Amulumbe Bwaabi bwa Jehova

JEHOVA ngu Leza mwaabi. (Jakobo 1:17) Tulakonzya kubona bwaabi bwakwe muzintu zyoonse nzyaakalenga. Wakabikka nyenyeezi mububumbo, alimwi wakazuzya nyika azisyango zyeebeka.—Intembauzyo 65:12, 13; 147:7, 8; 148:3, 4.

Mulembi wa Intembauzyo 104 wakalumba kapati kuzintu zyoonse Jehova nzyaakalenga, aboobo wakalemba lwiimbo lwakumutembaula. Ciindi nomubala Intembauzyo 104, sena andinywe mulalumba kapati mbubwenya mbwaakacita sintembauzyo? Wakati: “Ndinakwiimbila Jehova mubuumi bwangu boonse; ndinakwiimba nyimbo zyakutembaula Leza wangu kufwumbwa kuti kandili muumi.” (Intembauzyo 104:33) Sena andinywe mulayanda kucita oobo?

CIKOZYANYO CABWAABI ICIINDA ZYOONSE

Jehova uyanda kuti twiiye bwaabi bwakwe. Alimwi ulatupa twaambo tubotu ncotweelede kuba baabi. Wakasololela mwaapostolo Paulo kulemba kuti: “Kobalailila aabo bavwubide mubweende bwazintu obuno kuti kabatalisumpuli, akuti bulangizi bwabo butabi mulubono lutasyomeki pe, pele muli Leza, ooyo uutupa camoyo woonse zintu zyoonse nzyotukkomanina. Ubaambile kuti kabacita zibotu, kababeleka milimo mibotu minji, kabalisungwide kupa camoyo woonse, kabalibambilide kwaabana zintu abamwi, kabaliyobweda ntalisyo mbotu yaciindi cakumbele, ikutegwa bajatisye buumi bwini-bwini.”—1 Timoteyo 6:17-19.

Mulugwalo lwakwe lwabili ku Banakorinto, Paulo wakapandulula makanze ngotweelede kuba angawo ciindi notupa bamwi zintu. Wakati: “Umwi aumwi acite mbuli mbwaasala mumoyo wakwe, ikutali kupa kumoyo kakusiya naa cakusinikizyigwa buya, nkaambo Leza uyanda muntu uupa kumwi kakkomene.” (2 Bakorinto 9:7.) Ino mbaani mbotugwasya ciindi notutondezya bwaabi kuli bamwi? Paulo wakaamba kuti tugwasya bamwi kwiinda mukubapa nzyobayandika, pele alimwi tulaligwasya tobeni akaambo kakuti Jehova uyootulongezya.—2 Bakorinto 9:11-14.

Mpoonya Paulo wakaamba bumboni bupati ibutondezya bwaabi bwa Leza ciindi naakaamba kuti: “Aalumbwe Leza akaambo kacipego cakwe citabbadelwi citakonzyi kupandululwa.” (2 Bakorinto 9:15) ‘Cipego citabbadelwi’ ca Jehova cibikkilizya zintu zyoonse zibotu nzyapa kwiinda muli Jesu Kristo. Majwi alikke taakonzyi kupandulula mbociyandika kapati cipego eeci.

Mbuti mbotukonzya kutondezya kuti tulalumba kapati kuzintu zyoonse Jehova alimwi Jesu nzyobakatucitila alimwi anzyobayootucitila kumbele? Inzila imwi nkwiinda mukuba baabi ciindi notupa ciindi cesu, nguzu zyesu alimwi azintu nzyotujisi kutegwa tukombe Jehova akugwasya bamwi kuti baiye kujatikizya nguwe. Tulakonzya kucita oobu tacikwe makani naa tujisi zintu zinji naa zisyoonto.—1 Makani 22:14; 29:3-5; Luka 21:1-4.

Nzila Bamwi Nzyobabelesya Kusanga Kumulimo Wanyika Yoonse

Mbubwenya mbuli Banakristo ibakapona mumwaanda wamyaka wakusaanguna, ibanji mazuba aano balabikka mali ambali aamulimo wanyika yoonse alimwi akusanga mukabbokesi kakusangila ikali mumbungano yabo. (1 Bakorinto 16:2) Mwezi amwezi, mbungano zilatuma mali aaya kuofesi yamutabi ya Bakamboni ba Jehova iyeendelezya mulimo mucisi eeco. Alimwi mulakonzya kutuma nyolikke zyakusanga kumbunga iizumizyidwe amulawo iibelesyegwa a Bakamboni ba Jehova mucisi canu. Kutegwa muzyibe zina lyambunga eeyo, mwalombwa kuunka a www.jw.org alimwi akwaambaula aofesi yamutabi ya Bakamboni ba Jehova mucisi canu. Mulakonzya kutuma zyakusanga eezyi:

