Amwiibelesye jw.org mu Mulimo Wanu

Web site yesu ncibelesyo cigwasya kapati icitugwasya mukumwaya makani mabotu “kusikila kumagolelo aanyika.” (Mil. 1:8) Bunji bwabantu cilabaalila kulijanina jw.org lwabo beni. Muciindi caboobo, balaiya kujatikizya njiyo lilikke buyo nobatondezyegwa asikumwaya.

Mulangizi weendeenda umwi wakakkopa kavidiyo kakuti Nkaambo Nzi Ncotweelede Kwiiya Bbaibbele? mufooni yakwe eelyo ulakatondezya kufwumbwa naajana ciindi cakucita boobo. Mucikozyanyo, ciindi naunka kuŋanda aŋanda, mboobu mbwaamba: “Ndiswaya bantu kwaciindi cisyoonto buyo kutegwa ndibagwasye kujana bwiinguzi kumibuzyo eeyi yotatwe iiyandika kapati: Nkaambo nzi ncokuli mapenzi manji boobu munyika? Ino Leza uyakwaamana buti? Alimwi mbuti mbotukonzya kuliyumya kwaciindi cino? Kavidiyo aaka kafwaafwi kalapa bwiinguzi kumibuzyo eeyi.” Kumane ulatyanka kutegwa kavidiyo katalike mpoonya akubona mukamwini ŋanda mbwatiicite. Kavidiyo aaka kalakondelezya kapati cakuti bantu banji balazumanana kukeebelela kusikila kumamanino. Kumane mulangizi weendeenda ulaamba kuti: “Mwalimvwida kuti mulakonzya kulomba ciiyo ca Bbaibbele kubelesya intaneti. Mbwaanga tuli limwi aano, ndilakonzya kumutondezya cakufwambaana mbomukonzya kucita boobo.” Ikuti naa mukamwini ŋanda wazumina, ulamutondezya mbocicitwa ciiyo kubelesya broshuwa ya Makani Mabotu. Ikuti naa mukamwini ŋanda katajisi ciindi, ulacita bubambe kutegwa akamutondezye mulweendo lutobela. Ciindi naunka kubusena nkobasambala kkofi kutegwa alyookezye, ulaamba munzila iikozyenye kumuntu uukkede afwaafwi anguwe naamana kutalisya mubandi munzila yabulongwe. Sena mulaibelesya jw.org mumulimo wanu?