BAKUBUSI BALABUZYA
Nkaambo Nzi Bazyali Bangu Ncobatandizumizyi Kulikkomanisya?
Beenzinyoko bamutamba kupobwe awikkeendi. Mwababuzya bazyali banu kuti naa inga mwaunka, mpoonya bati, “Peepe.” Pele tiimwagambwa abwiinguzi bwabo akaambo kakuti mbobakamwiingude ciindi cainda.
Mucibalo eeci tulalanga-langa makani aatobela
Nkaambo nzi bazyali bangu ncobatandizumizyi lyoonse?
Ikuti kaciboneka mbuli kuti bazyali banu tabamuzumizyi lyoonse nomwabalomba kucita cintu cimwi, mulakonzya kuyeeya kuti tabayandi kuti kamulikkomanisya.
Mukubusi wazina lyakuti Marie wakalimvwa boobo ciindi naakaba afooni. Wakaamba kuti: “Bataata bakali kundibikkila milawo minji kujatikizya ma aapu ngondakali kukonzya kudauniloda, bantu mbondakali kukonzya kubandika limwi, alimwi aciindi ncondakeelede kubandika ambabo. Kakuli beenzuma bakali kucita kufwumbwa ncobayanda!”
Ncomweelede kuyeeya: Sena mubwini bausyi bakali kumukasya kulikkomanisya? Nzintu nzi zimbi zyakali kukonzya kubapa kulibilika?
Milawo njobabikka bazyali ili mbuli milawo yamumugwagwa iitondezya mboyeelede kubalika moota, ilibonya mbuli kuti taimupi lwaanguluko, pele ilamukwabilila kumapenzi aakonzya kumucitikila
Amusole nzila eeyi: Amweezyeezye kuti muli muzyali, alimwi mujisi mwana mukubusi wakaula fooni caino-ino. Ino nkulibilika kuli buti nkomukonzya kubaankuko? Ino milawo nzi njomukonzya kubikka kutegwa mumukwabilile mwanaanu? Ncinzi ncomukonzya kwaamba kuti mwanaanu waamba kuti tamuyandi kuti kalikkomanisya?
“Bataata lyoonse bakali kwaamba kuti, ‘Kolibikka mubukkale bwangu.’ Kucita boobo kwakandigwasya kutabona buyo mboyakali kuyandika milawo pele akubona kaambo ncobakali kwiibikkila. Ikuti nindalijisi bana, inga ndayanda kuti kabacita nzyobayanda kuti kandicita bataata.”—Tanya.
Mbuti mbondikonzya kupa kuti bazyali bangu kabandizumizya?
“Kunyema takugwasyi, alimwi kupa buyo kupenga mumizeezo—kulindinywe akubazyali banu. Ikuti kamukazya, bazyali banu balakonzya kumubona kuti tamunasima akuti tamunayandika lwaanguluko lunji.”—Richard.
“Bazyali bangu inga lyoonse bajisi makanze mabotu kujatikizya mulawo uuli woonse ngobabikka. Tabandikasyi kulikkomanisya; pele bayanda buyo kuti kandicita oobo munzila iili kabotu—munzila iitakonzyi kundiletela mapenzi.”—Ivy.
Njiisyo yamu Bbaibbele: “Mufwubafwuba ulatondezya bukali boonse buli mumoyo wakwe, pele musongo ulakkazika moyo alimwi ulalijata.”—Tusimpi 29:11.
“Cakusisikizya ndakasola kutatobela milawo njobakabikkide bataata kujatikizya mbondikonzya kubelesya fooni. Ndakasola kujana nzila yakubandika abeenzuma masiku naa kudauniloda ma aapu ngobatakali kundizumizya. Mukuya kwaciindi bakali kuzyiba ncondakali kucita akundibikkila milawo miyumu nkaambo lino bakalilekede kundisyoma. Tacigwasyi kusotoka milawo cakusisikizya.”—Marie.
“Amukkazike moyo. Cilakonzya kutola ciindi kutegwa bazyali banu baucince mulawo umwi, pele kuti babona mbomutobela milawo njobabikka, bayoomuzumizya kuti kamucita zintu zinji.”—Melinda.
Njiisyo yamu Bbaibbele: “Amubamvwide bazyali banu muzintu zyoonse.”—Bakolose 3:20.
“Kuzumanana acintu ncomuyanda takukonzyi kumugwasya naa kupa kuti zintu zimweendele kabotu.”—Natalie.
“Muzyali uyanda kubona kuti mulakonzya kupanga zyakusala zibotu. Aboobo ciindi nondibandika abazyali bangu, ndilasoleka kubelesya twaambo tumvwika kupandulula mbondilimvwa. Ciindi nondicita oobo, ndilazwidilila.”—Joseph.
Njiisyo yamu Bbaibbele: “Lemeka bauso abanyoko.”—Baefeso 6:2.