Nkaambo Nzi Ncokuli Kusulaikana Boobu?​—Ino Bbaibbele Lyaamba Nzi?

Mazuba aano, anyuuzi tuvwula kumvwa makani aajatikizya bantu baamba naa kucita zintu zicisa bamwi akaambo buyo kakwiindana mubala, alimwi ankondo.

• “Mazuba aano bantu balabelesya majwi aacisa kapati a social media akaambo kankondo iili akati ka Israel a Gaza alimwi abantu basumpula nkondo akusulaikana.”​—The New York Times, November 15, 2023.

• “Kuzwa mu October 7, mwaambo uucisizya bamwi waduma kapati akaambo kalusalululo.”​—Dennis Francis, mweendelezi wa United Nations General Assembly, November 3, 2023.

Mwaambo uucisa alimwi ankondo tiizyatalika sunu pe. Mane buya, Bbaibbele lilabaamba aabo kaindi ‘ibakagamika majwi aabo mabi mbuli mivwi’ alimwi ibakali basinkondo. (Intembauzyo 64:3; 120:7; 140:1) Nokuba boobo, Bbaibbele lyaamba kuti lusulo luliko lino lwaindila buya.

Kusulaikana​—Citondezyo camazuba ngotupona

Bbaibbele lilaamba twaambo tobilo kusulaikana ncokudumide mazuba aano.

1. 1. Lyakasinsima ciindi ‘luyando lwabantu banji noluyoomana.’ (Matayo 24:12) Muciindi cakutondezya luyando, bantu banoojisi bube bupa kuti kabasulaika bantunyina.​—2 Timoteyo 3:1-5.

2. 2. Kusulaikana kuliko mazuba aano kutondezya muuya mubi ngwajisi Saatani Diabolosi. Bbaibbele lyaamba kuti “nyika yoonse ili mumaanza aamubi.”​—1 Johane 5:19; Ciyubunuzyo 12:9, 12.

Nokuba boobo, Bbaibbele alimwi lyaamba kuti lino-lino Leza uyoozimana zintu zipa kuti kakuli kusulaikana. Kuyungizya waawo, uyakwaamana mapenzi aaboola akaambo kakusulaikana. Bbaibbele lisyomezya kuti:

• Leza “uyoosindula misozi yoonse kumeso aabo, alimwi lufwu talukabi limbi, akwalo koomoka, kulila nokuba kucisa takukabi limbi pe. Zintu zyakaindi zyamana.”​—Ciyubunuzyo 21:4.