Bakamboni ba Jehova—Kubeleka kwa Lusyomo Lwabo, Cibeela 1: Kuzwa Mumudima
Mu Bbaibbele, mumuni ukozyanisyigwa aakasimpe, pele mudima ukozyanisyigwa aakubeja. (Int. 43:3; Is. 5:20) Saatani wakautalisya mudima munyika naakeena Eva, alimwi mukuyakwaciindi wakapa kuti kube mudima uusiya mbi nyika yoonse. (Ciy. 12:9) Vidiyo yamu Cingisi yakuti Jehovah’s Witnesses—Faith in Action, Part 1: Out of Darkness ilatondezya munzila iitobeleka mumuni wakumuuya mbowakatalika kuuzunda mudima. (Is. 60:1, 2) Mwamana kweebelela vidiyo, sena inga mwaingula mibuzyo eeyi?
(1) Ino mudima uusiya mbi wakatalika buti baapostolo nibakafwa? (2) Kutalikila muma 1100, ncinzi cakabagwasya bantu kuzyiba kuti zikombelo tiizyakali kuyiisya kasimpe? (3) Ino Henry Grew alimwi a George Storrs bakali bani? (4) Ncinzi cakacitika mubuumi bwa Charles Russell cakamupa kuti acince? (5) Mbuti Mukwesu Russell, bausyi, alimwi abeenzinyina basyoonto mbobakali kweendelezya ziiyo zyabo zya Bbaibbele, alimwi kumamanino bakaabona buti Magwalo? (6) Nkaambo nzi kabunga aaka kabasikwiiya Bbaibbele ncokakanjilana akabunga ka Nelson Barbour, pele ncinzi cakapa kuti Mukwesu Russell azwe mukabunga aaka? (7) Ncinzi cakacitika mu July 1879 cakapa kuti mumuni wakumuuya umunike alimwi? (8) Kumane, ncinzi ncobakacita Basikwiiya Bbaibbele kuti bamwaye makani mabotu? (9) Myaka minji kautanasika mwaka wa 1914, ncinzi ncobakali kulangila kuti cilacitika Basikwiiya Bbaibbele? (10) Ino mbuyumuyumu nzi mbobakajana Basikwiiya Bbaibbele naakafwa Mukwesu Russell? (11) Ncinzi ncobakacita Basikwiiya Bbaibbele Mukwesu Rutherfold alimwi abeenzinyina nibakazwa muntolongo? (12) Ino kweebelela vidiyo eeyi kwamugwasya buti kuyungizya luzyibo lwanu akulumba kujatikizya mbunga ya Jehova? (13) Ino vidiyo eeyi yamuyumya buti kutegwa muzumanane kukambauka cabusungu nokuba kuti kuli mapenzi? (14) Mbuti mbotukonzya kwiibelesya vidiyo eeyi kugwasya basazima, bantu mbotuyiisya Bbaibbele, alimwi abamwi buyo?
Eelo kaka Basikwiiya Bbaibbele bakusaanguna bakatusiila cikono citaliboteli cakumuuya! Munyika iili mumudima kumuuya, bakali basicamba alimwi basungu mukunyamuna mumuni. Atutobele cikozyanyo cabo ‘akuzumanana kweenda katuli bana bamumuni.’—Ef. 5:8.