Kaambo Zina lya Jehova Ncoliyandika Kapati Kuli Jesu

1-2. (a) Ncinzi Jesu ncaakacita busiku katanajaigwa? (b) Mibuzyo nzi njotutiibandike mucibalo eeci?

JESU wakacita Mulalilo wa Mwami abaapostolo bakwe muli Bwane kumangolezya mu Nisani 14, 33 C.E. Wakalizyi kuti kakutanainda ciindi cilamfwu, Judasi wakali kuyakumwaaba alimwi wakali kuyakusubulwa akujaigwa abasinkondonyina. Aboobo, nobakamana kulya, wakaamba majwi manji kukulwaizya baapostolo bakwe. Kumane nocakasika ciindi cakuti bamwaike, Jesu wakapaila mupailo uuyandika kapati. Mwaapostolo Johane wakaulemba mupailo ooyu kulugwalo lwa Johane caandaano 17.

² Ino mupailo wa Jesu utondezya nzi kujatikizya ncaakalibilikide aciindi eeco? Mbuti mupailo ooyu mboutondezya cintu cakali kuyandika kapati ciindi naakali kucita mulimo wakwe waanyika? Amuleke tubandike bwiinguzi bwamibuzyo eeyi.

“NDABAZYIBYA ZINA LYAKO”

3. Ncinzi Jesu ncaakaamba kujatikizya zina lya Jehova? Ino wakali kupandulula nzi? (Johane 17:​6, 26)

³ Mumupailo wakwe, Jesu wakaamba kuti: “Ndabazyibya zina lyako.” Mane buya kwaziindi zyobilo wakaamba kuti wakabazyibya zina lya Jehova basikwiiya bakwe. (Amubale Johane 17:​6, 26.) Ino wakali kupandulula nzi? Sena wakabazyibya zina ndyobatakazyi? Peepe. Kayi basikwiiya bakwe bakali ba Juda aboobo bakalilizyi kale zina lya Leza lyakuti Jehova. Alimwi buya zina eeli lyakali kujanika ziindi zinji mu Magwalo aa Chihebrayo. Aboobo, Jesu tanaakali kwaamba zina lya Leza limugeme, muciindi caboobo wakali kwaamba ncoliiminina. Jesu wakabagwasya basikwiiya bakwe kumuzyiba kabotu Jehova kubikkilizya amakanze aakwe, bube bwakwe alimwi amilimo yakwe munzila iilimvwisya kapati.

4-5. (a) Ncikozyanyo nzi ncotukonzya kubelesya kupandulula ncocaamba kuzyiba zina lyamuntu? (b) Muunzila nzi basikwiiya ba Jesu mobakalizyiba zina lya Jehova?

⁴ Mucikozyanyo, amweezeezye kuti kuli mwaalu umwi mumbungano yanu wazina lya David alimwi ngudokota. Mwalimuzyi mukwesu ooyu kwamyaka minji. Pele bumwi buzuba mwaciswa kapati akuyandika lugwasyo lwakwe. Mpoonya mwatolwa kucibbadela nkwabeleka mukwesu ooyu, kumane wamusilika. Lino mwatalika kumuyanda kapati. Alimwi kufwumbwa buyo mwamvwa zina lyakwe muyeeya mbwaakafwutula buumi bwanu. Mukwesu David tacili buyo mwaalu ngomwalikuzyi kwaciindi cilamfwu, pele lino mwacinca mbomumubona.

⁵ Mbubwenya buyo, basikwiiya ba Jesu bakalilizyi kale zina lya Jehova. Pele bakatalika kuliyanda kapati akaambo kamulimo wa Jesu. Nkaambo nzi ncotukonzya kwaambila boobo? Nkaambo kakuti Jesu wakabutondezya bube bwa Bausyi muzintu nzyaakali kwaamba akucita. Aboobo kwiinda mukuswiilila mbwaakali kuyiisya akubona mbwaakali kubeendelezya bantu, basikwiiya bakwe ‘bakamuzyiba’ kabotu-kabotu Jehova.—Joh. 14:9; 17:3.

