BAKUBUSI BALABUZYA
Sena Milawo Yaaŋanda Ilayandika?
Sena mujisi penzi kujatikizya milawo yaaŋanda? Cibalo eeci alimwi apepa lyakulembela zilamugwasya kubandika abazyali banu kujatikizya penzi eelyo.
Kuzilanga munzila yeelede zintu
Makani aakubeja: Ikuti mwazwa aŋanda kucinoonyina milawo iili yoonse.
Makani aamasimpe: Milawo taimani nokuba kuti mwazwa aŋanda. Muyakwiijana kumbi buyo, ambweni kuli sikumulemba mulimo, mukamwini busena mpomukkala, nokuba kumfwulumende. Danielle uujisi myaka iili 19 wakaamba kuti “Ndiyeeya kuti bakubusi ibaalilwa kutobela milawo yaaŋanda bayoogambwa kapati ciindi baakulikkalila.
Ibbaibbele lyaamba kuti: ‘Amuzimvwide mfwulumende abaabo bajisi nguzu zyabweendelezi.’ (Tito 3:1) Kutobela milawo yabazyali banu kuyoomugwasya mwaakukomena.
Ncomukonzya kucita: Amuzyibe bubotu bwamilawo. Mukubusi umwi wazina lya Jeremy waamba kuti: “Milawo yabazyali bangu yakandigwasya kuzyiba mbondeelede kusala balongwe alimwi akubelesya kabotu ciindi. Alimwi yakandigwasya kutaciindizya kweebelela TV akusobanya mavidiyo geemu calo cakandigwasya kucita zintu ziyaka, zimwi nzyondicikkomanina asunu.”
Nzila mbotu
Pele ino mbuti kuti milawo kailibonya mbuli kuti taigwasyi? Mucikozyanyo, mukubusi wazina lya Tamara waamba kuti: “Bazyali bangu bakandizumizya kuunka kucisi cimbi, pele lino akaambo kakuti ndakajoka aŋanda, tabakonzyi kundizumizya kuunka kudolopo ikweendwa maminiti aali 20 buyo amootokala!”
Ikuti kamuli mubukkale bukozyenye aboobu, sena inga kwaba kulubizya kubandika abazyali banu kujatikizya mulawo ooyo? Peepe! Ciyandika buyo nkuzyiba ciindi nomweelede kubandika alimwi ambomweelede kubandika ambabo.
Ciindi nomweelede kubandika. Mukubusi wazina lya Amanda waamba kuti: “Lilikke buyo kuti bazyali bako kabakusyoma akaambo kakucita zintu munzila iili kabotu ndendilyo nokonzya kubandika ambabo kujatikizya kucinca mulawo.”
Mukubusi wazina lya Daria wakabona kuti kaambo aaka nkamasimpe. Waamba kuti: “Ciindi bamaama nobakabona kuti ndilabamvwida, ndendilyo nobakazumina kuucinca mulawo.” Kamuyeeya kuti, tamweelede kubasinikizya buya bantu kuti kabamusyoma.
Kukkala muŋanda mwalo milawo yabazyali moitatobelwi cili mbuli ndeke iiyanda kukkala abbuwa lyandeke alo milawo mpoitatobelwi
Ibbaibbele lyaamba kuti: “Kobamba mulawo wabauso, alimwi utaleki kutobela malailile aabanyoko.” (Tusimpi 6:20) Ikuti mwalutobela lulayo oolo, bazyali banu banoomusyoma alimwi munoolikwaya kubandika ambabo.
Mbomweelede kubandika. Mukubusi wazina lya Steven waamba kuti: “Kuba aabulemu alimwi akukkazika moyo ninzila mbotu yakubandika abazyali banu muciindi cakutongooka naa kunyema buya.”
Daria, iwaambwa kale, ulakazumina kaambo aako. Waamba kuti: “Ciindi nondakali kukazyanya abamaama, kunyina cakali kucinca. Alimwi buya, zimwi ziindi bakali kuciindizya kuuyumya mulawo.”
Ibbaibbele lyaamba kuti: “Mufwubafwuba ulatondezya bukali boonse buli mumoyo wakwe, pele musongo ulakkazika moyo alimwi ulalijata.” (Tusimpi 29:11) Kulilesya kulagwasya kapati, kutali buyo aŋanda pele alimwi akucikolo, kumulimo, akuli koonse buyo.
Ncomukonzya kucita: Kamuyeeya kamutanaamba. Kusyomeka koonse nkomwajisi kulakonzya kumana kuti mwafwambaana kunyema. Nkakaambo kaako Bbaibbele ncolyaamba kuti “ooyo uutafwambaani kunyema musongo kapati.”—Tusimpi 14:29.
Muzeezo: Amubelesye pepa lyakulembela kulanga-langa milawo, mpoonya kuti kakuyandika, amubandike abazyali banu kujatikizya makani aaya.