ZYAKUSANGA

Zyakusanga zitumwa kwiinda mukubelesya intaneti naa makkaadi aakubbanki. Mumasi amwi, mulakonzya kusanga kubelesya webbusaiti ya jw.org naa webbusaiti imwi.
Mali, ngale naa zintu zimbi ziyandisi ziindene-indene nzyomujisi. Mweelede kubikkilizya alugwalo ilupandulula kuti mali naa zintu eezyo nzyomwatuma mwasanga buyo kakunyina kulangila kuti mucitilwe cintu cimwi.

KUSANGA KWIINDA MUKUZUMINANA

Kusanga mali kwiinda mukuzuminana asikusanga kuti mali aayo alakonzya kupiluka ikuti naa waayanda.
Mwalombwa kuti musaangune kubandika aofesi yamutabi iili mucisi canu.

NZILA AZIMBI MBOMUKONZYA KUSANGA

Mincali iitobela ilatondezya nzila zimbi nzyomukonzya kubelesya mukugwasyilizya mulimo wakukambuka uucitwa nyika yoonse. Kamutanasanga, mwalombwa kusaanguna kubandika aofesi yamutabi iili mucisi canu kutegwa mubone naa ninzila nzi zizumizyidwe mucisi canu. Mbwaanga iziyandika alimwi amilawo yamitelo iliindene-indene, cilayandika kapati ikubuzya basyaazibwene mumilawo yamitelo kamutanasala nzila mbotu njomuyanda kubelesya mukusanga.

Insyuwalansi: Imbunga iibelesyegwa a Bakamboni ba Jehova ilakonzya kulembwa kuti njiiyakubweza mali aabukwabilizi bwabuumi (life insurance policy) naa mali aalya aapegwa kumuntu iwasika aciimo cakuleka mulimo (retirement/pension plan).

Maakkaunti Aakubbanki: Kweelana aziyandika kubbanki yakubusena ooko, muntu ulakonzya kujula akkaunti yakubbanki, mapepa aatondezya mali ngaakabikka muakkaunti naa maakkaunti aamali ngapegwa muntu iwasika aciimo cakuleka mulimo. Alimwi ulakonzya kuyaamba cacigaminina mbunga imwi iibelesyegwa a Bakamboni ba Jehova kuti njiiyoobweza mali kuti naa wafwa.

Mali Ngomujisi Mukkampani: (Stocks and Bonds) Muntu umwi ulakonzya kusanga mali ngajisi mukkampani kumbunga iibelesyegwa a Bakamboni ba Jehova. Alimwi ulakonzya kulemba cizuminano icijisi malailile aakuti mbunga njiiyakwaabweza mali aakufwa.

Nyika Amayake: Ikuti muntu kajisi nyika amayake izikonzya kusambalwa, ulakonzya kuzisanga kumbunga iibelesyegwa a Bakamboni ba Jehova. Ikuti naa wasanga busena mpakkede, ulakonzya kuzumanana kukkala aawo kusikila akafwe.

Mali Aapegwa Amwaka: Muntu ulakonzya kusanga mali naa zintu kumbunga iibelesyegwa a Bakamboni ba Jehova alimwi akucita bubambe bwakuti muntu ooyu iwasanga mali aaya kapegwa mali amwi mwaka amwaka kusikila akafwe. Iwasanga mali aaya tapi mutelo kumali aayo mumwaka ooyo bubambe oobu nobwatalika.

Bwapauzi Bwazintu: (Wills and Trusts) Muntu ulakonzya kucita bubambe bwakuti zintu nzyajisi naa mali zikasangwe aakufwa. Ulakonzya kucita boobo kwiinda mukubelesya pepa lyamalailile aabwaapauzi bwazintu ilizumizyidwe amulawo naa kuti imbunga iibelesyegwa a Bakamboni ba Jehova ilakonzya kulembwa kuti njiyeelede kupegwa zintu zyaambidwe mubwaapauzi bwazintu. Bubambe oobu bulakonzya kugwasya sikusanga munzila iimwi mumakani aamutelo.

Kutegwa muzyibe zinji, mulakonzya kubandika adipatimenti ya Treasury (iilanganya mali kuofesi yamutabi), inga mwatuma fooni naa kulemba lugwalo kwiinda mukubelesya kkeyala iili ansi aawa, naa kubandika aofesi yamutabi iili mucisi canu.