Zina lya Jehova Lilayandika Kapati Kulindiswe

1-2. Ino tuzyi buti kuti zina lya Jehova lilayandika kapati kuli Jesu?

ZINA lya Jehova lilayandika kapati kuli Jesu alimwi kunyina wakalizyibya mbuli mbwaakacita walo. Kweelana acibalo cainda mbocakatondezya, Jesu wakalilisungwide kufwa kutegwa asalazye zina lya Jehova. (Mk. 14:36; Heb. 10:​7-9) Yaakumana Myaka Iili 1,000 ya Bulelo bwakwe, uyoobupilusya Bwami kuli Bausyi kutegwa zina lyabo lisalazyigwe. (1Kor. 15:​26-28) Alimwi zyoonse nzyaakacita Jesu akaambo kazina lya Jehova, zitondezya kuti ulamuyanda kapati.

² Jesu wakaboola anyika muzina lya Bausyi. (Joh. 5:43; 12:13) Alimwi wakalizyibya zina lyabo kuli basikumutobela. (Joh. 17:​6, 26) Kunze lyaboobo, wakayiisya akucita maleele muzina lyabo. (Joh. 10:25) Mane buya, wakalomba Bausyi kuti babakwabilile basikwiiya bakwe ‘akaambo kazina lyabo.’ (Joh. 17:11) Cilisalede kuti zina lya Leza lyakali kuyandika kapati kuli Jesu kwiinda cintu cimbi cili coonse. Aboobo, mbuti muntu mbwakonzya kwaamba kuti ngusikutobela Jesu wini-wini pele katalizyi zina lya Jehova naa kulibelesya?

3. Ncinzi ncotutiibandike mucibalo eeci?

³ Mbotuli Banakristo beni-beni ibatobela mikondo ya Jesu, tulaliyanda kapati zina lya Jehova. (1Pet. 2:21) Aboobo mucibalo eeci, tulabona kaambo Jehova ncaakabapeda zina lyakwe aabo bakambauka “makani mabotu aa Bwami.” (Mt. 24:14) Alimwi tulabona mbolyeelede kuba cintu ciyandika kapati kuli umwi aumwi wesu.

“BANTU BAZINA LYAKWE”

4. (a) Mulimo nzi Jesu ngwaakapa basikwiiya bakwe katanapiluka kujulu? (b) Mubuzyo nzi ngotukonzya kulibuzya?

⁴ Jesu katanapiluka kujulu, wakaambila basikwiiya bakwe kuti: “Muyootambula nguzu muuya uusalala waakusika alindinywe, eelyo muyooba bakamboni bangu mu Jerusalemu, mu Judaya moonse amu Samariya, mane kusikila kumasena aakulamfwu kapati aanyika.” (Mil. 1:8) Aboobo basikwiiya bakali kuyookambauka makani mabotu kumasena woonse ikutali buyo mu Israyeli. Mpoonya mukuya kwaciindi, bantu bazisi zyoonse bakali kuyooba acoolwe cakuba basikutobela ba Jesu. (Mt. 28:​19, 20) Pele Jesu wakaamba kuti: “Muyooba bakamboni bangu.” Aboobo tulakonzya kulibuzya kuti, sena aaba basikwiiya bapya bakaleelede kulizyiba zina lya Jehova naa bakali kuyooba buyo bakamboni ba Jesu? Zintu zyaambidwe kulugwalo lwa Milimo caandaano 15 zilatugwasya kwiingula mubuzyo ooyu.

5. Mbuti baapostolo alimwi abaalu bamu Jerusalemu mbobakatondezya kuti bantu boonse baleelede kulizyiba zina lya Jehova? (Amubone acifwanikiso.)

⁵ Mu 49 C.E., baapostolo alimwi abaalu bamu Jerusalemu bakaswaangana kutegwa babandike kujatikizya ncobakeelede kucita Bamasi ibatakapaludwe kutegwa beelele kuba Banakristo. Kumamanino aamubandi wabo, Jakobo imwanookwabo a Jesu wakaamba kuti: “[Petro] wapandulula cakusalazya Leza kwaciindi cakusaanguna mbwaakababikkila maano bamasi kuti mulimbabo ajane bantu bazina lyakwe.” Pele ino Jakobo wakali kwaamba zina lyani? Kazubulula majwi aamusinsimi Amosi, wakayungizya kwaamba kuti: “Kutegwa bantu aabo ibayoosyaala bakayandaule Jehova camoyo woonse, antoomwe abantu bamumasi oonse, ibantu baitwa azina lyangu, mbwaamba Jehova.” (Mil. 15:​14-18) Aboobo, basikwiiya aaba bapya tiibakali kuyakwiiya buyo kujatikizya Jehova pele alimwi bakali ‘kuyakwiitwa azina lyakwe.’ Eeci caamba kuti bakali kuyoolizyibya zina lya Leza kubantu alimwi abalo bantu bakali kuyoobazyiba kuti mbobaiminina zina eeli.

