Amukankaizye Kaambo Kajatikizya Kutalisya Ziiyo zya Bbaibbele Mubuzuba bwa Mujibelo Bwakusaanguna
Kutalikila mu May 2011, basikumwaya bakakulwaizyigwa kutalisya ziiyo zya Bbaibbele mubuzuba bwa Mujibelo bwakusaanguna mumwezi umwi aumwi. Kutegwa tugwasyigwe kucita oobo, cibeela ciboola lyoonse mu Ngazi Yamulindizi yabuleya icijisi mutwe wakuti “Mibuzyo Yamu Bbaibbele Yaingulwa” cakabambwa. Aboobo, lyamuswaangano wakulibambila kuunka mumulimo uucitwa mubuzuba bwa Mujibelo bwakusaanguna kweelede kutondezyegwa mbocikonzya kubelesyegwa cibeela eeci kutalisya ziiyo zya Bbaibbele alimwi kweelede kucitwa acitondezyo.
Baalu balakonzya kusala kuti kabunga kamulimo kamwi akamwi kakaswaangana kalikke mubuzuba bwa Mujibelo bwakusaanguna, naa kuti tubunga toonse katuswaangana antoomwe ambweni ku Ŋanda ya Bwami. Nokuba boobo, kuti Ŋanda ya Bwami kaibelesyegwa ambungano zinji, buzuba oobu bulibedelede bwakutalisya ziiyo zya Bbaibbele tabweelede kusumpizyigwa kubuzuba bumbi kutegwa mukacitile antoomwe muswaangano wakulibambila kuunka mumulimo.