana akaambo kakubikkilwa maano. Mbotuyaabuzumanana kulisamika moyo walubomba, tutondezya kuti tulamulemeka Jehova Leza silubomba alimwi tunoomukkomanisya.—Kol. 3:12.