Kujana Luumuno Munyika Iizwide Manyongwe Ankondo
Ba Gary, ibakali kubeleka mulimo wabusikalumamba bakaamba kuti: “Tiindakazyi kaambo ncokwakavwulide lunya, kutalulama alimwi amapenzi munyika. Pele lino ndilijisi luumuno lwamumizeezo. Ndilizyi kuti Jehova uyoopa kuti nyika eeyi bukabe busena buzwide luumuno.”
Ba Gary tabali buyo balikke balimvwa boobo pe. Atubone Bbaibbele mbolyabagwasya abamwi.
BBAIBBELE LYAAMBA KUTI: “Yebo, O Jehova uli mubotu alimwi ulilibambilide kulekelela zibi.”—Intembauzyo 86:5.
MBOCIGWASYA: “Lugwalo oolu lwakandigwasya kubona kuti Jehova ngusiluse. Kunze lyaboobo, ndakabona kuti ulilibambilide kundilekelela nokuba kuti ndakali kutola lubazu munkondo.”—Ba Wilmar, baku Colombia.
BBAIBBELE LYAAMBA KUTI: “Ndilenga majulu mapya anyika mpya; eelyo zintu zyakaindi tazikaibalukwi limbi pe, nokuba kuyeeyegwa mumoyo.”—Isaya 65:17.
MBOCIGWASYA: “Ndilapenga mumoyo akaambo kazintu zyakandicitikila nindakali sikalumamba. Pele lugwalo oolu, lundiyeezya kuti ino-ino Jehova uyoopa kuti zintu zyoonse eezyi zibyaabi nditakazyiyeeyi limbi. Eelo kaka cinooli ciindi cikkomanisya kapati nondiyooziluba cakumaninina!”—Ba Zafirah, baku United States.
BBAIBBELE LYAAMBA KUTI: “Mumazuba aakwe balulami bayoozwidilila, alwalo luumuno luyoovwula kusikila mane mwezi utakabi limbi.”—Intembauzyo 72:7.
MBOCIGWASYA: “Kanji-kanji ndilaayeeya majwi aaya. Ndilizyi kuti nkondo azintu zyoonse zibyaabi ziboola akaambo kankondo, ziyoomana ino-ino. Akaambo kaceeci, tandilibiliki kujatikizya zikonzya kubacitikila bayandwa besu.”—Ba Oleksandra, baku Ukraine.
BBAIBBELE LYAAMBA KUTI: “Bantu bako bafwide bayoopona alimwi. . . . Amusinsimuke moongolole cakukondwa, nywebo nomuli mubulongo!”—Isaya 26:19.
MBOCIGWASYA: “Bunji bwabanamukwasyi bakajaigwa amusyobo umwi iwakali kuyanda kujaya ba Tutsi boonse. Pele kapango aaka kakandigwasya kubona kuti tuyoobonana alimwi. Eelo kaka ndilacilangila ciindi baakubusyigwa kabaambaula kumwi kabakkomene!”—Ba Marie, baku Rwanda.
BBAIBBELE LYAAMBA KUTI: “Kusyeede kaindi kaniini buyo, ibantu babi tabakabi limbi pe . . . Pele babombe myoyo bayookona nyika, eelyo bayoobotelwa kapati muluumuno lunji.”—Intembauzyo 37:10, 11.
MBOCIGWASYA: “Nokuba kuti nkondo yakamana, pele kucili kutalulama alimwi abantu babyaabi. Aboobo tupango ootu, twakandigwasya kubona kuti Jehova ulizibwene zintu zyoonse zicitika alimwi ulabumvwisya bukkale bwangu. Usyomezya kuti ino-ino zintu zyoonse eezyi ziyoomana alimwi tazikayeeyegwi limbi pe.”—Ba Daler, baku Tajikistan.
Bantu baambidwe mumagazini eeyi, bali aakati kamamiliyoni aa Bakamboni ba Jehova, ibakagwasyigwa a Bbaibbele kutegwa babe aluumuno. Bakaiya mbobakonzya kuleka kusalulula bantu bamubala uumbi, cisi alimwi amusyobo. (Baefeso 4:31, 32) Kunze lyaboobo, Bakamboni ba Jehova tabatoli lubazu mumapolitikisi alimwi tabajatikizyigwi munkondo.—Johane 18:36.
Bakamboni ba Jehova balatondezyanya luyando nyika yoonse. (Johane 13:35) Kutondezya mbwaali aamasimpe makani aaya, amumvwe ncobakaamba ba Oleksandra ibaambidwe kumatalikilo, ciindi balo amwanookwabo musimbi nobakazwa mucisi akaambo kakutija nkondo. Bakaamba kuti: “Notwakasika kucisi cimbi, Bakamboni bakatutambula camaanza obilo. Lugwasyo ndobakatupa lwakapa kuti tuzyibile mucisi oomo motwakali bazangalisi.”
Twamutamba kuti mukatusangane kumiswaangano yesu, kwalo nkotwiiya mbotukonzya kubelesya mulumbe wamu Bbaibbele, uujatikizya mbotukonzya kujana luumuno. Kutegwa mujane busena bulaafwaafwi ankomukkala, amulange a jw.org naa kulomba ciiyo ca Bbaibbele kuli umwi wa Bakamboni ba Jehova kakunyina kubbadela, kubelesya bbuku lyakuti Amupone Kukabe Kutamani!