Mbaani Bayooswiilila Mulumbe Wesu?
1 Mbuli mbocitaninga citikide mubuponi bwabantu, ibantu basikilwa makani manji aazwide buyo zintu zitayandiki alimwi aleena. Akaambo kaako ibanji balimvwa kuzingwa eelyo cilatuyumina kubacita kuti baswiilile mulumbe uujatikizya Bwami bwa Leza. Tabazi bubotu bunga bwaba kulimbabo kuti baswiilila Jwi lya Leza.—Lk. 11:28.
2 Tulakkomana akaambo kakuti mumasena manji aanyika makumi-makumi azyuulu zyabantu alauswiilila mulumbe oyo alimwi balazumina kubaa zyiiyo zya Bbaibbele zyaaŋanda. Nokuba boobo mumasena amwi kuzumina takuli kunji kapati pe. Ikuswaya kunji nkotucita mumulimo takukwe butebuzi bubotu pe, aboobo tulaezeezya kuti naa mbaani bayooswiilila mulumbe wesu.
3 Tweelede kucenjela kuti tutatyompokelwi pe. Paulo wakapandulula ategwa: “Umwi aumwi uulilila izina lya-Mwami ulafutuka. Pele bamulilile buti . . . ngubatana kumvwa? Alimwi, bamvwe buti nikutakwe sikukambauka? . . . Mbubonya mbukulembedwe kuti, Abota loko maulu aabaabo bakambauka Ivangele lyamakani mabotu.” (Rom. 10:13-15) Ikuti twasungwaala kusyanga mbuto zya Bwami, Leza uyoozimenya mulibaabo balaa myoyo mibombe.—1 Kor. 3:6.
4 Iciyandika Nkucita Nyendo Zyakupilukila Lyoonse: Mumasena mubelekelwa mumwi muboneka kuti bantu mbasyoonto baswiilila mulumbe wesu, tweelede kubikkila maanu kugwasya bayanda kufumbwa mbotwajana naa tusiya mabbuku naa pe. Ino mubindila nzi kwaamba kuti kunyina ciyoocitika? Notusyanga mbuto inga tatuzi kuti naa nzili ziyookomena. (Muk. 11:6) Ikuti twapilukila katulibambilide ikubandika cimwi cintu kuzwa mu Magwalo nokuba kuti nciindi cisyoonto tulakonzya kupa kuti muntu aswiilile. Tulakonzya kusiya katrakiti naa mamagazini mapya. Limwi tulakonzya kutondezya mbocicitwa ciiyo ca Bbaibbele. Tuyoogambwa kubona Jehova mbwalongezya kusoleka kwesu.—Int. 126:5, 6.
5 Imukaintu umwi iwakalitondezya kutayandisisya wakasiilwa katrakiti. Taakajanika kabili aŋanda mane kusikila nokwakainda myezi yobilo pele wakanyina ciindi cakwaambaula nkaambo wakajisi bubi. Wakasiilwa trakiti iikonzyanya alimwi. Nokuba kuti sikumwaya wakasoleka kumuswaya kuŋanda, kwakainda myezi yotatwe nobaya baswaangane, nkuyakwiile kujana mmulwazi. Mucizi wakaakumuswaya alimwi nsondo yakatobela akubandika asyoonto kujatikizya katrakiti. Imucizi naakapilukila nsondo yakatobela, oyu mukaintu wakatondezya luyandisisyo lwini-lwini mumulumbe wa Bwami. Ikucinca kwabukkale bwakwe kwakapa kuti azibe kuti uyandika zintu zyakumuuya. Iciiyo ca Bbaibbele cakatalikwa elyo wakalikwiiya cinoonezya nsondo ansondo kuzwa ceeco ciindi.
6 Mbubwena mbuli zimwi zetuyanda kubona kazikomena, abe maluba, cisyu naa luyandisisyo mumulumbe wa Bwami ikulimina kulayandika. Eeco ciyandika ciindi, kusoleka canguzu, kubikkila maanu alimwi akuliyumya kuti tutatyompwi. Imwaka wakamana ibantu bainda kucibeela catatu cakaulunzuma mwalo imbuto ya Bwami moyakasima bakabbapatizigwa! Ikuti twazumanana kukambauka tuyooba masimpe kuti tuyoojana banji bayooswiilila mulumbe wesu.—Amweezyanisye a Ba-Galatiya 6:9.