BAKUBUSI BALABUZYA
Ncilongwe naa Nkuyandana?—Cibeela 2: Ino Nzitondezyo Nzi Nzyondituma?
Mulayanda kubandika ciindi mulongwe nayanda kubandika. Caino-ino mwali kubandika kapati amulongwe umwi. Penzi ndyakuti, muntu ngomwiindene limwi zizo. Mwalyaambauzya mumoyo kamuti ‘tuli balongwe buyo,’ kamuyeeya kuti ooyo muntu mbwalimvwa awalo. Sena mweelede kulibilika?
Icikonzya kucitika
Tacilubide kuba abalongwe mbomwiindene limwi zizo. Pele ino mbuti kuti mwaba acilongwe cilibedelede amuntu umwi kwiinda boonse? Kuti caba boobo, muntu ooyo ulakonzya kuyeeya kuti tamuyandi kuba buyo balongwe.
Sena ooyu ngomulumbe ngondiyanda kutuma? Amulange-lange mbocikonzya kucitika, noliba leelyo nomutalibambilide.
Muntu umwi mulamubikkila maano kapati.
“Nokuba kuti tamukonzyi kweendelezya mbwalimvwa muntu umwi, tamweelede kwaamba kuti tuli balongwe buyo pele kakuli mulabandika amuntu ooyo ciindi coonse.”—Sierra.
Mulatondezya kuti mulakukkomanina kubikkilwa maano amuntu umwi.
Tandili ndime ndakatalisya kutuminana tugwalo, pele lyoonse ndakali kwiingula kutugwalo ntwaakali kunditumina musimbi umwi. Kuzwa waawo, cakali kundiyumina kumupandulwida kuti ndakali kumubona kuti mulongwe buyo.”—Richard.
Mukulwaizya kuti umwi kamubikkila maano.
“Bantu bamwi bayeeya kuti kupa muntu muzeezo wakuti mulamuyanda ncisobano. Basobanya mbwalimvwa muntu kakunyina makanze aasinizyide kujatikizya kukwatana. Ndakacibona kacicitika ziindi zinji, alimwi kanji-kanji muntu umwi cilamucisa.”—Tamara.
Makani aamasimpe: Kubandika lyoonse alimwi akumubikkila kapati maano muntu umwi ncitondezyo cakuti mujisi makanze aakumuyanda.
Kaambo ncocitayandiki
Cilamucisa muntu umwi.
Bbaibbele lyaamba kuti: “Bulangizi busumpizyigwa bulacisizya moyo.” (Tusimpi 13:12) Ino mbulangizi nzi mbomukonzya kuba ambubo ikuti muntu umwi lyoonse kamutumina zitondezyo zyakuti ulamuyanda?
“Kuli kaambyo kakuti, ‘Mucenge ŋombe mucete atakooni.’ Kaamba kusyomezya muntu cintu cimwi kakuli tamulibambilide kumupa. Eeco cilakonzya kucitika mucilongwe. Ikuti tamuyandi kweebana pele mulazumanana kumutondezya kuti mulamuyanda, muntu ooyo inga mwamucisizya moyo.”—Jessica.
Cinyonganya mpuwo yanu.
Bbaibbele lyaamba kuti: “Mutabikkili buyo maano kuzintu nzyomuyanda nywebo zilikke, pele akuzintu nzyobayanda bamwi.” (Bafilipi 2:4) Ino nkampenda nzi nkomukonzya kwaamba kujatikizya muntu uubikkila buyo maano kuzintu nzyayanda mwini? Ino eeco inga caijatikizya buti mpuwo yamuntu?
“Musankwa uupa basimbi muzeezo wakuti ulabayanda mebo tandikwelelezyi pe. Alimwi kupa muntu muzeezo wakuti mulamuyanda pele kakutali mbubo, ncitondezyo cakuti tamunoosyomeki mucikwati. Ooko nkubelesya muntu kuti mulikkomanisye, alimwi kucita boobo nkuliyanda.”—Julia.
Masimpe ngakuti: Bantu ibalitondezya kuti balamuyanda muntu kakuli tabamwaambili makanze aabo bacisizya bamwi moyo alimwi abalo buya kubagama.
Ncomukonzya kucita
Bbaibbele lyaamba kuti tweelede kubona “balombwana mbuli banabokwanu, bamakaintu bapati mbuli banyoko, basimbi mbuli bacizyi bako amoyo uusalala.” (1 Timoteyo 5:1, 2) Kuti mwakakatila kuceelelo eeco, muyookwabilila zilongwe zyanu abantu mbomwiindene limwi zizo.
“Ikuti nindalikwetwe, tandikonzyi kupa muntu uukwete muzeezo wakuti ndilamuyanda. Ncintu cibotu kulindime lino nenditanakwatwa kubalanga munzila yeelede bantu mbondiindene limwi zizo.”—Leah.
Bbaibbele lyaamba kuti: “Mukuvwula kwamajwi takubuli kulubizya.” (Tusimpi 10:19) Njiisyo eeyo ilabeleka kutali buyo kumibandi pele alimwi akukutuminana tugwalo—cilabikkilizya akuvwula kwaziindi alimwi amakani aali mumibandi wanu.
“Kunyina kaambo kukutumina musimbi tugwalo abuzuba ccita kuti kakuli makanze aakweebana anguwe.”—Brian.
Bbaibbele lyaamba kuti: “Pele busongo buzwa kujulu ikusaanguna bulasalala.” (Jakobo 3:17) Kukumbata kulakonzya kucitwa munzila iisalala—naa ambweni kulakonzya kubonwa kuti ncitondezyo cakuti mulamuyanda muntu.
“Ndilasoleka kubandika cabulongwe pele kutali cakumaninina.”—Maria
Makani aamasimpe: Cakulomya amulilange-lange mbomucita zintu abantu mbomwiindene limwi zizo. Mukubusi umwi wazina lyakuti Jennifer wakaamba kuti: “Kujana balongwe bali kabotu tacili cuuba-uba, alimwi inga tiimwayanda kunyonganya zilongwe zibotu kwiinda mukutuma zitondezyo izitali kabotu.”
Nzila
Kamubikkila maano kuli nzyobaamba bamwi. Ikuti muntu umwi waamba kuti, “Sena nywebo abaccite mulisyabene?” ambweni babona mbomumvwana kapati amuntu ooyo.
Kamweelanya mbomumvwana abantu mbomwiindene limwi zizo. Mutani kubikkili kapati maano muntu omwe kwiinda bamwi.
Amutucenjelele tugwalo twaafooni—kubikkilizya aziindi nomutuma, nzyomulemba, alimwi aciindi ncomutuma. Musimbi wazyina lya Alyssa waamba kuti “Tamweelede kutumina muntu ngomwiindene limwi zizo tugwalo akati aamasiku.”