Nkondo Nimbyaabi Kapati
Bantu banji balajatikizyigwa kapati amanyongwe alimwi ankondo. Kunze lyaboobo, basikalumamba abaabo bakajatikizyigwa munkondo, balaamba mboili mbyaabi kapati.
BASIKALUMAMBA
“Lyoonse inga ubona bantu bajaidwe naa baliciside, eeci cikupa kulimvwa kutakwabililwa naaceya.”—Ba Gary, baku Britain.
“Ndakazimvwa akulibonena ntobolo kazidubuka. Kunze lyaboobo, ndakabona bantu banji kabafwide bana abapati. Nkondo inga yakupa kuyuma moyo.”—Ba Wilmar, baku Colombia.
“Kuti walibonena umwi kadubulwa tacili cuuba-uba kubuluba bukkale oobo, nkaambo mumizeezo lyoonse unoomubwene alimwi akumumvwa kapengaana akulila. Masimpe tacili cuuba-uba kumuluba muntu ooyo.”—Ba Zafirah, baku United States.
BANTU BAMBI
“Ndakali kulibilika kuti kunyina nondikonzya kukkomana alimwi. Kunze lyaboobo, ndakali kulibilika kujatikizya buumi bwangu, pele kwiinda zyoonse, kujatikizya buumi bwabanamukwasyi alimwi abalongwe.”—Ba Oleksandra, baku Ukraine.
“Cakali kulibilisya kwiima mumulaini wakuvwola cakulya kuzwa 02:00 kusikila 23:00hrs, kumwi katulibilikide kuti tulakonzya kudubulwa cakutayeeyela.”—Ba Daler, baku Tajikistan.
“Akaambo kankondo, ndakaba mucaala alimwi kwakanyina wakali kunduumbulizya akundilanganya.”—Ba Marie, baku Rwanda.
Nokuba kuti bantu aaba bakapenga akaambo kankondo, lino balikkomene nkaambo balaaluumuno. Kunze lyaboobo, ciinda kukkomanisya ncakuti, balizyi kuti manyongwe ankondo ziyoomana ino-ino. Aboobo, Ngazi Yamulindizi eeyi, ilapandulula ncolyaamba Bbaibbele kujatikizya manyongwe alimwi ankondo mboziyoomana.