Sena Muli Mukulibambila Ciibalusyo?

Pobwe Lyakwiindilila lyamamanino lya Jesu, lyakali kuyooyandika kapati. Akaambo kalufwu lwakwe lwakali afwaafwi, wakayeeya kuti alye Pobwe Lyakwiindilila antoomwe abaapostolo bakwe alimwi akutalisya pobwe lipya licitwa mwaka amwaka, nkokuti Mulalilo wa Mwami. Aboobo wakatuma Petro alimwi a Johane kuti bakabambe ŋanda. (Lk. 22:7-13; amubone cifwanikiso icili aacivwumbyo.) Eeci cituyeezya mbociyandika kapati kulibambila Ciibalusyo iciyoocitwa mu March 27. Kweelede kuti mbungano zyakajana kale mwaambi, zitondezyo, alimwi azintu zimwi buyo. Nokuba boobo, ino ncinzi umwi aumwi ncakonzya kucita kutegwa alibambile Ciibalusyo?

Amulibambile mumoyo. Amubale akuzinzibala kuyeeya magwalo aali mukubala Bbaibbele kwa Ciibalusyo. Mulakonzya kuujana mulongo mukabbuku ka Kulingaula Magwalo Abuzuba. Mulongo uumbi wamagwalo ulajanika kumakani aayungizyidwe B12 mu Bbaibbele lya Busanduluzi Bwanyika Mpya. (Alimwi amubone Kabbuku Kamuswaangano Wabuumi Amulimo kamu April 2020.) Lyakukomba kwamumukwasyi mulakonzya kubandika mbociyandika cinunuzyo kwiinda mukubelesya bbuku lya Watch Tower Publications Index naa Bbuku Ligwasya Kuvwuntauzya lya Bakamboni ba Jehova.

Amubatambe abamwi. Amutole lubazu cakumaninina mumulimo wakutamba bantu. Mulakonzya kutamba bantu mbomuswaya munyendo zyakupilukila, mbomwakali kwiiya limwi Bbaibbele kaindi, balongwe, alimwi abacibbululu. Baalu beelede kubona kuti aabo batacisungweede batambwa. Amuyeeye kuti, kuti umwi katakali kubusena nkomukkala mulakonzya kuzyiba ciindi alimwi abusena nkociyoocitilwa Ciibalusyo kubusena nkwakkala, kwiinda mukuunka acibeela cakuti KUJATIKIZYA NDISWE apeeji lyamatalikilo a jw.org mpoonya akutyanka aalembedwe kuti “Ciibalusyo.”

Ncinzi cimbi ncotukonzya kucita kutegwa tulibambile?