Mutalimvwi Kuti Tamukonzyi—Mbomukonzya Kucita Kuti Kamujisi Bubi
1. Nkaambo nzi bamwi ncobawayawaya kutalisya ciiyo ca Bbaibbele?
1 Bamwi balawayawaya kutalisya ciiyo ca Bbaibbele akaambo kakuti bajisi zinji zyakucita. Kulanganya muntu ngomuyiisya Bbaibbele kuyandika ciindi. Ciindi cilayandika kutegwa mulibambile ciiyo, musololele, alimwi akugwasya sikwiiya kuzunda buyumuyumu mbwajisi. Mwaapostolo Paulo wakaamba kuti wakaaba buumi bwakwe kugwasya bantu baku Tesalonika kuzyiba Jehova. (1 Te. 2:7, 8) Mbuti mbotukonzya kusololela ciiyo ca Bbaibbele nokuba kuti tujisi bubi?
2. Ino luyando ndotujisi kuli Jehova lutujatikizya buti mbotucibelesya ciindi?
2 Kubelekela Jehova Kuyandika Ciindi: Kaambo kamasimpe nkakuti kukomba kuyanda ciindi. Mucikozyanyo, lyoonse tulajana ciindi cakujanika kumiswaangano, kutola lubazu mumulimo wakukambauka, kubala Bbaibbele, alimwi akupaila. Muntu uukwete naa uukwetwe pele uujisi bubi, calukkomano uyoojana ciindi cakuba antoomwe angobakwetene limwi. Kuti kacili boobo kubantu, nkokuti cilayandika kapati kuti calukkomano ‘katucibelesya kabotu ciindi’ kutegwa tumukombe Jehova nkaambo tulamuyanda. (Ef. 5:15-17; 1 Jo. 5:3) Kweelana ambwaakaamba Jesu, kugwasya bantu kuba basikwiiya ncibeela ciyandika kapati cabukombi bwesu. (Mt. 28:19, 20) Kuyeeya boobu kuyootugwasya kuti tutanoowayiwayi kuzumina mukuli wakusololela ciiyo ca Bbaibbele.
3. Ino inga twamulanganya buti muntu ngotuyiisya Bbaibbele nokuba kuti bukkale bwanyonganya bubambe bwesu bwamulimo wamumuunda?
3 Ino mbuti kuti mulongo wesu wanyonganizyigwa amulimo wakumubili, penzi lyakuciswa bulwazi butaponi, naa kubeleka milimo yakumuuya? Basikumwaya bamwi ibavwula kweendeenda balasololela ciiyo ca Bbaibbele kwiinda mukubelesya fooni naa kkompyuta. Aabo banyonganizyigwa akaambo kakuciswa bulwazi butaponi balapanga bubambe bwakuti sikwiiya kaunka kuŋanda yabo kutegwa kabaiya. Bamwi bapanga bubambe bwakuti sikumwaya uusyomeka kasololela ziiyo zyabo ciindi nobatako.
4. Ino nzilongezyo nzi ziboola akaambo kakutola lubazu mumulimo wakusololela ziiyo zya Bbaibbele?
4 Paulo wakajana lukkomano lunji kwiinda mukwaaba ciindi cakwe alimwi anguzu kutegwa agwasye bamwi kwiiya kasimpe. (Mil. 20:35) Ciindi naakayeeya bantu mbaakagwasya ku Tesalonika, wakakulwaizyigwa kulumba Jehova. (1 Te. 1:2) Lukkomano lwesu alimwi akukkutila mumulimo wakukambauka inga kwayungizyigwa kuti naa tatulekeli kujata bubi kutulesya kutola lubazu mumulimo wakusololela ziiyo zya Bbaibbele.