Kucibelesya Kabotu ‘Cipego Canu Cakumuuya’

Toonse tulakulwaizyigwa ciindi notuli abakwesu abacizyi. Pele kutegwa ziindi zili boobu kazitukatalusya ncobeni, kuli zintu zinji nzyotweelede kucita. Bbaibbele lyaamba kuti ciindi notuyumya lusyomo lwaumwi, cili mbuli kuti tupa “cipego cakumuuya.” (Rom. 1:​11, 12) Aboobo, mbuti mbotukonzya kucibelesya kabotu cipego eeci?

Amubakulwaizye bamwi kwiinda muzintu nzyomwaamba. Mucikozyanyo, ciindi notupa bwiinguzi lyamiswaangano, tatweelede kwaamba buyo zintu zijatikizya ndiswe pele tweelede kubikkila maano kwaamba zintu zijatikizya Jehova, Jwi lyakwe alimwi abantu bakwe. Alimwi ciindi notubandika abasyomima, tweelede kwaamba zintu zikonzya kuyumya lusyomo lwabo.

Amubakulwaizye bamwi kwiinda muzintu nzyomucita. Mucikozyanyo, bamwi bazumanana kuba mumulimo waciindi coonse nokuba kuti bajisi mapenzi aabageme. Mpoonya bamwi bazumanana kujanika kumuswaangano wamukati kansondo nokuba kuti mulimo ngobabeleka taubazumizyi kucita boobo naa bajisi penzi lyakuciswa-ciswa.

Sena mulabakulwaizya bakwesu abacizyi kwiinda muzintu nzyomwaamba akucita? Alimwi sena mulabikkila maano kubona mbobamukulwaizya bakwesu abacizyi kwiinda muzintu nzyobaamba akucita?