Zyoolwe Zinji Zyakutembaula Jehova
1. Ino mbubambe nzi bupya ibuyootugwasya ‘kumutembaula kapati Jehova’?
1 Mumwezi wa March mwaka uno, ibubambe bupya bwakatalika, ibupa coolwe kuli basikumwaya cakucita bupainiya bwakugwasyilizya bwamawoola aali 30 mumwezi wa March a April mwaka amwaka alimwi amumwezi naswaya mulangizi wabbazu. Kuti kuswaya kwamulangizi wabbazu kakujatikizya myezi yobilo, sikumwaya iwalembela kucita bupainiya bwakugwasyilizya bwamawoola aali 30 inga wasala mwezi omwe akati kamyezi yobilo. Bapainiya bakugwasyilizya boonse inga bajanika amuswaangano mulangizi wabbazu ngwacita abapainiya baciindi coonse alimwi abaalubazu kusikila kumamanino. Eeci caamba kuti, ikuti katutacikonzyi kusisya mawoola aali 50, tulakonzya ‘kumutembaula kapati Jehova’ kwiinda mukucita bupainiya bakugwasyilizya bwamawoola aali 30 ziindi zyone mumwaka!—Int. 109:30; 119:171.
2. Ino ncinzi ciyoobakkomanisya aabo banoocita bupainiya bwakugwasyilizya ciindi mulangizi wabbazu naswaya?
2 Ciindi Mulangizi Wabbazu Naswaya: Lino banji banoocikonzya kucita bupainiya bwakugwasyilizya ciindi mulangizi wabbazu naswaya mbungano alimwi banookkomana kuyumizyanya kwiinda mukubeleka anguwe mumulimo wakukambauka. (Lom. 1:11, 12) Bapainiya bakugwasyilizya banji cakutadooneka bayoopanga bubambe bwakulyookezya kumulimo wakumubili buzuba bomwe mukati kansondo kutegwa bakabeleke antoomwe amulangizi wabbazu. Aabo ibabeleka milimo yakumubili mukati kansondo balakonzya kulomba mulangizi wabbazu kuti akabeleke ambabo mu Mujibelo naa mu Nsondo. Kuyungizya waawo, cinookulwaizya kaka kubapainiya bakugwasyilizya kunoojanika kumuswaangano wabapainiya antoomwe abapainiya baciindi coonse alimwi abaalubazu!
3. Nkaambo nzi ciindi ca Ciibalusyo ncocili ciindi cibotu cakucita bupainiya bwakugwasilizya?
3 Mumwezi wa March Alimwi a April: Aabo bakatola lubazu mukucita bupainiya bwakugwasyilizya bwamwezi omwe bwamawoola aali 30 ciindi ca Ciibalusyo kweelana abubambe bwakaindi, lino balakonzya kuyungizya ‘cipaizyo cabo cantembauzyo’! (Heb. 13:15) Myezi yoonse yobilo March alimwi a April myezi mibotu kapati kuyungizya mulimo wesu kwiinda mukucita bupainiya bwakugwasyilizya. Mwaka amwaka mumyezi eeyi, tulatola lubazu mumulimo uukkomanisya kapati wakutamba bantu kuti bakajanike ku Ciibalusyo. Kuyungizya waawo, akaambo kakuti banji balayungizya mulimo wabo ciindi ca Ciibalusyo, tulakonzya kubeleka abasikumwaya baindene-indene. Cainda Ciibalusyo, tulapilukila kuli baabo bakatondezya luyandisisyo kwiinda mukujanika ku Ciibalusyo akubakulwaizya kuyoojanika kumakani aalubazu. Sena muyookulwaizyigwa kutola lubazu muzyoolwe eezyi zyayungizyigwa kutegwa mucite bupainiya bwakugwasyilizya?—Lk. 6:45.