Cikonzya Kumugwasya Kutegwa Kamucita Ciiyo Canu Nsondo Ansondo
SENA cilamuyumina kwiiya Bbaibbele nsondo ansondo? Sena kuli nomulimvwa kuti kwiiya Bbaibbele takunoneezyi? Toonse tulaakulimvwa oobo zimwi ziindi. Pele amuyeeye zintu zimwi nzyotulaakucita lyoonse mbuli kusamba. Masimpe kuti kuyanda ciindi alimwi akubeleka canguzu, nokuba boobo twamana kusamba, inga tulakatalukwa. Kwiiya Bbaibbele akwalo kulakonzya kukozyanisyigwa ‘kukusanzyigwa amaanzi aajwi lya Leza’ aakatalusya. (Ef. 5:26) Amubone nzila zimwi zikonzya kugwasya:
Amubambe mulongo. Kucita ciiyo cesu ca Bbaibbele kuli akati “zintu ziyandika kapati” Munakristo nzyayelede kucita. (Flp. 1:10) Kutegwa mutalubi ciindi cakucita ciiyo canu ncomwakalibikkila, amulembe buzuba alimwi aciindi aakapepa, akukabikka aawo mpomukonzya kukabona. Kunze lyaboobo, mulakonzya kubikka alamu afooni yanu kutegwa kaimuyeezya.
Amucince kweelana anzyomuyandika. Ino muyanda kunakwiiya buti? Mucikozyanyo, sena cilamuubila kubikkila maano ikuti mwaiya kwawoola lyomwe? Naa sena mukkomanina kwiiya kwaciindi cisyoonto pele ziindi zinji? Ndinywe mucizyi kabotu icikonzya kumubelekela. Aboobo amusale ciindi cakwiiya kamutuyeeyede twaambo ootu. Ikuti kamulimvwa kuti tamukonzyi kwiiya aciindi ncomwakasala, amusole kwiiya kwamaminiti buyo aali 10. Nkaambo kwiiya kwamaminiti aali 10 nkubotu kwiinda kutayiila limwi. Alimwi ikuti naa mwatalika, muyookulwaizyigwa kuzumanana kwiiya.—Flp. 2:13.
Amusalile limwi ncomuyanda kwiiya. Ikuti kamuyeeya kujatikizya ncomuyanda kwiiya nocasika ciindi cakuti mwiiye, inga tiikwaba ‘kucibelesya kabotu ciindi coonse ncomujisi.’ (Ef. 5:16) Amusole kulemba twaambo ntomukonzya kuyanda kwiiya. Mucikozyanyo, ikuti kamujisi mubuzyo kujatikizya cintu cimwi ncomutamvwisyi, amuulembe. Lyoonse mwamana kwiiya, mulakonzya kulemba twaambo tupya ntomunga mwayanda kwiiya.
Amucince ikuti kwayandika. Amusole kucinca mulongo wanu ikuti kwayandika, mbuli kulampa kwaciindi ncomuyanda kunakwiiya naa makani ngomusala kwiiya. Ciyandika kapati tacili ciindi naa buzuba mbomwiiya, bulamfwu bwaciindi ncomwiiya naa makani ngomwiiya, pele nkwiiya lyoonse.
Ikuti katucita ciiyo cesu nsondo ansondo, tuyoogwasyigwa kapati. Mucikozyanyo, cilongwe cesu a Jehova ciyooyuma kapati, tuyakwiiya kusala kabotu mubuumi alimwi tuyookatalusyigwa.—Jos. 1:8.