6-7. (a) Ino Jesu wakaboolela nzi anyika? (b) Nkaambo nzi kayandika kapati ikakapa kuti Jesu aboole anyika?

⁶ Zina lyakuti Jesu lyaamba kuti “Jehova Ndufwutuko,” alimwi Jehova wakamubelesya Jesu kutegwa afwutule baabo boonse ibajisi lusyomo. Jesu wakaboola anyika kutegwa aabe buumi bwakwe kunununa bantu. (Mt. 20:28) Aboobo kwiinda mukupa cinunuzyo, wakapa kuti cikonzyeke kubantu kulekelelwa zibi zyabo alimwi akuyoojana buumi butamani.—Joh. 3:16.

⁷ Pele nkaambo nzi bantu ncobakali kuyandika cinunuzyo? Cakali kuyandika akaambo kacintu icakacitika mumuunda wa Edeni. Mbubonya mbokwakabandikwa mucibalo cainda, bazyali besu bakusaanguna ba Adamu a Eva bakamuzangila Jehova akusweekelwa coolwe cakupona mane kukabe kutamani. (Matl. 3:​6, 24) Pele kuli kaambo akambi kayandika kapati ikakapa kuti Jesu aboole anyika kunze buyo lyakunununa bantu. Saatani wakaamba makani aakubeja kujatikizya Jehova. (Matl. 3:​4, 5) Aboobo, kunununa bana ba Adamu a Eva kwakaliswaangene akaambo kayandika kapati, nkokuti kusalazyigwa kwazina lya Jehova. Akaambo kakuti Jesu wakamwiiminina Jehova akulizyibya zina lyakwe, wakacita mulimo mupati mukupa kuti zina lya Jehova lisalazyigwe.

8. Ncinzi ncobakeelede kuzyiba boonse aabo ibakali kuyooba alusyomo muli Jesu?

⁸ Bantu boonse ibakali kuyooba alusyomo muli Jesu, kufwumbwa naa mba Juda naa Mbamasi, bakeelede kuzyiba nkolwakali kuzwa lufwutuko lwabo nkokuti kuli Jehova Leza, Bausyi Jesu. (Joh. 17:3) Kuyungizya waawo, mbubwenya mbuli Jesu, bakali kuyoozyibwa azina lya Jehova. Alimwi bakeelede kuzyiba mbocakali kuyandika kapati kulisalazya zina eeli. Nkaambo eeci cakali kuyoopa kuti bakkomaninwe a Leza alimwi akuyooba abuumi butamani. (Mil. 2:​21, 22) Aboobo, boonse basikutobela Jesu basyomeka, bakeelede kwiiya kujatikizya Jehova alimwi a Jesu. Nkakaambo kaako Jesu wakamanizya mupailo wakwe uulembedwe kulugwalo lwa Johane caandaano 17 kwiinda mukwaamba majwi aaya aakuti: “Ndabazyibya zina lyako alimwi ndiyoolizyibya ikutegwa luyando ndookali kundiyanda andulo lube mulimbabo alimwi mebo ambabo tukamantane.”—Joh. 17:26.

“NYWEBO NDINYWE BAKAMBONI BANGU”

9. Mbuti mbotukonzya kutondezya kuti zina lya Jehova lilayandika kapati kulindiswe?

⁹ Kweelana anzyotwabandika, cilisalede kuti kutegwa tube basikutobela Jesu beni-beni, tweelede kulisalazya zina lya Jehova. (Mt. 6:​9, 10) Zina lya Jehova lyeelede kuba ncecintu ciyandika kapati kulindiswe alimwi tweelede kutondezya oobo kwiinda muzintu nzyotucita. Aboobo, ncinzi ncotweelede kucita kutegwa tulisalazye zina lya Jehova alimwi akutondezya kuti nzyaakaamba Saatani kujatikizya nguwe zyakubeja?

10. Makani nzi ngotujana mucaandaano 42 kusikila ku 44 cabbuku lya Isaya? (Isaya 43:9; 44:​7-9) (Amubone acifwanikiso.)

¹⁰ Kulugwalo lwa Isaya caandaano 42 kusikila ku 44, twiiya ncotweelede kucita kutegwa tusalazye zina lya Jehova. Muzyaandaano eezyi, Jehova waambila bantu aabo batakombi nguwe kuti batondezye naa baleza babo nkobali ncobeni. Aboobo mbubwenya mbuli munkuta, waamba kuti, ikuti naa kuli bakamboni bali boonse ibakonzya kubaiminina baleza aabo baboole. Pele kunyina naba omwe iwaboola.—Amubale Isaya 43:9; 44:​7-9.

