Ino Mukaintu wa Kaini Wakali Ni?

Bwiinguzi bwamu Bbaibbele

Kaini, mwana mutaanzi kubanabukwetene bakusaanguna, wakakwata mucizyi wakwe naa bbululu wakwe. Mulakonzya kwaamvwisya makani aaya kwiinda mukulanga-langa ncolyaamba Bbaibbele kujatikizya Kaini alimwi amukwasyi wakwe.

Makani aamasimpe kujatikizya Kaini amukwasyi wakwe

• Bantu boonse mbaluzubo lwa Adamu a Eva. Leza “kuzwa kumuntu omwe [Adamu] wakalenga bantu ibali muzisi zyoonse kuti bakkale munyika yoonse.” (Milimo 17:26) Mukaintu wa Adamu, Eva, wakaba “banyina babantu boonse baumi.” (Matalikilo 3:20) Aboobo, kweelede kuti Kaini wakakwata siluzubonyina wa Adamu a Eva.

• Kaini amunyina Abelo mbobakali bakusaanguna kuzyalwa akati kabana banji ba Eva. (Matalikilo 4:1, 2) Ciindi Kaini naakatandwa akaambo kakujaya munyina, wakatongooka akwaamba kuti: “Kufwumbwa uyoondijana masimpe uyoondijaya.” (Matalikilo 4:14) Ino Kaini wakali kuyoowa bani? Bbaibbele lyaamba kuti Adamu “wakazyala bana basankwa abasimbi.” (Matalikilo 5:4) Cilalibonya kuti baluzubo lwa Adamu a Eva bambi bakali kukonzya kumujaya Kaini.

• Kaindi, bantu bakali kukwatana mucibbululu. Mucikozyanyo, mwaalumi uusyomeka Abrahamu, wakakwata mucizyi wakwe. (Matalikilo 20:12) Mulawo wakukasya kukwatana mucibbululu wakalembwa mu Mulawo wa Musa, pele wakatalika kubeleka myaka minji kuzwa ciindi ncaakali kupona Kaini. (Levitiko 18:9, 12, 13) Kulibonya kuti bana ibakali kuzyalwa mucibbululu kuciindi eeco tiibakali kuvwula kulemana mbuli mazuba aano.

• Bbaibbele lilaamba makani aakaindi aaluzi kujatikizya Adamu, Eva, alimwi amukwasyi wabo. Mulongo wamazyalani kuzwa kuli Adamu kusikila kuli Jesu taujaniki buyo mubbuku lya Matalikilo, ilyakalembwa a Musa, pele ulajanika amubbuku lya Ezara alimwi a Luka. (Matalikilo 5:3-5; 1 Makani 1:1-4; Luka 3:38) Balembi ba Bbaibbele bamwi abalo balamba kuti makani aa Kaini akacitika ncobeni.​—Bahebrayo 11:4; 1 Johane 3:12; Juda 11.