‘ZINA LYAKO EELYO NDYOOKANDIPA’

6. Ino Jesu wakali kupandulula nzi ciindi naakaamba kuti Jehova wakamupa zina lyakwe? (Johane 17:​11, 12)

⁶ Mumupailo wakwe, Jesu wakapailila basikwiiya bakwe kuti: “Kobakwabilila akaambo kazina lyako eelyo ndyookandipa.” (Amubale Johane 17:​11, 12.) Sena eeci cakali kwaamba kuti Jesu alimwi wakali kunooyitwa kuti Jehova? Peepe. Amubone kuti mumupailo wakwe wakaamba zina lya Jehova kuti “zina lyako.” Aboobo Jesu tanaakatalika kwiitwa kuti Jehova. Pele ncinzi ncaakali kupandulula ciindi naakaamba kuti zina lya Leza lyakapegwa nguwe? Cakusaanguna, Jesu wakali mwiiminizi wa Jehova alimwi Mwaambilizi wakwe. Wakaboola muzina lya Bausyi akucita maleele muzina eelyo. (Joh. 5:43; 10:25) Cabili, zina lyakuti Jesu lyaamba kuti “Jehova Ndufwutuko.” Masimpe, zina lya Leza liliswaangene azina lya Jesu.

7. Nkaambo nzi Jesu ncaakaambaula kwiiminina Jehova? Amupe cikozyanyo.

⁷ Kutegwa tumvwisye kaambo Jesu ncaakaambaula kwiiminina Jehova, amubone cikozyanyo eeci. Mweendelezi ulakonzya kutuma muntu umwi kuti akaambaule abantu bamwi ikwiiminina nguwe. Aboobo, majwi ngakonzya kwaamba muntu ooyo alaanguzu mbubwenya mbuli aamweendelezi. Mbubwenya buyo, Jesu wakalijisi nguzu zyakwaambaula kwiiminina Jehova nkaambo wakatumwa aanguwe.—Mt. 21:9; Lk. 13:35.

8. Muunzila nzi Jesu mwaakabelesyegwa kwiiminina zina lya Jehova katanaboola anyika? (Kulonga 23:​20, 21)

⁸ Bbaibbele lyaamba Jesu kuti “Ijwi,” nkaambo Jehova wakamubelesya kwaambila bangelo alimwi abantu kujatikizya ncaakali kuyanda kuti bazyibe akucita. (Joh. 1:​1-3) Kulangilwa kuti Jesu ngomungelo Jehova ngwaakabelesya kulanganya bana Israyeli nobakali munkanda. Naakali kwaambila bana Israyeli kuti bamumvwide mungelo ooyu, Jehova wakaamba kuti: “Nkaambo zina lyangu lili mulinguwe.”a (Amubale Kulonga 23:​20, 21.) Aboobo kwiinda mukwaamba majwi aaya, Jehova wakacisalazya kuti Jesu nguumwiiminina alimwi akuti ngomuntu wiinda kusalazya zina lyakwe.

“TAATA, KOPA KUTI ZINA LYAKO LILEMEKWE”

9. Ino zina lya Jehova lyakali kuyandika kapati buti kuli Jesu? Amupandulule.

⁹ Mbubwenya mbotwabandika kale, nociba ciindi Jesu katanaboola anyika, zina lya Jehova lyakali kuyandika kapati kulinguwe. Alimwi naakali anyika, wakatondezya kuti zina lya Jehova lyakali kuyandika kapati kulinguwe kwiinda muzintu nzyaakali kucita. Mpoonya kumamanino aamulimo wakwe waanyika, Jesu wakalomba Jehova kuti: “Taata, kopa kuti zina lyako lilemekwe.” Kakunyina kusowa ciindi, Bausyi bakaingula ajwi pati kuti “Ndakalipa kale kuti lilemekwe alimwi ndiyoopa kuti lilemekwe alimwi.”—Joh. 12:28.

10-11. (a) Mbuti Jesu mbwaakapa kuti zina lya Jehova lilemekwe? (Amubone acifwanikiso.) (b) Nkaambo nzi zina lya Jehova ncolyeelede kusalazyigwa?

¹⁰ Jesu awalo wakapa kuti zina lya Bausyi lilemekwe. Munzila nzi? Nzila imwi nkwiinda mukwaambila bamwi kujatikizya bube bwa Bausyi bubotu alimwi amilimo yabo. Pele kuli acimbi ncaakacita ikupa kuti zina eeli lilemekwe. Wakali kuyandika kutondezya kuti zyoonse nzyaakacita Jehova zililuzi alimwi akuti zina lyakwe lilasalala. Jesu wakatondezya eeci mbocakali kuyandika kapati ciindi naakayiisya basikumutobela mupailo wacikozyanyo. Wakaamba kuti: “Taateesu ooli kujulu, alisalazyigwe zina lyako.”—Mt. 6:9.

