Ino Bakamboni ba Jehova Babeendelezya Buti Aabo Mbobakali Kukomba Limwi Kaindi?
Tulasolekesya kweendelezya bantu boonse caluyando, caluzyalo alimwi acabulemu. Ikuti umwi wa Bakamboni ba Jehova kasotaukila kukomba naa kucilekelalimwi buya, tulabweza ntaamu yakubandika anguwe, kumusyomezya kuti tulamuyanda akumugwasya kubukulusya cilongwe cakwe a Leza.—Luka 15:4-7.
Mubukkale bumwi, muntu ulakonzya kucita cintu cimwi cikonzya kupa kuti agusyigwe mumbungano. (1 Bakorinto 5:13) Nokuba boobo, akaambo kakuti tulabayanda aabo mbotukomba limwi, tusaanguna kusolekesya kumugwasya muntu ooyo kutegwa atasiki antaamu yakugusyigwa mumbungano. Alimwi nokuba kuti wagusyigwa, tulazumanana kumuyanda akumulemeka mbuli Bbaibbele mbolitukulwaizya kucita.—Marko 12:31; 1 Petro 2:17.
Ncinzi cipa kuti muntu agusyigwe mumbungano?
Cakusalazya Bbaibbele lyaamba kuti, ikuti Munakristo wacita cibi cipati mpoonya katayandi kweempwa, weelede kugusyigwa mumbungano. (1 Bakorinto 5:11-13) Bbaibbele lilazyaamba zibi zipati zikonzya kupa kuti muntu agusyigwe mumbungano. Mucikozyanyo, lilaamba zibi mbuli bumambe, bucakolwa, bujayi, kutundulula alimwi akubba.—1 Bakorinto 6:9, 10; Bagalatiya 5:19-21; 1 Timoteyo 1:9, 10.
Nokuba boobo, muntu wacita cibi cipati tagusyigwi mpoonya-mpoonya. Baalua bambungano basaanguna kumugwasya muntu ooyo kutegwa acince nzila zyakwe. (Baroma 2:4) Balasola kumugwasya kuti acince kwiinda mukumweendelezya caluzyalo alimwi acabubombe. (Bagalatiya 6:1) Kumweendelezya munzila eeyi muntu ooyo wacita cibi kulakonzya kupa kuti akubone kulubizya kwakwe mpoonya akweempwa. (2 Timoteyo 2:24-26) Pele ikuti muntu ooyo wazumanana kucita ceeco Bbaibbele ncolyaamba kuti ncibi alimwi katayandi kweempwa nokuba kuti baalu basoleka kumugwasya, weelede kugusyigwa mumbungano. Mpoonya baalu balaambilizya kumbungano ikuti muntu ooyo tacili umwi wa Bakamboni ba Jehova.
Baalu balasola kumugwasya muntu wacita cibi kuti acince kwiinda mukumweendelezya caluzyalo alimwi acabubombe
Mbubotu nzi buba akaambo kakugusya muntu uukanzide kuzumanana kucita cibi? Bubotu bumwi mbwakuti mbungano ilazumanana kusalala kweelana azyeelelo zya Leza alimwi akutayungwa amicito yamuntu ooyo. (1 Bakorinto 5:6; 15:33; 1 Petro 1:16) Kuyungizya waawo, kugusya muntu wacita cibi kulakonzya kumupa kuleka nzila zyakwe alimwi akusolekesya kucinca.—Bahebrayo 12:11.
Ino Bakamboni ba Jehova babeendelezya buti aabo bakagusyigwa mumbungano?
Bbaibbele lyaamba kuti Banakristo beelede ‘kuleka kuyanzana’ amuntu wagusyigwa mumbungano, ‘alimwi tabeelede kusola nokuba kulya amuntu uuli boobo.’ (1 Bakorinto 5:11) Aboobo tatuyanzani amuntu wakagusyigwa mumbungano. Nokuba boobo, tatuleki kumubikkila maano. Tulamweendelezya munzila yabulemu. Alimwi ulitambidwe kujanika kumiswaangano yesu, kwalo Bakamboni ba Jehova nkobakonzya kusala kumujuzya naa kumutambula.b Kuyungizya waawo, ulakonzya kulomba baalu kuti bamugwasye kujokela mumbungano.
