Kulisungula Camoyo Woonse
1 Sintembauzyo Davida wakasinsima kuti bantu ba Jehova ‘bayoobungana camoyo woonse.’ (Int. 110:3) Masimpe eci cilazuzikizigwa mukuyanzana kwesu abakwesu anyika yoonse mbwiizulwa. Mumyaka yone yamulimo yainda, imwaka amwaka bantu ba Jehova baaba mawoola aainda kucuulu camamiliyoni ikumwaya makani mabotu aa Bwami. Alimwi kunze kwakukambauka alimwi amulimo wakucita bantu kuti babe basiciiya kuli nzila zinji motunga twalisungula camoyo woonse kugwasya bamwi.
2 Inzila Nzyotunga Twatondezya Kulisungula Kwesu: Bamwi mumbungano balakonzya kabayandika lugwasyo kutegwa baunke kumiswaangano. Sena inga tamulisunguli kubatoleezya? Bamwi inga mbalwazi, kabatajisi nguzu naa kabali mucibbadela. Sena inga tamuliyeeyeli kubaswaya naa kubagwasya munzila imwi? Kulakonzya kakuli umwi muntu naa mukwasyi uuyandika kukulwaizigwa. Sena mwiininga ciyeeyela kubatamba baliboobu kuti mube ambabo muciiyo canu camukwasyi zimwi ziindi? Imupainiya naa sikumwaya inga kayandika wakubeleka limwi mumulimo. Sena inga tamulisunguli kubeleka limwi mumulimo? Eezi nenzila zimwi zyotunga twalisungula kucita milimo mibotu kulibaabo baciinga calusyomo.—Gal. 6:10.
3 Ibakwesu balakonzya kutondezya kuti balilisungude kubelesyegwa mumbunga ya Jehova kwiinda mukusolekesya kusika azyeelelo zya baalu abakutausi. (1 Tim. 3:2-10, 12, 13; Tit. 1:5-9) Mbotuyaa buzumanana kuvwula kulayandika bakwesu beelela ibalisungude kusolola mumulimo wakukambauka akuyiisya alimwi akweembela mbungano.—1 Tim. 3:1.
4 Ambweni tobamwi tulakonzya kwaaba ciindi cilamfu mumulimo wa Jehova kwiinda mukulilembya bupainiya bwakugwasilizya ciindi aciindi. Mpoonya alimwi kwiinda mukucinca-cinca tumwi mumulongo wazintu nzyotweelede kucita, tulakonzya kuzumanana kucita obo nokuba kutalika mulimo wabupainiya bwaciindi coonse. Sena bukkale bwesu bulakonzya kutuzumizya kuti tulonge kuya kubusena kuyandika lugwasyo kapati? Sena inga twalyaaba kuyakubelekela ku Beteli elyo aboobo kubaa lubazu lugaminina mumulimo uuyaambele wanyika yoonse mbwiizulwa? Nzinji zicitwa amwalo mumulimo wakuyaka Maanda aa Bwami, Maanda aa Miswaangano mipati alimwi amitabi nyika yoonse mbwiizulwa kwalo kuyandika ncobeni kulisungula kumilimo. Abo balisungude mumilimo eeyi mibotu balalumbwa kapati alimwi balilongezyedwe!—Lk. 6:38.
5 Eezi ziindi zikkomanisya. Jehova kwiinda mumuuya wakwe wabeleka mulimo mubotu anyika yaansi abantu bakwe balisungude! Kufumbwa Jehova natutamba kwiinda mumbunga yakwe kuti tutole lubazu mukuyungizya mulimo wa Bwami, ncibotu kulibuzya kuti, ‘Sena ndicili sungude camoyo woonse?’ Mpoonya tweelede kulingula moyo wesu abukkale cakusinizya. Ikulyaaba kwesu kwabunaleza kuyootupa kuti tucite mbuli mbotukonzya mumulimo uusalala aboobo tuyoopa kuti moyo wa Jehova ukondwe kapati!—Zef. 3:17.