Nobakubusi—Intaamu Zyanu Amuzyeenzye Camaanu
1 Taateesu Jehova ulayanda kuti bana baniini baye ambele munzila yakumuuya. Bakubusi nobatobela milawo yakwe yaluyando cabusongo, tabakkomanisyi buyo moyo wakwe, balalemununwa. (Tus. 27:11; Mt. 11:28-30) Bazumizya Jehova kusololela kabotu ntaamu zyabo.—Tus. 16:9.
2 Kristo Jesu kacili mukubusi wakasiya cikozyanyo cibotu cakukonda Leza abantu. (Lk. 2:52) Bakubusi sunu beelede kusola kucita mboonya obo. Ikweenzya nkwazyeenzya kabotu ntaamu zyakwe mukubusi kweelede kulibonya mumilimo njabelekela zintu zyakumuuya. Naakali amyaka iili 12, Jesu wakalizizilwe kuti wakali muntu uuyandisya kukambaukila bantu zya Jehova. (Lk. 2:46, 47) Bakubusi sunu batondezya luyando ndweenya lwakupandulwida beenzinyina zyalusyomo lwabo.—w90 7/1 pp. 29-30; w87 12/1 p. 21.
3 Ino ncinzi nywebo nobakubusi ncomunga mwacita lino ikapati mumyezi iza kumbele kuti ‘mulemeke Jehova ambono zyanu’? (Tus. 3:9) Ino mbuti nomutayungizyi ciindi ncomubeleka kanjikanji mumulimo wakukambauka akuyiisya makani mabotu ambweni akuba mupainiya wakugwasilizya? Inga mwagambwa kubona lukkomano ndomunga mwabaalo alimwi ampindu nzyomunga mwajana mwabelekesya mumulimo. Eeci alimwi cilamujulila mulyango wakubeleka aabasikumwaya banji baindene-indene mumulimo wamumuunda. Mulakonzya mwatalikila limwi ndilyonya lino kulomba sikumwaya omwe naa bobile ibalaa luzibo kuti babeleke andinywe kumamanino aansondo ino.
4 Bazyali balakonzya kubakulwaizya akubagwasya kapati bana babo kwiinda mukulibambila ambabo makani ngobayoobandika kunze lyakubasindikila mumulimo. Bamwi basimide mumbungano balakonzya babalomba bana baniini kubasindikila mumulimo wamulyango-amulyango alimwi amulweendo lwakupilukila alimwi amumulimo wakucita ziiyo zya Bbaibbele. Ikuyanzana abasikumwaya aaba bayumu munzila yakumuuya kulayumya bana baniini akubagwasya ‘kuya kumbele.’—Heb. 6:1.
5 Munakristo umwi aumwi weelede kuyaambele mukuyiisya kwakwe. Abalo bakubusi mbubonya. Sena nywebo nobana mulalibambila kabotu zibeela nzyomupegwa kucita mu Cikolo Camulimo Wateokrasi? Sena kuli nomubikka ambali lyoonse ciindi cakubala akwiiya alimwi akuzinzibala kuyeeya nzyomwaiya? Sena zintu nzyomwiiya mulazitobela? Sena mulalibambila kabotu miswaangano kutegwa mwaateelele kabotu makani kamulibambilide kwiingula? Sena twaambo tugwasya itwaambwa amuswaangano mulatulemba alimwi akutobela malailile aali mu Mulimo Wesu Wabwami?
6 Mutaindwi coolwe cakutola lubazu mukusalazya Ŋanda ya Bwami alimwi akugwasya bakwesu abacizi bacembeede alimwi ibakompeme mutulimo-limo naa munzila zimwi. Mutalengaani kusanga mali aakugwasilizya kubbadelela ziyandika ku Ŋanda ya Bwami amulimo wa Sosaiti wanyika yoonse mbwiizulwa.
7 Ikuti ‘twabamba nzila yesu mbubonya mbuli ijwi lya Jehova’ mbolitwaambila akumuzumizya kweenzya ntaamu zyesu, ulatugwasya kujana lukkomano azyoolwe zinji zyamulimo.—Int. 119:9.