¹¹ Nkaambo nzi zina lya Jehova ncolyeelede kusalazyigwa? Akaambo kakuti mumuunda wa Edeni, Saatani wakaamba zyakubeja kujatikizya Jehova Leza. Wakaamba kuti Jehova mubeji alimwi akuti wakali kubaima zintu zibotu ba Adamu a Eva. (Matl. 3:​1-5) Kwiinda mukucita boobo, Saatani wakaamba Jehova kuti tanaakali kweendelezya kabotu. Akaambo kakuti Saatani wakaamba zyakubeja kujatikizya Jehova, bantu balakonzya kuyeeya kuti tali kabotu. Kumane mumazuba aa Jobu, Saatani wakaamba kuti aabo bamubelekela Jehova balacita oobo akaambo kazintu nzyabapa. Wakayungizya kwaamba kuti kunyina muntu uumuyanda ncobeni Jehova uukonzya kuzumanana kumubelekela kuti naa wajana mapenzi. (Job. 1:​9-11; 2:4) Aboobo, kwakali kuyandika ciindi kutegwa Saatani abonwe kuti mubeji.

“NDITUULA BUUMI BWANGU”

12. Ncinzi Jesu ncaakalisungwide kucita akaambo kazina lya Jehova?

¹² Akaambo kaluyando ndwaakajisi kuzina lya Jehova, Jesu wakalilisungwide kucita cili coonse ncaakali kukonzya kutegwa alisalazye. Wakaamba kuti: “Ndituula buumi bwangu.” (Joh. 10:​17, 18) Masimpe wakalilisungwide kufwa akaambo kazina lya Jehova.b Banabukwetene bakusaanguna, ba Adamu a Eva bakamuzangila Jehova akuba kulubazu lwa Saatani. Mukwiimpana, Jesu wakalilisungwide kuboola anyika akutondezya mbwaakali kumuyanda kapati Jehova. Wakacita oobo kwiinda mukumumvwida muzintu zyoonse nzyaakali kwaamba akucita. (Heb. 4:15; 5:​7-10) Wakazumanana kusyomeka mubuumi bwakwe kusikila naakafwa lufwu lucisa kapati acisamu cakupenzyezya. (Heb. 12:2) Munzila eeyi, wakatondezya luyando ndwaakajisi kuli Jehova azina lyakwe.

13. Nkaambo nzi Jesu ncaakali nguwe weelela kutondezya kuti Saatani mubeji? (Amubone acifwanikiso.)

¹³ Zintu zyoonse nzyaakacita Jesu zyakatondezya kuti Saatani mubeji ikutali Jehova. (Joh. 8:44) Jesu wakalimuzyi kabotu Jehova kwiinda muntu uuli woonse wakaponede. Ikuti nokwakali cintu cili coonse camasimpe akati kazintu zyoonse Saatani nzyaakatamikizya Jehova, Jesu naakazyiba kujatikizya ncico. Pele Jesu wakalikanzide kuzumanana kuliiminina zina lya Jehova, kutondezya kuti zyoonse nzyaakaamba Saatani zyakali zyakubeja. Nociba ciindi nocakalibonya mbuli kuti Jehova wamulekelezya, Jesu wakalilibambilide kufwa muciindi cakumuzangila Usyi siluyando.—Mt. 27:46.c

‘NDAUMANIZYA MULIMO NGOOKANDIPA KUTI NDICITE’

14. Ino Jehova wakamulumbula buti Jesu akaambo kakusyomeka kwakwe?

¹⁴ Mumupailo ngwaakapaila busiku katanafwa, Jesu wakaamba kuti: ‘Ndaumanizya mulimo ngookandipa kuti ndicite.’ Wakalisinizyide kuti Jehova wakali kuyoomulumbula akaambo kakusyomeka kwakwe. (Joh. 17:​4, 5) Alimwi wakaliluzi kumusyoma. Nkaambo Jehova kunyina naakazumizya kuti azumanane kuba mucuumbwe. (Mil. 2:​23, 24) Pele wakamubusya akumupa cuuno caatala kujulu. (Flp. 2:​8, 9) Kumane mukuya kwaciindi, Jesu wakatalika kulela kali Mwami wa Bwami bwa Leza. Aboobo ncinzi ncobuyoocita Bwami oobo? Jesu wakapa bwiinguzi ciindi naakayiisya basikwiiya bakwe kupaila kuti: “Abuboole Bwami bwako. Akucitwe kuyanda kwako [Jehova] ansi aano mbubonya mbuli kujulu.”—Mt. 6:10.

