Kugwasyilizya Kumwaya Kasimpe Kamu Bbaibbele

Nokuba boobo, bataata nobakazumanana kundilomba kuti nditalike kwiiya Bbaibbele, ndakazumina. Ndakakkomana kapati kubona Bbaibbele mboliluzi nolyaamba makani aasayaansi. Mukuya kwaciindi, ndakasinizya kuti Bbaibbele ndi Jwi lya Leza akuti Bakamboni ba Jehova balalibelesya kuyiisya munzila iiluzi alimwi balapona kweelana azyeelelo zyandilyo. Twakabbapatizyigwa buzuba bomwe abataata mu 1970. Mpoonya bamaama abanabokwesu basimbi bobilo bakabbapatizyigwa mumyaka yakatobela kumbele.

Bunji bwabeenzuma bakali kukkomanina buyo mapobwe akulikondelezya. Kwaamba masimpe, nondakkwanya amyaka iili 17, ndakatalika kubunyomenena buumi mbobakali kupona. Pele Bakamboni ibakali kundiyiisya Bbaibbele bakalikkomene alimwi bakalikkutilide mubuumi bwabo bwamulimo waciindi coonse cakuti andime ndakali kuyanda kubasangana. Nondakakkwanya myaka iili 21 ndakacita oobo.

Mulimo wabupainiya wakandipa kuba alukkomano lunji cakuti ndakausa kuti ndakamuka kutalika. Ndakali kukukkomanina kukambaukila kucito ca Göteborg, nkaambo ndakali kukonzya kukambaukila bantu banji bakali kuboola amato babelesya myaambo yakucisi cimbi.

Kwamyaka iili 50 yainda, ndalijisi coolwe caalubazu cakugwasya kumwaya makani mabotu kubantu baambaula myaambo iindene-indene. Lino andimulwiide mbocakabede.

Kubelekela Mudipatimenti ya MEPS

Kutegwa kandiligwasyilizya mumulimo wabupainiya, ndakali kubeleka mazuba aamwi kubusena kupulintilwa mabbuku. Aciindi eeci, mulimo wakupulinta wakali kuyaabucinca. Muciindi cakubelesya nzila yakubikka kabulo komwe-komwe antoomwe, imabala alimwi azifwanikiso zyakali kulonzyegwa kazili zifwoto. Ndakaiya mboubelesyegwa muncini mupya kubamba ma plate aaunka kuyoopulintwa.

Mu 1980 ndakakwata ba Helene, mupainiya waciindi coonse, balo mbuli ndime ibakali kukukkomanina kuzyibana abantu ibazwa muzilengwa ziindene-indene zyamunyika. Makanze eesu akali aakunjila Cikolo ca Gileadi alimwi akubeleka katuli bamisyinali.

Nokuba boobo, akaambo kaluzyibo ndondakajisi mumakani aakupulinta, mebo abakaintu bangu twakatambwa kuyoobelekela ku Beteli mu Sweden. Mbunga yakali kuyanda kucinca akubelesya tekkinoloji mpya kutegwa mulimo wakupulinta kaweenda cakufwambaana. Aboobo mu 1983, twakatumwa ku Beteli ku Wallkill mu New York kuyootambula lwiiyo lwamboibelesyegwa MEPSa (Multilanguage Electronic Phototypesetting System) nzila mpya njobakali kubamba.

MEPS nipulogilamu yaakkompyuta, yalo iipa kuti mabala kaakonzyeka kulembwa mumapepa manji aaindene-indene naa maalufabbeti, kwaasanganya antoomwe acifwanikiso cibikkidwe, akwaabikka mbwaayelede kukkala mumapeeji. Aboobo mulimo ngotwakajisi wakali wakugwasyilizya kupanga mapepa aamabala mapya kubelesya MEPS, kutegwa mabbuku eesu kaakonzyeka kupulintwa mumyaambo minji. Kuzwa leelyo, nzila eeyi yapa kuti Bakamboni ba Jehova kabamwaya makani mabotu mumyaambo minji kapati!

Mukuya kwaciindi, mebo abakaintu bangu twakatambula mulimo mupya wakuunka ku Asia kuyoogwasyilizya kuyungizya myaambo minji mu MEPS. Twakalilibambilide alimwi twakaliyandide kugwasyilizya mukupa kuti makani mabotu kaajanika mumyaambo minji!

Kuzyibila Cilengwa Ciindene

Mu 1986, mebo abakaintu bangu twakaunka ku India. Ooku twakaakujana cilengwa ciindene kapati acesu! Notwakasika ku Bombay, lino yiitwa kuti Mumbai, twakalibilika kubona zintu nzyotwatakazyibide zyakatuzungulukide. Zilengwa zyaku Sweden azyaku India ziliindene kapati! Munsondo yakusaanguna, twakali kuyeeya buyo kuti tupiluke kuŋanda.

Nokuba boobo, noyakainda nsondo iilya yakusaanguna toonse twakaibaluka kuti: ‘Lyoonse twakali kuyanda kuba bamisyinali. Aboobo mbwaanga lino twapegwa mulimo wakubelekela kucisi cimbi, tatweelede kucileka. Tweelede kucinca kweelana abukkale.’

Aboobo, muciindi cakupiluka, twakasala kuti tusolekesye kusikila mpotugolela kwiiya bukkale oobu bupya. Notwakacita oobo, mebo abakaintu bangu twakatalika kukukkomanina ku India. Amana buya, twakaiya amyaambo yobilo yaku India, nkokuti ci Gujarati aci Punjabi.

