‘Alisalazyigwe Izyina lya Leza’
1. Ino ujisi mutwe nzi muswaangano wabbazu wamwaka wamulimo wa 2012, alimwi uyeeme aali?
1 Eelo kaka tuli acoolwe cakwiitwa azyina lya Jehova, Mwami Wakoonse-koonse! Ngu Leza ilwakwe mwini wakatupa zyina eeli, alimwi kapati kuzwa mumwaka wa 1931, tulizyibidwe azyina lya Jehova lilibedelede, lyakuti Bakamboni ba Jehova. (Is. 43:10) Mwana wa Leza simuzyalwaalikke, Jesu, wakalisumpula kapati zyina lya Leza, wakalibikka mubusena bwakusaanguna mumupailo wakwe wacikozyanyo. (Mt. 6:9) Mutwe wamuswaangano wesu wabbazu wamwaka wamulimo wa 2012 uuyeeme amajwi aa Jesu. Ngwakuti “Alisalazyigwe Izyina lya Leza.”
2. Ino makani nzi ngotulangila kuyooswiilila?
2 Nzyotuyoomvwa: Mubuzuba bwakusaanguna, makani aajisi mutwe wakuti “Amuzyibye Zyina lya Leza Kwiinda Mukuba Babelesi Baciindi Coonse” ayoobandika mulimo waciindi coonse ncoupa kukkutila mubuumi. Alimwi tuyooswiilila makani aakusiilana aakuti “Amucenjele Kutegwa Mutaleti Masampu Kuzyina lya Jehova” ayootugwasya mbotukonzya kweeleba tukole tone tukonzya kutucega. Mubuzyo wakuti, Ncinzi ciyootugwasya kukambauka cabusungu ciindi bantu nobatatondezyi luyandisisyo? awakuti, Ncinzi ciyootugwasya kuzwidilila mumulimo wesu wakukambauka? iyooyingulwa mumakani aakuti “Ikaambo Zyina lya Leza Ncolyeelede Kusalazyigwa.” Mubuzuba bwabili, tuyookkomana kuswiilila makani aakusiilana aajisi zibeela zyone ayootondezya mbotukonzya kusalazya zyina lya Leza kwiinda muzyintu nzyotuyeeya, muŋambawido yesu, muzyintu nzyotusala, alimwi amukulilemeka kwesu. Ibapya bayookkomana kapati kuswiilila makani aabuleya aakuti, “Jehova Uyoolisalazya Zyina Lyakwe Lilemu Ciindi ca Amagedoni.”
3. Ino tujisi coolwe nzi, alimwi muswaangano ooyu uyootugwasya buti?
3 Lino-lino Jehova ulabweza ntaamu kutegwa asalazye zyina lyakwe. (Ezk. 36:23) Ecino ciindi, tujisi coolwe cipati cakusumpula ncoliiminina zyina lya Jehova lisalala. Tujisi lusyomo lwakuti muswaangano ooyu wabbazu uyoogwasya umwi aumwi wesu kuzuzikizya mukuli mupati ngotujisi wakwiitwa azyina lya Leza.