15. Ncinzi Jesu ncayoocita kumbele?

¹⁵ Kumbele, Jesu uyoobalwana basinkondonyina a Leza akubanyonyoona lyankondo ya Amagedoni. (Ciy. 16:​14, 16; 19:​11-16) Kuzwa waawo, Saatani uyoowaalwa mumulindi uutagoli mwalo mwatacinookonzyi kucita cintu cili coonse. (Ciy. 20:​1-3) Kumane, Jesu uyoolela kwamyaka iili 1,000 akuleta luumuno anyika alimwi akupa bantu kulondoka. Uyoobabusya bafwide akupa kuti nyika yoonse ibe paradaiso. Aboobo makanze aa Jehova ayoozuzikizyigwa.—Ciy. 21:​1-4.

16. Ncinzi ciyoocitika kumamanino aa Bulelo bwa Myaka Iili 1,000?

¹⁶ Ncinzi ciyoocitika kumamanino aa Bulelo bwa Myaka Iili 1,000? Cibi akutalondoka nkobakakona bantu ziyoomana. Kunze lyaboobo, bantu tabanoociyandiki kulomba kulekelelwa zibi kwiinda mucinunuzyo, alimwi tabanoociyandiki ba 144,000 kuba bapaizi babo naa Jesu kuba Mupaizi wabo Mupati kutegwa bakonzye kuba acilongwe a Jehova. Mpoonya ‘sinkondo wamamanino, nkokuti lufwu lwakaletwa a Adamu, uyoonyonyoonwa.’ Kumane bafwide bayoobusyigwa. Mpoonya bantu boonse ibanoopona anyika bayoolondoka.—1Kor. 15:​25, 26.

17-18. (a) Ncinzi ciyoocitika kumamanino aa Bulelo bwa Myaka Iili 1,000? (b) Ncinzi ncayoocita Jesu caakusika ciindi cakuti aleke kweendelezya? (1 Bakorinto 15:​24, 28) (Amubone acifwanikiso.)

¹⁷ Ncinzi acimbi ciyoocitika kumamanino aa Bulelo bwa Myaka Iili 1,000? Aciindi eeco, kuyoocitika cintu cimwi caalubazu. Kunyina muntu ucinoodooneka kuti Jehova uliluleme. Nkaambo nzi? Mumuunda wa Edeni, Saatani wakaamba kuti Jehova mubeji akuti tabeendelezyi caluyando bantu. Kuzwa ciindi eeco, cakwiinduluka-induluka zina lyakwe lyali kusalazyigwa abaabo bamulemeka. Aboobo, kumamanino aa Bulelo bwa Myaka Iili 1,000, zina lya Jehova linooli lyasalazyigwa cakumaninina. Masimpe, aciindi eeco Jehova unooli watondezya kuti ngu Taateesu wakujulu siluyando.

¹⁸ Kumamanino aa Bulelo bwa Myaka Iili 1,000 bantu boonse bayoozyiba kuti zintu zyoonse nzyaakaamba Saatani kujatikizya Jehova zyakali zyakubeja. Aboobo, ncinzi ncayoocita Jesu caakusika ciindi cakuti aleke kweendelezya? Sena uyoomuzangila Jehova mbuli mbwaakacita Saatani? Peepe. (Amubale 1 Bakorinto 15:​24, 28.) Uyoobupilusya Bwami kuli Bausyi akulibombya kubweendelezi bwabo. Masimpe mukwiimpana a Saatani, Jesu ulilisungwide kucita cintu cili coonse ncakonzya akaambo kazina lya Jehova.

19. Ino zina lya Jehova liyandika kapati buti kuli Jesu?

¹⁹ Masimpe kuli kaambo kabotu Jehova ncaakapeda Jesu zina lyakwe. Jesu wakatondezya bwini mbwabede Usyi. Aboobo, ino zina lya Jehova liyandika kapati buti kuli Jesu? Lilayandika kapati kulinguwe kwiinda cintu cimbi cili coonse. Nkakaambo kaako, wakalilisungwide kufwa akaambo kandilyo. Alimwi kumamanino aa Bulelo bwa Myaka Iili 1,000, Jesu uyoozipilusya zyoonse kuli Jehova. Aboobo mbuti mbotukonzya kwiiya cikozyanyo cakwe? Tuyoobujana bwiinguzi bwamubuzyo ooyu mucibalo citobela.