Amube Basikucita—Kutali Basikuswiilila Buyo
1 Banakristo bakasimpe mazubaano balaatobela malailile aa Bbaibbele aakuti babe basikucita bamakani, ikutali basikuswiilila buyo. (Jak. 1:22) Eci cilabaimpanyaa bantu ibalyaamba kuti Mbanakristo babelekela Leza pele ibaamba buyo kumulomo kakunyina kucita. (Is. 29:13) Jesu wakacisalazya naakati bantu ibacita kuyanda kwa Leza balikke mbabayoofwutuka.—Mt. 7:21.
2 Ibukombi ibunyina milimo yabunaleza bunyina mpindu. (Jak. 2:26) Elyo tweelede kulibuzya kuti, ‘Mbuti milimo yangu mboitondezya kuti lusyomo lwangu ndwakasimpe? Ncinzi citondezya kuti ndilazitobela cini-cini zintu nzyondisyoma? Mbuti mbondinga ndamutobela kabotu Jesu?’ Ibwiinguzi bwakasimpe kumibuzyo eyi buyootugwasya kuziba kuyaambele kwesu nkotwacita naa nkotweelede kucita mukucita kuyanda kwa Leza.
3 Mbotuli basikutobela Jesu, mbaakani yesu yakusaanguna mubuumi yeelede kukozyanya ayeeyo yakaambwaa sintembauzyo kuti: “Buzuba boonse tulalilumbaizya muli-Leza, tulalumba izina lyako lyoonse.” (Int. 44:8) Bunakristo ninzila yakupona iilitondezya buzubaa buzuba alimwi amuzintu zyoonse nzyotucita. Tulakkomana kaka ciindi notutondezya kuyandisisya kutembaula Jehova camoyo woonse muzintu zyoonse nzyotucita!—Flp. 1:11.
4 Ikutembaula Jehova Takuyiili Buyo aa Kubaa Buumi Bululeme: Nokwali kuti Leza uyanda buyo kuti tulilemeke kabotu, naanga twaile kubikkila buyo maanu aakululamika bukkale bwesu. Pele, bukombi bwesu bulajatikizyaa kwaambilizya milimo ya Jehova iitembaulika akucita bukambausi bwaantangalala kuzina lyakwe!—Heb. 13:15; 1 Pet. 2:9.
5 Ikukambauka makani mabotu ikucitwa kubuleya ngumwi wamilimo iiyandika kapati ngotucita. Jesu wakasungwaala mumulimo oyu nkaambo wakalizi kuti ujanya buumi butamani kuli baabo ibakali kuyoomuswiilila. (Joh. 17:3) Mazubaano ‘mulimo wamakani’ uciyandika kapati; nenzila ilikke bantu mobanga bafwutukila. (Inc. 6:4; Rom. 10:13) Akaambo kampindu zibotu nzyouleta mulimo oyu, tulakulwaizigwaa malailile aa Paulo aakuti “[t]ukambauke Makani” alimwi katucita obo “lyoonse.”—2 Tim. 4:2.
6 Ino kutembaula Jehova kweelede kutweendelezya buti mubuumi bwesu? Sintembauzyo wakati lyoonse kwakali mumizeezo yakwe. Sena tatulimvwi mbubonya? Mbotulimvwa, alimwi lyoonse notuswaanganaa muntu uli woonse, tuyanda kubelesya ciindi eco kukanana zyazina lya Jehova. Tuyooyandaula nzila zyeelede zyakucinca mibandi yesu kuba yazintu zyakumuuya. Alimwi tuyoosungwaala kutola lubazu lyoonse mumulimo wamumuunda mbuli mboubambidwe ambungano. Kuli baabo ibakonzya, balakonzya kutelaikaa kucita mulimo wabupainiya nkaambo utugwasya kubikkaa mbele mulimo wakukambauka mubuumi bwesu buzubaa buzuba. Jwi lya Leza litusyomezya kuti kwiinda mukusungwaala kuba basikucita kuyanda kwa Leza, tuyooba bantu bakkomene.—Jak. 1:25.