“Ndakajisi Mibuzyo Minji”

MBONDAKABEDE KAINDI

Ndakazyalilwa ku La Ceiba, Honduras. Ndendime muniini alimwi musankwa alikke akati kabana bali 5. Alimwi ndili syaataambi. Mebo amukwasyi wangu twakali kukkala mucilawo ciyoosya, alimwi twakali bacete. Zintu zyakaindila kubija ciindi bataata nobakafwa muntenda kumulimo, nondakali amyaka iili 4.

Bamaama bakali kusolekesya kutulanganya mebo abacizyi bangu, pele tiibakajisi mali aakunduulila zisani. Ikuti mvwula yawa, kanji-kanji mpeyo yakali kundinjila akaambo kakuti tiindakajisi zisani zikasaala.

Mbondakali kuyaabukomena, ndakaiya Mwaambo Wakutambaika Waku Honduras (LESHO), calo cakandigwasya kuti katwaambaula abasyaataambi bamwi. Pele bamaama alimwi abacizyi bangu tiibakauzyi mwaambo ooyu, aboobo kuli mbobakali kutambaika kutegwa baambaule andime. Nokuba boobo, bamaama bakali kundiyanda kapati alimwi akundikwabilila kuzintu zibi. Kwiinda mukubelesya mwaambo wakutambaika ngobakazyi, bakali kundicenjezya kuti ndeelede kuzitantamuka zintu zibi mbuli kufweba alimwi akunywa bukoko. Akaambo kaceeci, ndilikkomene kuti ndakakomena kakunyina kujatikizyigwa azintu eezyi.

Nondakacili mwana, bamaama bakali kunditola ku Cikombelo ca Katolika, pele tiindakali kumvwa cili coonse nkaambo kunyina wakali kusandulula mumwaambo wakutambaika. Ndakali kulendelelwa cakuti ndakacileka kuya kucikombelo nondakajisi myaka iili 10. Nokuba boobo, ndakali kuyanda kuzyiba zinji kujatikizya Leza.

Mu 1999, nondakajisi myaka iili 23, ndakaswaana mukaintu wakali kuzwa ku United States iwakali kuzulilwa kucikombelo cabavangeli. Wakali kundiyiisya Bbaibbele alimwi akundiyiisya Mwaambo Wakutambaika Waku America. Ndakazikkomanina nzyondakali kwiiya kuzwa mu Bbaibbele cakuti ndakaba amakanze aakuba pasita. Aboobo, ndakaunka ku Puerto Rico kuyoonjila cikolo ca Banakristo basyaataambi. Ciindi nondakapiluka ku La Ceiba mu 2002, ndakalipangila cikombelo cabasyaataambi kwiinda mukugwasyigwa abalongwe bangu. Umwi wabalongwe aaba, ba Patricia, bakazyikuba bakaintu bangu.

Mbuli musololi wacikombelo, ndakali kukambauka mumwaambo wakutambaika waku Honduras, kutondezya zifwanikiso zyaamba makani aamu Bbaibbele, alimwi akucita zisobano kutegwa ndibagwasye basyaataambi kumvwisya. Alimwi ndakali kubaswaya basyaataambi ibakali kukkala afwaafwi adolopo lyesu kutegwa ndibakulwaizye alimwi akubagwasya mumapenzi aabo. Mane buya ndakapanga lweendo lwabumisyinali kuya ku United States alimwi aku Zambia. Pele mubwini, tiindakazyi zinji kujatikizya Bbaibbele. Ndakali kubayiisya buyo nzyondakayiisyigwa alimwi anzyondakazyi kujatikizya zifwanikiso. Kwaamba masimpe, ndakajisi mibuzyo minji.

Bumwi buzuba, basicikombeloma bakatalika kwaamba makani aakubeja kujatikizya ndime. Bakaamba kuti ndakali cakolwa akuti tiindakali kusyomeka kubakaintu bangu. Ndakatyompwa kapati alimwi akunyema. Tiilyakalampa mebo abakaintu bangu twakazwa mucikombelo.

BBAIBBELE MBOLYAKANDICINCA

Kanji-kanji Bakamboni ba Jehova bakali kutuswaya, pele tiitwakali kubaswiilila pe. Nokuba boobo, ciindi notwakazwa mucikombelo cesu, bakaintu bangu bakazumina kwiiya Bbaibbele abanabukwetene Bakamboni, ba Thomas alimwi aba Liccy. Ndakakkomana kapati kuti bakaluuzyi mwaambo wakutambaika, nokuba kuti bakali kwaambaula. Aboobo tiilyakalampa ndakabasangana bakaintu bangu kwiiya Bbaibbele.

