Mbuti Mbondikonzya Kubandika Abazyali Bangu Kujatikizya Milawo Njobandibikkila?

“Nondakajisi myaka iili 15, milawo yabazyali bangu tiiyakali kundikatazya kutobela, pele lino nondaba amyaka iili 19, ndilimvwa kuti ndeelede kupegwa lwaanguluko lunji.”​—Sylvia.

Sena mulimvwa mbwaakali kulimvwa Sylvia? Ikuti naa mbomulimvwa oobo, cibalo eeci cilamugwasya kubandika makani aaya abazyali banu.

• Ncomweelede kuzyiba

• Ncomukonzya kucita

• Nzyobaamba beenzinyoko

Ncomweelede kuzyiba

Kamutanabandika abazyali banu kujatikizya milawo njobamubikkilide, amubone twaambo tutobela:

• Kuti kakunyina milawo, inga kwaba lupyopyongano munyika. Mucikozyanyo, tulizyi kuti mumugwagwa mulajanika zikwankwani amalobboti. Lino amweezyeezye lupyopyongano lukonzya kuba kuti kakunyina zintu eezyi. Mbubwenya buyo, ikuti kakunyina milawo aŋanda, inga kwaba lupyopyongano.

• Milawo itondezya kuti bazyali banu balamuyanda. Kuti kabamubikkila milawo citondezya kuti balamuyanda. Mubwini aaba mbazyali babotu.

SENA MULIZYI? Bazyali abalo balijisi milawo! Ndasyoma eeci camugambya. Ikuti naa mwagambwa, amubale Matalikilo 2:​24; Deuteronomo 6:​6, 7; Baefeso 6:4; alimwi a 1 Timoteyo 5:8.

Sena mucilimvwa kuti milawo njobamubikkila bazyali banu taili kabotu? Ikuti naa mbocibede oobo, ncinzi ncomukonzya kucita?

Ncomukonzya kucita

Amubandike. Pele kamutanabandika, amuyeeye kujatikizya mpuwo yanu. Ino mujisi mpuwo iili buti caboola kukumvwida bazyali banu? Ikuti kaitali kabotu, eeci inga kacitali ciindi cibotu cakulomba lwaanguluko lunji. Muciindi cakubalomba kuti mubandike, inga cabota kusaanguna kubala cibalo cakuti, “Ncinzi Ncondikonzya Kucita Kutegwa Bazyali Bangu Kabandisyoma?”

Pele ino mbuti kuti kamujisi mpuwo mbotu? Amulibambile nzyomuyanda kubaambila bazyali banu. Kucita boobo cilamugwasya kuzyiba naa ncomuyanda kulomba cili kabotu naa pe. Mpoonya, amubalombe bazyali banu kuti bamwaambile ciindi abusena nkomukonzya kwaanguluka kubandika. Lino mwatalika kubandika, amuyeeye twaambo ootu tutobela:

Amubalemeke. Bbaibbele lyaamba kuti: “Majwi mabi alanyemya.” (Tusimpi 15:1) Aboobo mutakalubi kaambo aaka: Kukazyanya abazyali banu naa kubatamikizya kuti tabali kabotu, kulakonzya kunyonganya mubandi.

“Akaambo kakuti ndilabalemeka kapati bazyali bangu, abalo balandilemeka. Aboobo eeci cilatugwasya kuzuminana ciindi notubandika.”​—Bianca, uujisi myaka iili 19.

Amubaswiilile. Bbaibbele litwaambila “kufwambaana kuswiilila, kumuka kwaambaula.” (Jakobo 1:​19) Mutalubi kuti mubandika abazyali banu, aboobo mweelede kubaswiilila kutali kubaambila cakucita.

“Ciindi notwakomena, tulimvwa kuti tuzyi zinji kwiinda bazyali besu. Pele aaya taali masimpe pe. Mubwini, tweelede kuswiilila lulayo lwabazyali besu.”​—Devan, uujisi myaka iili 20.

Amubamvwisye. Amusolekesye kumvwisya mbobayeeya bazyali banu. Kutegwa mucite boobo, amutobele lulayo lwamu Bbaibbele ‘lwakutabikkila buyo maano kuzintu nzyomuyanda nywebo zilikke, pele akuzintu nzyobayanda bamwi,’ nkokuti bazyali banu.​—Bafilipi 2:4.

“Ibazyali bangu ndakali kubabona mbuli basinkondoma ikutali mbuli beenzuma. Pele lino nondimvwisya kuti bakali kusolekesya buyo kuba bazyali bali kabotu. Kulubazu lumwi, andime ndakali kwiiya mbondakali kuyoopona ndaakukomena. Nzyobakandicitila zitondezya kuti balandiyanda.”​—Joshua, uujisi myaka iili 21.

Amubakkazike moyo. Mucikozyanyo, atwaambe kuti bazyali banu bamubikkila mulawo wakuti: Tamweelede kweenzya moota kwawoola kuunka kupobwe. Amubabuzye ncobamukasizya. Sena nkaambo kakuti tamukonzyi kweenzya musinzo mulamfwu naa ndipobwe?

• Naa nkweenzya musinzo mulamfwu, sena inga bamuzumizya kuti mwajana muntu uumbi uucizyi kweenzya wakuunka limwi?

• Naa ndipobwe, sena inga bamuzumizya ikuti bazyiba ibayoojanika alimwi abayakweendelezya pobwe eelyo?

Mutalubi kubalemeka muŋambawido yanu ambomulilemeka, alimwi amubaswiilile nobaambaula. Eeci cileendelana alulayo lwamu Bbaibbele ‘lwakulemeka bauso abanyoko.’ (Baefeso 6:​2, 3) Sena eeci caamba kuti bayoocinca mizeezo yabo? Kufwumbwa mbocikonzya kuba . . .

Mutaleki kubalemeka, amukuzumine kusala kwabo. Eeci cilakonzya kumukatazya kutobela, pele cilayandika kapati. Ikuti naa tiibakuzumina kulomba kwanu aciindi eeco mpoonya mwatalika kukazyanya ambabo, mwaakulomba ciindi citobela, tabakazumini. Pele kuti naa mwalibombya akutobela ncobaamba, mukuya kwaciindi bayoomwaangulula kumilawo imwi.