August Uyooba Mwezi Wamulimo Uutakalubwi!

1. Ino nkwaambilizya nzi kwaalubazu kuyoocitwa nyika yoonse mboili afwaafwi kukkwana myaka ili 100 ya Bwami?

¹ Myaka iili 100 ilaafwaafwi kukkwana kuzwa Bwami bwa Leza nobwakatalika kulela. Eelo kaka cileelela kuti tumulemeke Jehova kwiinda mukwaambilizya kwaalubazu! Mumwezi wa August tuyootola lubazu mumulimo uyoocitwa nyika yoonse wakwaabila katulakiti kapya kakuti “Nkuli Nkotukonzya Kujana Bwiinguzi Kumibuzyo Iibakatazya Kapati Bantu?” Katulakiti aaka kakulwaizya basikubala kubona Bbaibbele kuti ndelikonzya kubapa bwiinguzi alimwi kalapandulula mboikonzya kubagwasya Web site ya jw.org.

2. Mbuti mbotukonzya kutola lubazu ‘muloonzomoko lupati lwakutembaula Jehova’ mumulimo uyoocitwa mu August?

² Loonzomoko Lupati Lwakutembaula: Kutegwa basikumwaya bagwasyigwe kuyungizya mulimo wabo, bubambe bwaalubazu bwabikkwa kuli boonse bayanda kucita bupainiya bwakugwasyilizya mumwezi wa August. Mumwezi ooyu, basikumwaya babbapatizyidwe bayoozumizyigwa kucita bupainiya bwakugwasyilizya bwamawoola aali 30. Mbwaanga mwezi wa August ujisi nsondo zyosanwe, basikumwaya banji babeleka milimo yakumubili naa aabo baunka kucikolo mukati kansondo bayookonzya kucita bupainiya bwakugwasyilizya. Ikuti kamujisi ciiyo ca Bbaibbele ciyaambele naa mwana uyanda kuba sikumwaya, amumwaambile sicuuno wakabunga kabaalu cakufwambaana. Eelo kaka ciyookulwaizya kubeleka antoomwe abasikumwaya bapya mumwezi ooyu uutakalubwi! Nokuba kuti bapainiya baciindi coonse banji balalyookezya mumwezi wa August nobamana kukkwanya mawoola ayandika mumwaka, cilakonzyeka kubambulula mulongo wabo kutegwa bakacikonzye kutola lubazu bukkwene mumulimo ooyu waalubazu. Lino nciindi cakuti mikwasyi ikkale ansi akubandika mboiyootola lubazu ‘muloonzomoko lupati lwakutembaula Jehova’ mumulimo uyoocitwa mu August.—Ezr. 3:11; Tus. 15:22.

3. Ino mbulangizi nzi mbotujisi kujatikizya kwaambilizya ooku kwaalubazu?

³ Nokuba kuti twali kutola lubazu mumulimo uuli boobu mumyaka yamusyule, tusyoma kuti bubambe oobu tabukalubwi pe. Sena mu August inga tiitwasika amweelwe waatala mupya wamawoola, wabasikumwaya alimwi awabapainiya bakugwasyilizya? Nouyaabumana mwaka wamulimo wa 2014, Jehova aalongezye kusolekesya kwabantu bakwe nyika yoonse kutegwa mwezi wa August ukabe mwezi wamulimo mupati wakupa bumboni uutakalubwi!—Mt. 24:14.