Kuunka ku Myanmar

Mu 1988, twakatumwa ku Myanmar, ibusena buli akati ka China, India, alimwi a Thailand. Aciindi eeci kwakali manyongwe aabasimapolitikisi ku Myanmar, alimwi bunji bwamasena aamucisi akali kweendelezyegwa aabasikalumamba. Mabala aamumwaambo wabo taakalinabikkwa mu MEPS, alimwi kunyina software yakali kukonzya kuucita mulimo ooyu. Aboobo mulimo wakusaanguna ngotwakajisi wakali wakupanga mabala mapya aakubelesya mpoonya akwaatola ku Wallkill kutegwa akabikkwe mu MEPS.

Kubbuwa lyandeke, bakaintu bangu bakajisi cifwanikiso camabala mapya mukabbeke kabo. Mbwaanga kwakali manyongwe aciindi eeco, twakali kukonzya kwaangwa kuti naa bakapokola batubona katujisi mabbuku aamumwaambo waci Myanmar. Ciindi bakapokola nobakali kusecca bakaintu bangu, bakanyamuna maanza mujulu kumwi kabakajisi kabbeke kabo. Taaku wakakabona!

Kunze buyo lyamapepa aamabala mapya, basanduluzi baku Myanmar bakapegwa malaputopu, mapulinta, alimwi akuyiisyigwa mboibelesyegwa MEPS. Bunji bwabasanduluzi aaba tiibakalinaibwene kkompyuta, pele bakalilyaabide kutambula lwiiya lupya. Kalitanalampa, bakacileka kusyoma nzila yakaindi yakupulinta yalo yakali kuyandika kubikka tubulo twamabala antoomwe ikubelesya maanza. Eeci cakapa kuti mpoonya-mpoonya kube kuyaambele kujatikizya mbwaakali kupangwa mabbuku eesu.

Kuunka ku Nepal

Mu 1991, Mebo abakaintu bangu twakatumwa kuyoobelekela ku Nepal, icisi cili kumusanza kwamalundu aa Himalayas. Aciindi eeco, kwakali buyo mbungano yomwe mucisi alimwi kwakali buyo mabbuku masyoonto aamumwaambo waci Nepali.

Kalitanalampa, mabbuku manji akasandululwa akumwaigwa mucilawo. Mazuba aano, mu Nepal kuli Bakamboni babalilwa ku 3,000 mumbungano iziinda ku 40 alimwi bantu bainda ku 7,500 bakajanika ku Ciibalusyo calufwu lwa Kristo mu 2022!

Broshuwa yamuci Lahu

Akati-kati kamwaka wa 1990, bamisyinali ibakali kukkala mu dolopo lya Chiang Mai, ku Thailand, bakatalika kukambaukila bantu ibakali kubelesya mwaambo waci Lahu. Ci Lahu mwaambo waambaulwa abantu bakkala muminyinza iizingulukide cisi ca China, nkokuti cisi ca Laos, Myanmar, Thailand, alimwi aca Vietnam. Nokuba boobo, tiitwakajisi mabbuku aamumwaambo ooyu.

Mukubusi umwi iwakali kwiiya abamisyinali wakasandulula broshuwa yakuti “Amubone! Ndalengulula Zintu Zyoonse Kuti Zibe Zipya” kuzwa mumwaambo waci Thai kutola mumwaambo waci Lahu. Kumane walo abantu bamumunzi bamwi baambaula mwaambo waci Lahu bakasangilana mali akutuma broshuwa eeyi alimwi amali aayo kuofesi yamutabi. Mulugwalo ndobakabikkilizya mukati, bakalemba kuti bakali kuyanda kuti bantu boonse baambaula ci Lahu kabacikonzya kukamvwa kasimpe nkobakaiya mubroshuwa eeyi.

Nokwakainda myaka misyoonto, mebo abakaintu bangu twakaba acoolwe cakuyiisya basanduluzi baci Lahu mboibelesyegwa MEPS. Umwi wabasanduluzi wakali mukwesu wakazwide akubbapatizyigwa iwakali kubelekela kuofesi yabasanduluzi ku Chiang Mai. Eelo kaka twakagambwa kapati kuzyiba kuti mukwesu ooyu ngonguwe mukubusi uulya wakasandulude broshuwa ya “Amubone!” muci Lahu!

Mu 1995, mebo abakaintu bangu twakajoka ku India, kwalo nkotwakabeleka abasanduluzi amutabi ikubayiisya MEPS icibelesyo ncobakali kuyandika kutegwa baucite mulimo wabo. Mazuba aano, kuli mabbuku manji aamumyaambo iibelesyegwa ooku alo aagwaasya bantu kwiiya akuyaambele mane kusika antaamu yakubbapatizyigwa.

Buumi Bulaampindu

Mebo abakaintu bangu twabeleka kumutabi waku Britain kuzwa mu 1999. Tulabeleka abamutiimu ya MEPS Programming kumaofesi mapati. Eelo kaka cakali kukkomanisya kapati kubelekela ku London kukambauka mucilawo caci Gujarati aci Punjabi! Kufwumbwa mwaambo mupya wabikkwa a jw.org, inga tulayandaula zyoolwe zyakukambaukila babelesya mwaambo ooyo mucilawo cesu.

Ndilikkomene kuti nkweena kumatalikilo ndakalibikkila mbaakani zyakumuuya muciindi cakuyungwa abeenzuma. Mebo abakaintu bangu twalanga musyule, kunyina notuusa kucakusala cesu cakubeleka mumulimo waciindi coonse. Cakali kukkomanisya kuswaya zisi ziinda ku 30, akulibonena makani mabotu mbwaabasikila bantu kumasi oonse, misyobo alimwi amilaka!​—Ciyubunuzyo 14:6.