11. Kweelana alugwalo lwa Isaya 43:​10-12, ncinzi Jehova ncaambila bantu bakwe?

¹¹ Amubale Isaya 43:​10-12. Kujatikizya bantu bakwe, Jehova waamba kuti: “Nywebo ndinywe bakamboni bangu, . . . eelyo mebo ndime Leza.” Jehova ubabuzya mubuzyo ooyu wakuti: “Sena kuli Leza uumbi kunze lyandime?” (Is. 44:8) Aboobo tulijisi coolwe cakwiingula mubuzyo ooyu. Kwiinda muzintu nzyotwaamba alimwi akucita, tulakonzya kutondezya kuti kunyina Leza uumbi kunze lya Jehova. Alimwi zina lyakwe lilisumpukide kwiinda mazina aambi oonse. Aboobo kwiinda mubukkale bwesu, tweelede kutondezya kuti tulamuyanda kapati Jehova alimwi tulasyomeka kulinguwe tacikwe makani abuyumuyumu buli boonse mbwakonzya kutuletela Saatani. Kwiinda mukucita boobo, tulakonzya kutola lubazu mukusalazya zina lyakwe.

12. Ino businsimi buli kulugwalo lwa Isaya 40:​3, 5 bwakazuzikizyigwa buti?

¹² Ciindi notusalazya zina lya Jehova naa mpuwo yakwe, twiiya Jesu Kristo. Alimwi Isaya wakasinsima kuti muntu umwi wakali ‘kuyoobamba nzila ya Jehova.’ (Is. 40:3) Ino businsimi oobu bwakazuzikizyigwa buti? Johane Mubbapatizi wakabambila Jesu nzila, pele mubwini eeyi yakali nzila ya Jehova akaambo kakuti Jesu wakali kwiiminina Jehova. (Mt. 3:3; Mk. 1:​2-4; Lk. 3:​3-6) Businsimi mbweena oobu bwakaamba kuti: “Bulemu bwa Jehova buyooyubununwa.” (Is. 40:5) Pele ino eeci cakacitika buti? Ciindi Jesu naakaboola anyika, wakamwiiminina kabotu-kabotu Jehova cakuti cakali mbuli kuti ngu Jehova wakaboola anyika.—Joh. 12:45.

13. Mbuti mbotukonzya kumwiiya Jesu?

¹³ Mbubwenya mbuli Jesu, tuli bakamboni ba Jehova. Twiitwa azina lya Jehova alimwi tulabaambila bantu boonse kujatikizya milimo yakwe mibotu. Pele alimwi tweelede kubaambila kujatikizya zintu zyoonse Jesu nzyaakacita ikusalazya zina lya Jehova. Kucita boobu kulakonzya kupa kuti tube bakamboni ba Jehova bali kabotu. (Mil. 1:8) Kunyina muntu uuli woonse iwakapa bumboni kujatikizya Jehova mbuli mbwaakacita Jesu alimwi tweelede kucitobela cikozyanyo cakwe. (Ciy. 1:5) Pele muunzila nzi azimbi mbotukonzya kutondezya kuti zina lya Jehova lilayandika kapati kulindiswe?

NZILA AZIMBI MBOTUKONZYA KUTONDEZYA KUTI ZINA LYA JEHOVA LILAYANDIKA KAPATI KULINDISWE

14. Kweelana ambokwaambidwe kulugwalo lwa Intembauzyo 105:​3, ino tulimvwa buti kujatikizya zina lya Jehova?

¹⁴ Tulalikkomanina kapati zina lya Jehova. (Amubale Intembauzyo 105:3.) Jehova ulakkomana kapati ciindi notulidunda akaambo kazina lyakwe. (Jer. 9:​23, 24; 1Kor. 1:31; 2Kor. 10:17) ‘Kulidunda muli Jehova’ caamba kukkomana kapati akaambo kakuti Jehova ngu Leza wesu. Tucibona kuba coolwe caalubazu kusalazya zina lyakwe naa mpuwo yakwe. Aboobo tatweelede kufwa nsoni kwaambila babelesima, basicikoloma, basimukoboma naa bantu bambi buyo kuti tuli Bakamboni ba Jehova. Pele Diabolosi walo uyanda kuti tuleke kwaambila bamwi kujatikizya zina lya Jehova. (Jer. 11:21; Ciy. 12:17) Alimwi buya, Saatani antoomwe abaabo bamwaya makani aakwe aakubeja bayanda kuti bantu balilube zina lyakwe. (Jer. 23:​26, 27) Pele akaambo kakuti tulaliyanda zina lya Jehova, tuyanda kuzumanana kunoolitembaula “buzuba boonse.”—Int. 5:11; 89:16.