Aabo bakagusyigwa mumbungano balitambidwe kujanika kumiswaangano yesu
Ino mbuti kujatikizya muntu wagusyigwa pesi mukaintu abana kabali Bakamboni ba Jehova? Nokuba kuti tacikombi Jehova amukwasyi wakwe, cibbululu cilasyaala mbweena. Mbwaanga bacikkala aŋanda yomwe, cilongwe ncajisi ayooyo ngobakwetene limwi abana cilazumanana alimwi boonse beelede kweendelezyanya caluyando.
Muntu wakagusyigwa ulakonzya kulomba kuswaigwa abaalu, balo caluyando ibakonzya kumupa lulayo lwamu Magwalo akumukulwaizya kuti eempwe akupiluka kuli Leza. (Zekariya 1:3) Ikuti wazileka nzila zyakwe zitali kabotu akutondezya kwiinda muzintu nzyacita kuti uyanda kutobela zyeelelo zyamu Bbaibbele, ulakonzya kuba cibeela cambungano alimwi. Mbungano ‘iyoomulekelela akumuumbulizya,’ mbubwenya mbobakacita Banakristo baku Korinto ciindi simucita zibi naakaleka nzila zyakwe zyakaindi.—2 Bakorinto 2:6-8.
Ino aabo bakagusyidwe mumbungano balimvwa buti lino?
Amumvwe nzyobakaamba Bakamboni ba Jehova bamwi ibakagusyidwe mumbungano mpoonya mukuya kwaciindi bakasala kupiluka kuli Leza.
“Nondakasala kupiluka mumbungano, ndakali kuyeeya kuti baalu inga bayanda kuzyiba zintu zyoonse nzyondakacita mumyaka minji njondakagusyidwe mumbungano. Muciindi caboobo, bakaamba buyo kuti, ‘Tuyanda kuti mubikkile maano kuzintu nzyomucita lino.’ Nobakaamba boobo, ndakakkalwa moyo.”—Ba Maria, United States.
“Bantu bamumbungano bakakkomana kapati ciindi nondakapilusyigwa. Ndakalimvwa kuyandwa. Bakwesu abacizyi bakandipa kulimvwa kulekelelwa akundigwasya kutalimvwa bubi kuzintu nzyondakali kucita musyule. Baalu lyoonse bakali kundigwasya kuti ndibukulusye cilongwe cangu a Jehova. Kuyungizya waawo, bakali kunduumbulizya akundigwasya kubona kuti Jehova wakacili kundibikkila maano akundiyanda.”—Ba Malcom, Sierra Leone.
“Ndilikkomene kuti akaambo kakuti Jehova ulabayanda bantu bakwe ulaisalazya mbunga yakwe. Nokuba kuti bamwi balakonzya kuyeeya kuti kugusya muntu wacita cibi mumbungano ndunya, pele cilayandika alimwi ncitondezyo caluyando. Ndilalumba kapati kuti Taateesu wakujulu ngusiluyando alimwi ngu Leza uulekelela.”—Ba Sandi, United States.
a Baalu mbaalumi Banakristo basimide ibayiisya kuzwa mu Magwalo alimwi akweembela bantu ba Jehova kwiinda mukubagwasya akubakulwaizya. Baalu tabavwoli kumulimo ngobabeleka.—1 Petro 5:1-3.
b Zimwi ziindi, muntu wacita cibi cipati kwiinda tagoleli buyo akuzwa mumbungano, pele alimwi ulacita azintu zikonzya kunyonganya mpuwo yambungano akubatyompya bali mumo naa kubasungilizya kucita zintu zibyaabi. Ikuti eeci cacitika, tutobela mulawo wamu Bbaibbele wakuti tatweelede “kumwaanzya” muntu uuli boobo.—2 Johane 9-11.