MBOTUKONZYA KUMANA PENZI LYAKUSULAIKANA

1 | Mutanoosalululi

Njiisyo Yamu Bbaibbele:

“Leza tasalululi, pele muzisi zyoonse kufwumbwa muntu uumuyoowa akucita ziluleme ulatambulwa kulinguwe.”—MILIMO 10:34, 35.

Ncocaamba:

Jehovaa Leza kunyina natubeteka kweelana acisi nkotuzwa, musyobo wesu, mubala wesu naa zilengwa zyesu. Muciindi caboobo, ubikkila maano kucintu ciyandika kapati, nkokuti mbotubede mukati kamoyo wesu. Alimwi Bbaibbele lyaamba kuti, “muntu ubona buyo zilibonya ameso, pele Jehova ubona zili mumoyo.”—1 Samuele 16:7.

Ncomukonzya Kucita:

Nokuba kuti tatukonzyi kuzyiba zili mumyoyo yabantu, tulakonzya kusola kumwiiya Leza akutasalulula bamwi. Amusolekesye kubona bantu umwi aumwi kumugama kutali mbuli nkamu. Ikuti mwazyiba kuti mujisi mizeezo iitaluzi kujatikizya bantu bamwi, ambweni aabo bamusyobo umbi naa ibazwa kucisi cimbi, amupaile kuli Leza kutegwa amugwasye kugwisya mizeezo iili boobo. (Intembauzyo 139:23, 24) Ikuti mwamulomba Jehova kuzwa ansi aamoyo kuti amupe nguzu zyakuba bantu batasalululi, mulakonzya kuba masimpe kuti uyakuuswiilila mupailo wanu alimwi akumugwasya.—1 Petro 3:12.

a Jehova ndezina lya Leza limugeme.—Intembauzyo 83:18.

“Tiindakalinakkede caluumuno amuntu mukuwa, . . . Lino ndakaba cibeela cabunyina bwanyika yoonse cini-cini.”—BA TITUS

Cakuluula Icikacitika Ncobeni—BA TITUS

Bakazunda Penzi Lyalusalululo

Ba Titus bakali kuzulilwa mukabunga kazigwebenga zyalo izyakali zikali akaambo kamilawo yalusalululo iyakaliko. Bakaamba kuti: “Twakali kuunka kumasena aamudolopo kwalo bantu basiya nkobatakali kuyandwa, mbuli mumahotela amumasena aakunywida makoko kutegwa tutalisye buyo nkondo.” Ba Titus bakaamba kuti bakali kweendelezyegwa aalusulo alimwi bakayungizya kwaamba kuti: “Ikuti twazwangana amuntu uuli woonse, kufwumbwa naa mwaalumi naa mukaintu, ndime ndakali wakusaanguna kuwaala mfwaindi.”

Ba Titus bakatalika kucinca ciindi nobakatalika kwiiya Bbaibbele a Bakamboni ba Jehova. Ciindi nobakabala Bbaibbele, zintu nzyobakabala zyakabajatikizya kapati. Bakakulwaizyigwa kapati kwaambisya nobakamvwa icisyomezyo canyika yakumbele mwalo ‘lufwu molutakabi limbi, akwalo koomoka, kulila nokuba kucisa mokutakabi limbi pe.’—Ciyubunuzyo 21:3, 4.

Kumatalikilo, ba Titus cakabakatazya kuleka kusulaika bamwi. Bakaamba kuti: “Cakali ciyumu kucinca mbondakali kuyeeya ambondakali kucita zintu.” Pele bakagwasyigwa ancobakaiya kuzwa kulugwalo lwa Milimo 10:34, 35, lwalo ilupandulula Leza kuti tasalululi.

Ino ncinzi cakazwa mpawo? Ba Titus bakaamba kuti: “Ndakasinizya kuti Bakamboni ba Jehova mbabakombi bakasimpe ciindi nondakabona luyando luli akati kabo, kunyina makani amusyobo naa mubala. Noliba leelyo kanditana kubbapatizyigwa kuba Kamboni, mukwesu umwi mukuwa wamumbungano wakanditamba kuŋanda yakwe kutegwa tukalye cakulya. Cakali mbuli kuti nciloto. Tiindakalinakkede caluumuno amuntu mukuwa, pele lino ndakali kulya cakulya muŋanda yakwe. Lino ndakaba cibeela cabunyina bwanyika yoonse cijisi luyando lwini-lwini.”