“Amukazike Myoyo”
1 Mbotuyabubonena kuti mamanino aabweende bwa Saatani bwakaindi alimukuswena, kulayandika kapati kuti ‘tukkazike myoyo’ notucilindila buzuba bwa Jehova bwakunununa. Ikapati ciindi ecino ncotupona, basinkondoma balikanzide kutunyona kutegwa tutabikkili maanu kukaambo kapati kabwami bwa Jehova akutusunka azintu zinji. Munzila eyi, Saatani ulatucenga kutegwa tucileke naa tutolwaale mumulimo wakukambauka makani aa Bwami. (Jak. 5:7, 8; Mt. 24:13, 14) Muunzila nzi nzyotunga twakkazika myoyo?
2 Kwiinda Mukukkazika Camba: Naa twajana bantu batabikkili maanu naa bakazya mumulimo wesu wakukambauka, ikukkazika camba inga kwatugwasya kuzumanana kukambauka. Taakwe notunga twatyompwa kufwambaana naa kunyema kuti bantu mbotwaswaanganya tabakkaziki myoyo naa kutatweendelezya kabotu. (1 Pet. 2:23) Oobu busicamba inga bwatukasya kukanana cakutyompwa kujatikizya bantu bamucilawo ncotupedwe ibatatondezyi kukkomana amulimo wesu, nkaambo kukanana kuli boobu inga kwatutyompya antoomwe abaabo mbotubeleka limwi mumulimo.
3 Kwiinda Mukuzumanana Cakukkazika Moyo: Notwazwaa kukananaa muntu uujisi luyandisisyo, cilatyompya kuti naa tatujani muntu uuyanda kuteelela. Ncimwi buyo kuti aabo mbotuyiisya tabafwambaani kuyaambele naa kutobela kasimpe. Pele kuti naa twazumanana cakukkazika moyo, inga zintu zyalulama. (Gal. 6:9) Umwi mucizi wakacita nyendo zyakupilukila zinji kumukaintu uucili mwana-mwana umwi naya abe aciiyo ca Bbaibbele. Munyendo zyosanwe zyakusaanguna, mukaintu oyu ngwaakali kuunkila wakajisi bubi azintu zimwi. Naakasola ciindi cacisambomwi, ooyu mucizi wakaugwa mvwula yaguwo, pele taakajana muntu aaŋanda. Nokuba boobo, kakanzide kumupa ciindi cimbi mukaintu oyu, mucizi wakaswaya alimwi akumujana mukaintu ulilibambilide kwiiya. Kuzwawaawo ooyu sikwiiya wakayaambele kabotu-kabotu akulyaaba kuli Jehova mukaindi kasyoonto buyo.
4 Tulizi kuti buzuba bwa Jehova tabukamuki. Aboobo tulalindila kubona mbwatizyeendelezye zintu katuzi kuti kukkazika moyo kwakwe Leza kulaleta mpindu. (Hab. 2:3; 2 Pet. 3:9-15) Tweelede kukkazika moyo mbuli mbwacita Jehova tutauleki mulimo. ‘Ikwiinda mulusyomo akubosya moyo,’ amulangile kuti Jehova uyoomulumbula kumulimo wanu ngomubeleka canguzu.—Heb. 6:10-12.