Ndilipa Mulandu​—Sena Bbaibbele Lilakonzya Kundigwasya Kulimvwa Kabotu?

Bwiinguzi Bwamu Bbaibbele

Inzya. Bbaibbele lilakonzya kutugwasya kucita cintu cimwi kutegwa tucileke kulipa mulandu. (Intembauzyo 32:1-5) Ikuti naa twakabisya mpoonya twakeempwa kuzwa ansi aamoyo, Leza uyootulekelela akutugwasya kubambulula zintu. (Intembauzyo 86:5) Bbaibbele litondezya kuti, kulipa mulandu zimwi ziindi kulagwasya nkaambo kulakonzya kutupa kubweza ntaamu ziyandika kutegwa tuleke kucita cintu cimwi icitali kabotu, akusolekesya kutaciinduluka kumbele. (Intembauzyo 51:17; Tusimpi 14:9) Nkakaambo kaako, Bbaibbele ncolitupeda lulayo lwakuti tatweelede kuciindizya kulipa mulandu, ambweni akulimvwa kubula bulangizi naa kuti tatuyandiki mumeso aa Leza. Ikuti katulibona boobu, cilakonzya kutupa ‘kumenenwa limwi akaambo kakuusa.’​—2 Bakorinto 2:7.

• Ncinzi cikonzya kupa kuti katulimvwa kuba amulandu?

• Ncinzi ncondikonzya kucita kuti kandilipa mulandu?

• Tupango twamu Bbaibbele twaamba kujatikizya kulipa mulandu akulekelelwa

Ncinzi cikonzya kupa kuti katulimvwa kuba amulandu?

Tulakonzya kulipa mulandu akaambo katwaambo twiindene-indene. Ambweni inga twayeeya kuti twakalubizyila muyandwa wesu naa kuti twakaalilwa kucita cintu ncotuyeeya kuti twakeelede kucicita. Zimwi ziindi, tulakonzya kulipa mulandu kakunyina akaambo kaya koomoonga. Mucikozyanyo, ikuti naa twaciindizya kulibikkila zyeelelo zisumpukide nzyotutakonzyi akuzuzikizya, kulalangilwa kuti tunoolipa mulandu ciindi coonse twaalilwa kusika azyeelelo eezyo. Nkakaambo kaako Bbaibbele litukulwaizya kutaciindizya muzintu nzyotuyeeyela kucita.​—Mukambausi 7:16.

Ncinzi ncondikonzya kucita kuti kandilipa mulandu?

Muciindi cakumaninwa maano akaambo kakulipa mulandu, amucite ncomukonzya kutegwa mululamike zintu. Munzila nzi?

• Amuzumine nomwalubizya. Amulombe kulekelelwa kuli Jehovaa Leza kwiinda mukupaila kulinguwe. (Intembauzyo 38:18; Luka 11:4) Mulakonzya kuba masimpe kuti Leza uyoomuswiilila ikuti naa mwalilekelela akweempwa kuzwa ansi aamoyo kumane akusolekesya kutaciinduluka cibi ncomwakacitide. (2 Makani 33:13; Intembauzyo 34:18) Mukwiimpana andiswe tobantu, Leza ulabona buntu bwesu bwamukati. Ciindi nabona kuti tulasolekesya kuleka kucita cibi, “ulasyomeka alimwi uliluleme, [aboobo] ulakonzya kutulekelela zibi zyesu.”​—1 Johane 1:9; Tusimpi 28:13.

  Kulubazu lumwi, ikuti naa twakalubizyila muntu umwi, tweelede kuzumina kuti twakalubizya akulilekelela kulinguwe kuzwa ansi aamoyo. Nokuba boobo, tacili cuuba-uba kucita oobo! Inga twayandika kulicesya alimwi akuba basicamba. Pele kulilekelela munzila iili boobu kulagwasya mumbazu zyobilo ziyandika kapati. Yakusaanguna, kupa kuti tulimvwe kabotu, mpoonya yabili, kupa kuti tube aluumuno akubukulusya cilongwe cesu.​—Matayo 3:8; 5:23, 24.

• Amuzinzibale kuyeeya magwalo aamba kujatikizya luse lwa Leza. Mucikozyanyo, amulange-lange lugwalo lwa 1 Johane 3:19, 20. Lugwalo oolu lwaamba kuti ‘myoyo yesu ilakonzya kutupa mulandu,’ nkokuti tulakonzya kulimvwa bubi kapati ambweni akulimvwa kuti tatweeleli kulumvwa luyando lwa Leza. Nokuba boobo, lugwalo ndweena alimwi lwaamba kuti “Leza mupati kwiinda myoyo yesu.” Mubuti? Ulizyi zintu zyoonse zijatikizya ndiswe alimwi ulamvwisya mbotulimvwa akulezya kwesu. Kunze lyaboobo, ulizyi kuti twakazyalwa katutalondokede, icaamba kuti tulalubizya kanji-kanji.b (Intembauzyo 51:5) Aboobo tabakaki aabo beempwa kuzwa ansi aamoyo kukulubizya kwabo.​—Intembauzyo 32:5.

• Mutazumanani kuyeeya zibi nzyomwakacitide kaindi. Bbaibbele lilijisi zibalo zinji izyaamba kujatikizya bamaalumi abamakaintu ibakacita zintu zitali kabotu pele mukuya kwaciindi bakazoocinca. Cikozyanyo cimwi nca Saulo waku Tarso, walo kumbele iwakazyikuba mwaapostolo Paulo. Naakacili mu Farisi, wakali kubapenzya citaambiki basikutobela Jesu. (Milimo 8:3; 9:1, 2, 11) Pele naakazyiba kuti wakali kukazya Leza alimwi a Mesiya, naa Kristo, wakeempwa, wakaleka nzila zyakwe, akuba Munakristo iwakajisi cikozyanyo cibotu. Masimpe kuti, Paulo wakausa kapati akaambo kamicito yakwe yakaindi, pele tanaakazumanana kuyeeya zibi nzyaakacitide kaindi. Mbwaanga wakalizyi kuti Leza wakamutondezya luse lupati, Paulo wakaba mukambausi musungu alimwi lyoonse wakagamikide meso aakwe kubulangizi bwabuumi butamani.​—Bafilipi 3:13, 14.

Tupango twamu Bbaibbele twaamba kujatikizya kulipa mulandu akulekelelwa

Jeremiya 31:34: “Ndiyoobalekelela cinyonyoono cabo, alimwi cibi cabo tandikaciyeeyi limbi pe.”

Bupanduluzi: Ikuti Leza watulekelela, takonzyi kutuyeezya nzyotwakamulubizyila. Luse lwakwe ndwancobeni.