Kwamyezi iili mbwiibede twakali kwiiya kwiinda mukubelesya mavidiyo aamu Mwaambo Wakutambaika Waku America. Pele ciindi balongwe besu bamwi nobakatamikizya Bakamboni ba Jehova kuti bakali basikutobela bantu, twakacileka kwiiya Bbaibbele. Nokuba kuti ba Thomas bakanditondezya bumboni bwakuti tabatobeli bantu, tiindakabasyoma pe.

Nokwakainda myezi, ciindi bakaintu bangu nobakatyompwa kapati, bakapaila kuli Leza kutegwa abapilusye Bakamboni ba Jehova. Kalitanalampa, simukoboma iwakali umwi wa Bakamboni ba Jehova wakabaswaya bakaintu bangu mpoonya bakamulomba kuti akabaambile ba Liccy kuti bakabaswaye. Ba Liccy bakali balongwe beni-beni. Bakali kubaswaya bakaintu bangu nsondo ansondo kubakulwaizya alimwi akubayiisya Bbaibbele. Nokuba boobo, ndakacili kubadooneka Bakamboni.

Mu 2012, Bakamboni ba Jehova bakatola lubazu mumulimo waalubazu wakutondezya akwaabila kavidiyo kamumwaambo wakutambaika waku Honduras kakuti, Would You Like to Know the Truth? Ba Liccy bakatuletela andiswe kavidiyo. Ciindi nondakakeebelela, ndakagambwa kwiiya kuti zintu nzyondakali kuyiisya mbuli mulilo wahelo alimwi akuti kuli cintu cizumanana kupona muntu afwa, tazijaniki mu Bbaibbele.

Nsondo yakatobela, ndakaunka ku Ŋanda ya Bwami ya Bakamboni ba Jehova kuyoobandika aba Thomas. Ndakabaambila kuti ndiyanda kuyiisya basyaataambi kasimpe kamu Bbaibbele, pele kanditali umwi wa Bakamboni ba Jehova. Muzeezo wangu wakali wakuti ndipange cikombelo cimwi cabasyaataambi. Ba Thomas bakandilumba akaambo kabusungu bwangu, pele bakanditondezya lugwalo lwa Baefeso 4:5, lwalo lwaamba mbociyandika kukamantana ambungano ya Banakristo bakasimpe.

Ba Thomas alimwi bakanditondezya vidiyo yakuti Jehovah’s Witnesses—Faith in Action, Part 1: Out of Darkness mu Mwaambo Wakutambaika Waku America. Vidiyo eeyi itondezya kabunga kabaalumi mbobakalilanga-langa Bbaibbele cakubikkila maano kutegwa bakamvwisye kasimpe kanjiisyo zili mumo. Ciindi nondakali kweebelela vidiyo, ndakali kumvwisya mbobakalimvwide baalumi aabo. Mbubonya mbuli mbabo, ndakali kuyanda kuzyiba kasimpe. Vidiyo eeyi yakandipa kusyoma kuti Bakamboni bayiisya kasimpe nkaambo nzyobasyoma zizwa mu Bbaibbele. Aboobo ndakatalika alimwi kwiiya Bbaibbele, mpoonya mu 2014, mebo abakaintu bangu twakabbapatizyigwa akuba Bakamboni ba Jehova.

MBONDAGWASYIGWA

Ndilaiyanda mbunga ya Bakamboni ba Jehova akaambo kakuti ilasalala, mbubonya Leza mbwasalala. Bakamboni mbakombi basalala muzintu nzyobaamba alimwi ambobacita zintu abamwi. Mbaasiluumuno alimwi balakulwaizyanya umwi amweenzinyina. Bakamboni balikamantene alimwi boonse bayiisya cintu comwe tacikwe makani ankobabede naa mwaambo ngobaambaula.

Ndilikkomene akaambo kakwiiya cini Bbaibbele ncoliyiisya. Mucikozyanyo, ndakaiya kuti Jehova ngu Leza Singuzuzyoonse, alimwi Mweendelezi wanyika yoonse. Ulabayanda basyaataambi alimwi abaabo bamvwa. Ndilamuyanda Leza akaambo kakuti ulandiyanda. Alimwi ndakaiya kuti nyika iyooba paradaiso mbotu alimwi akuti ndilijisi coolwe cakupona buumi butamani. Eelo kaka ndilabulangila buzuba zintu eezyi noziyoocitika!

Mebo abakaintu bangu tulakukkomanina kubandika abasyaataambi bamwi kujatikizya Bbaibbele. Lino tulasololela ziiyo zya Bbaibbele kubantu bamwi bakucikombelo ncotwakali kunjila kaindi. Pele tandicijisi mibuzyo kujatikizya nzyondiyiisya, mbuli mbocakabede ciindi nondakali musololi wacikombelo. Ndilikkomene kuti ndakabujana bwiinguzi kumibuzyo yangu kwiinda mukwiiya Bbaibbele a Bakamboni ba Jehova.