Kuyungizya Luzyibo Lwesu Mumulimo Wakukambauka—Kubamba Ntalisyo Yalweendo Lwakupilukila

KAAMBO NCOCIYANDIKA:

Tuyanda kutilila mbuto zyakasimpe nzyotwakasyanga. (1Kor. 3:6) Ikuti twajana muntu iwatondezya luyandisisyo, inga cabota kumubuzya mubuzyo ngotuyoobandika ciindi ciboola twaakuswaya. Eeci inga capa kuti mukamwini ŋanda abe aluyandisisyo alimwi cipa kuti cuube-ube kulibambila nyendo yakupilukila. Twaakupilukila, tulakonzya kumwaambila kuti twaboola kwiingula mubuzyo ngotwakabuzya ciindi cainda.

MBOTUKONZYA KUCITA OOBO:

• Ciindi nomulibambila bukambausi bwakuŋanda aŋanda, mweelede kubuzya mubuzyo ngomuyooyingula mulweendo lutobela. Ulakonzya kuti kawiingulwa mubbuku ndyomwamwaabila. Naa ulakonzya kuti kauli mubuzyo wiingulwa mubbuku ndyotubelesya kwiiya, lyalo ndyomuyanda kuyoomutolela mwaakupilukila.

• Mwamana kubandika amuntu watondezya luyandisisyo, amumwaambile kuti mulayanda kuyoobandika alimwi anguwe, mpoonya amumubuzye mubuzyo ngomwalibambila kuyooyingula mwaakupilukila. Amulembe makani aajatikizya muntu ooyo kuti kacikonzyeka.

• Ikuti mukamwini ŋanda mwamwaambila ciindi cigaminide nomuyoopilukila, amucizuzikizye cisyomezyo canu.—Mt. 5:37.