Nkaambo Nzi Bakamboni ba Jehova Ncobatazumini Kubikkwa Bulowa?
Zyintu zyakubeja nzyobasyoma bantu
Makani aakubeja: Bakamboni ba Jehova tabasyomi kuti bamadokota balakonzya kubagwasya aboobo tabaunki kukusilikwa.
Makani aamasimpe: Swebo amikwasyi yesu tulabikkila maano kuyandaula busilisi bubotu. Iciindi notwaciswa, tulaunka kumadokota ibalaaluzyibo mubusilisi amukwaandula bantu kakunyina kubelesya bulowa. Tulalumba kujatikizya lusumpuko lwacitwa mumakani abusilisi. Masimpe ngakuti busilisi bupegwa kakunyina kubelesya bulowa ibwakabambilwa Bakamboni ibaciswa, lino bulabelesyegwa kugwasya bantu boonse. Muzisi zinji, mulwazi uuli woonse ulakonzya kusala kutabikkwa bulowa akweeleba ntenda ziboola akaambo kakubikkwa bulowa, mbuli malwazi aboola akaambo kakubikkwa bulowa, ikunyonganizyigwa kwamaseelo aakwabilila mubili alimwi akulubizya kwabasilisi.
Makani aakubeja: Bakamboni ba Jehova basyoma kuti lusyomo lulakonzya kuponya bulwazi bwamuntu.
Makani aamasimpe: Tatubelesyi lusyomo mukusilikwa.
Makani aakubeja: Kukaka kubikkwa bulowa ciladula kapati.a
Makani aamasimpe: Busilisi bucitwa kakunyina kubelesya bulowa tabuyandiki mali manji kapati.
Makani aakubeja: Bakamboni banji, kubikkilizya abana balafwa mwaka amwaka akaambo kakukaka kubikkwa bulowa.
Makani aamasimpe: Makani aaya anyina bumboni buli boonse. Bamadokota balasilika kwiinda mukwaandula moyo, kwaandula mumafwuwa, alimwi akucinca zizo zimwi kakunyina kubelesya bulowa.b Balwazi, kubikkilizya abana, ibatabikkwi bulowa balaba kabotu mbubwenya mbuli baabo ibabikkwa bulowa nokuba kubainda buya.c Kufwumbwa mbocibede, kunyina uukonzya kuzyiba naa mulwazi ulafwa akaambo kakukaka kubikkwa bulowa naa kuti ulapona akaambo kakuti wazumina.
Nkaambo nzi Bakamboni ba Jehova ncobatazumini kubikkwa bulowa?
Aaya makani ajatikizya nzyobasyoma ikutali busilisi. Cizuminano Cakale alimwi a Cizuminano Cipya zyoonse zitulailila kutantamuka bulowa. (Matalikilo 9:4; Levitiko 17:10; Deuteronomo 12:23; Milimo 15:28, 29) Leza ubona kuti mubulowa momuli buumi. (Levitiko 17:14) Aboobo tulabutantamuka bulowa ikutali buyo akaambo kakumvwida Leza, pele akaambo kakuti tulamulemeka mbwali Sikutupa buumi.
Ikucinca mizeezo
Kwaandulwa kukatazya kapati kulakonzya kucitwa kakunyina kubikkwa bulowa
Aciindi cimwi, bamadokota bakali kubona busilisi bwakutabelesya bulowa kuti bwakali cintu citali kabotu alimwi kuti bwakali kukonzya kupa kuti muntu afwe, pele mumyaka misyoonto yainda zyintu zyacinca. Mucikozyanyo, mu 2004, cibalo icakalembwa mubbuku lyaamba zyabusilisi cakaamba kuti “nzila zinji zibelesyegwa mukusilika Bakamboni ba Jehova zilaba nenzila zinoobelesyegwa mumyaka iili kumbele.”d Mumwaka wa 2010, cibalo cimwi mumagazini itegwa Heart, Lung and Circulation cakaamba kuti: “‘busilisi bwakutabelesya bulowa’ tabweelede kubelesyegwa buyo kuli Bakamboni ba Jehova pele bweelede kuba cibeela ciyandika mubusilisi bwabuzuba abuzuba.”
Lino bamadokota banji nyika yoonse babelesya nzila yakubambilila bulowa mukwaandula baciswa kakunyina kubabikka bulowa. Nzila zili boobu izyakutabelesya bulowa mubusilisi zilabelesyegwa nomuba muzisi zisumpukide alimwi nobaba balwazi batali Bakamboni ba Jehova balalomba kuti basilikwe kwiinda mukubelesya nzila eezyi.
a Amubone mabbuku aakuti The Journal of Thoracic and Cardiovascular Surgery, Volume 134, No. 2, pp. 287-288; Texas Heart Institute Journal, Volume 38, No. 5, p. 563; Basics of Blood Management, p. 2; alimwi alyakuti Continuing Education in Anaesthesia, Critical Care & Pain, Volume 4, No. 2, p. 39.
b Amubone bbuku lyakuti The Journal of Thoracic and Cardiovascular Surgery, Volume 89, No. 6, p. 918; alimwi alyakuti Heart, Lung and Circulation, Volume 19, No. p. 658.
c Amubone bbuku lyakuti Transfusion and Apheresis Science, Volume 33, No. 3, p. 349.
d Continuing Education in Anaesthesia, Critical Care & Pain, Volume 4, No. 2, apeeji 39.