Ino Pobwe Lya Halloween Lyakatalika Buti?
Bwiinguzi bwamu Bbaibbele
Bbaibbele kunyina mpolyaamba kujatikizya pobwe lya Halloween, lyalo bantu ndyobasekelela mwaka amwaka mu October 31. Nokuba boobo, mbolyakatalika alimwi azilengwa zyandilyo tazyeendelani anjiisyo zyamu Bbaibbele.
Mucibalo eeci
Matalikilo aa pobwe lya Halloween azilengwa zyandilyo
Samhain: Bbuku limwi lyaamba kuti Halloween yakatalikila “kumapobwe aakaindi alo aakali kucitwa abantu batakombi Leza bamukakamu kategwa Celtic myaka iinda ku 2,000 yainda. Bantu aaba bakali kusyoma kuti aciindi capobwe bafwide bakali kweendeenda akati kabantu baumi. Aciindi eeci cakusekelela Samhain, bantu baumi bakali kwiizya abantu bafwide.”—Amubone cibeela cakuti “Nkaambo Nzi Pobwe Eeli Ncoliitwa Kuti Halloween?”
Zyakusama, maswiiti alimwi abucenjezu ciindi ca Halloween: Kweelana abbuku limwi, bantu bamwi ibazulilwa mukakamu kategwa Celtic bakali kusama basyaamankwamu kutegwa myuuya mibi ibayeeyele kuti bali antoomwe alimwi akuti itabanyonganyi. Bamwi bakali kwiipa maswiiti myuuya kutegwa baikkomanisye.a
Basololi baba Katolika ku Europe bakatalisya zilengwa zitali kabotu kumane bakali kwaambila basicikombelo kuti kabaunka kuŋanda aŋanda kumwi kabasamide basyaamankwamu akulombelela zipego.
Zyeelo, ikusanduka kuba umpe abulozi: Kuzwa kaindi zintu eezyi zibelekela antoomwe amyuuya mibi. Kupandulula mbozyeendelezyegwa amizimu zintu eezyi, bbuku litegwa Halloween Trivia lyaamba kuti, “ziliswaangene alufwu, bantu bafwide naa kuyoowa kufwa.”
Mapusi aa Halloween: Ku Britain, basicikombelo “bakali kuunka kuŋanda aŋanda akuyaabwaambila bantu kuti inga babapailila bafwide ikuti naa babapa zyakulya” alimwi bakali kunyamuna “zintu zili mbuli tunkuli mwalo mobakali kubikka nkendulu mukati, kumane eeci cakali kwiiminina muuya wasinkilwa mubusena bwamyuuya yabantu bafwide ibwiitwa kuti purgatory.” (Halloween—From Pagan Ritual to Party Night) Bamwi baamba kuti malambe akali kubelesyegwa kutanda myuuya mibi. Mumyaka yakuma 1800, ku North America bakacileka kubelesya zintu zyakali mbuli tunkuli mpoonya akutalika kubelesya mapusi akaambo kakuti akali manji alimwi cakali cuuba-uba kugusya zyamukati akwaabambulula kabotu.
Sena cilagwasya kuzyiba matalikilo aa Halloween?
Inzya. Bantu bamwi bayeeya kuti kusekelela pobwe lya Halloween nkulikkomanisya buyo kwalo kutakonzyi kubikka bamwi muntenda. Pele zintu nzyobacita bantu nobasekelela pobwe eeli tazyeendelani ancolyaamba Bbaibbele. Kunze lyaboobo, pobwe eeli liyeeme anjiisyo zyakubeja kujatikizya bantu bafwide alimwi amyuuya iitalibonyi naa madaimona.
Amubone tupango tutobela mbotutondezya Leza mbwaabona makani aajatikizya Halloween:
“Takweelede kujanwa akati kanu muntu . . . uubuzya makani kubaŋanga, simaloto naa muntu uubuzya makani kubafwu.”—Deuteronomo 18:10-12.
Bupanduluzi: Leza tayandi kuti bantu kababuzya makani kubafwu naa kusola kucita mbuli kuti tuyanda kubuzya baabo bakafwa.
“Bafwide tabazyi cintu nociba comwe.”—Mukambausi 9:5.
Bupanduluzi: Mbwaanga bafwide kunyina ncobazyi, tabakonzyi kubandika abantu.
‘Mutanooyanzani amadaimona. Tamukonzyi kunoonywida munkapu ya Jehova amunkapu yamadaimona.’—1 Bakorinto 10:20, 21.
Bupanduluzi: Aabo bayanda kukkomaninwa a Leza tabeelede kujatikizyigwa amadaimona munzila iili yoonse.
‘Amwiime nji nomukazya bucenjezu bwa Diabolosi; nkaambo tujisi nkondo yakutingana amyuuya mibi.’—Baefeso 6:11, 12.
Bupanduluzi: Banakristo beelede kwiikazya myuuya mibi alimwi tabeelede kucita mbuli kuti balasekelela anjiyo ciindi camapobwe.
a Amubone bbuku lyakuti Halloween: An American Holiday, an American History, peeji 4.