15. Ino kwiita zina lya Jehova caamba nzi?

¹⁵ Tulazumanana kwiita zina lya Jehova. (Joel. 2:32; Rom. 10:​13, 14) Kwiita zina lya Jehova kubikkilizya zinji kunze buyo lyakulizyiba alimwi akulibelesya. Cilabikkilizya akumuzyiba bwini mbwabede, kumusyoma, kulanga kulinguwe kuti atugwasye alimwi akutusololela. (Int. 20:7; 99:6; 116:4; 145:18) Kunze lyaboobo, cilabikkilizya akwaambila bamwi kujatikizya zina lyakwe abube bubotu mbwajisi alimwi akubakulwaizya kweempwa akubweza ntaamu kutegwa bakkomaninwe a Jehova akuyoofwutuka.—Is. 12:4; Mil. 2:​21, 38.

16. Mbuti mbotukonzya kutondezya kuti Saatani mubeji?

¹⁶ Tweelede kuba bantu balibambilide kupenga akaambo kazina lya Jehova. (Jak. 5:​10, 11) Ciindi notuzumanana kusyomeka kuli Jehova nokuba kuti tuli mumapenzi, tutondezya kuti Saatani mubeji. Naakali kupona Jobu, Saatani wakaamba boobu kujatikizya babelesi ba Jehova: “Muntu uyoopa zintu zyoonse nzyajisi kutegwa avwune buumi bwakwe.” (Job. 2:4) Kwiinda mukwaamba majwi aaya, Saatani wakali kwaamba kuti bantu banoomubelekela Jehova lilikke buyo kuti zintu kazibeendela kabotu. Pele kuti bajana mapenzi balakonzya kuleka kumubelekela. Nokuba boobo, Jobu wakatondezya kuti ooku nkubeja. Mazuba aano, andiswe tulakonzya kutondezya kuti nzyaakaamba Saatani zyakubeja kwiinda mukuzumanana kumubelekela Jehova tacikwe makani amapenzi ngakonzya kutuletela Saatani. Alimwi tweelede kumusyoma Jehova cakumaninina kuti uyoozumanana kutukwabilila akaambo kazina lyakwe.—Joh. 17:11.

17. Kweelana alugwalo lwa 1 Petro 2:​12, muunzila nzi ayimbi motukonzya kupa kuti zina lya Jehova lilemekwe?

¹⁷ Tweelede kucita zyoonse nzyotukonzya kutegwa zina lya Jehova lilemekwe. (Tus. 30:9; Jer. 7:​8-11) Mbwaanga twiiminina Jehova alimwi twiitwa azina lyakwe, tulakonzya kupa kuti lilemekwe naa lisampaulwe. (Amubale 1 Petro 2:12.) Aboobo, tuyanda kucita kufwumbwa ncotukonzya kutegwa tumulemeke Jehova kwiinda muzintu nzyotwaamba alimwi akucita. Ikuti twacita oobo nokuba kuti tatulondokede, tuyoopa kuti zina lyakwe lilemekwe.

18. Muunzila nzi ayimbi motukonzya kutondezya kuti zina lya Jehova lilayandika kapati kulindiswe? (Amubone abupanduluzi buyungizyidwe.)

¹⁸ Tweelede kubikkila maano kapati kujatikizya zina lya Jehova ikutali mpuwo yesu. (Int. 138:2) Nkaambo nzi eeci ncociyandika kapati? Akaambo kakuti ciindi notucita zintu zimukkomanisya Jehova, kanji-kanji bantu inga tabaziyandi alimwi balakonzya kwaamba zintu zibi kujatikizya ndiswe.a Mucikozyanyo, ciindi Jesu naakafwa, bantu bakamubona mbuli kuti ncigwebenga alimwi bakamusampaula. Pele walo wakalilibambilide kufwa munzila eeyi kutegwa Jehova alemekwe. Aboobo “wakaubaula kuusyigwa nsoni” mukuti tanaakabikkila maano kapati kujatikizya mbobakali kukonzya kumubona bamwi. (Heb. 12:​2-4) Walo wakabikkilide maano kapati kukucita kuyanda kwa Leza.—Mt. 26:39.

19. Ino mulimvwa buti kujatikizya zina lya Jehova? Nkaambo nzi?

¹⁹ Tulalikkomanina kapati zina lya Jehova alimwi tucibona kuti ncoolwe caalubazu kwiitwa kuti Bakamboni ba Jehova. Akaambo kaceeci, tulilibambilide kuliyumya kukusampaulwa kuli koonse nkotukonzya kujana akaambo kandilyo. Zina lya Jehova lilayandika kapati kulindiswe kwiinda mpuwo yesu. Aboobo, aabe makanze eesu aakuzumanana kulemeka zina lya Jehova, tacikwe makani amapenzi ngakonzya kutuletela Saatani. Kwiinda mukucita boobo, tuyootondezya kuti zina lya Jehova lilayandika kapati kulindiswe mbubonya mboliyandika kuli Jesu Kristo.