Sena Mulalonga?
Ikuti naa mubuzyo oyo mwawiingula kuti inzya, nzinji zintu nzyomweelede kucita nywebo abantu bambi. Muyoofwambaana kukkalikila mumbungano yanu mpya ikuti naa mwatobela ntaamu ezi zyalembwa ansi awa.
(1) Ikuti naa mwakuziba kale nkomulongela, imulembi wamumbungano momubede uyookonzya kubweza kkeyala ya Ŋanda ya Bwami ikuli mbungano yanu mpya. Mwasika buyo kubusena obo, amufwambaane kujana Ŋanda ya Bwami alimwi akuziba ziindi zyamiswaangano zyambungano eyo. Ikuti naa kuli mbungano zinji ziswaanganina mu Ŋanda eyo ya Bwami, amubabuzye baalu kutegwa bamwaambile naa mbusena bwambungano iili momukkede. Mutamuki pe ikujanika kumiswaangano alimwi akuzibila baalu bamumbungano.
(2) Ibalembi bamumbungano momubede alimwi abamumbungano yanu mpya bayoobelekela antoomwe ikulonzya makkaadi anu nywebo aamukwasyi wanu Aalembwa Zyasikumwaya Aambungano. Alwalo lugwalo lumupandulula luyootuminwa kubaalu bamumbungano yanu mpya. (Amubone Kabbokesi Kamubuzyo mu Mulimo Wesu Wabwami wa February 1991. Amweezyanisye Kabbokesi Kamubuzyo mu Mulimo Wesu Wabwami wa October 1998.) Ikkomitii Yamulimo Yambungano yakubusena bupya yeelede kuzibya sikweendelezya ciiyo cabbuku iweelede kujatikizya kusika kwanu ikutegwa akamuswaye akumugwasya kuziba nkamu yanu mpya yaciiyo cabbuku.—Rom.15:7.
(3) Basikumwaya boonse bamumbungano yanu mpya balijisi mulimo mubotu wakucita—iwakumuzibila akumutambula kabotu. (Amweezyanisye 3 Johane 8.) Eci caamba kuti mweelede kujanika lyoonse kumiswaangano ikutegwa kamukulwaizyanya abakwesu abacizi.
(4) Tamweelede kulindila kuti mane zintu zyoonse zijatikizidwe mukulonga kwanu zyamanizigwa nomuya mutole lubazu mumulimo wamumuunda ambungano yanu mpya. Mwabikka zintu zya Bwami mubusena bwakusaanguna, izintu zimbi ziyoolanganizigwa alimwi muyoobukkomanina busena bwanu bupya. (Mt. 6:33) Mwakkalikila amunzi wanu mupya ambweni muyooyanda kutamba bamwi bamumbungano yanu kuti bamuswaye kutegwa muzibilane.—Rom. 12:13b.
Ikulonga mmulimo mupati. Nokuba boobo, ikuti naa boonse bajatikizidwe bacita zintu nzyobeelede kucita, takukabi kunyonganizigwa pe kulubazu lwakumuuya. Boonse bayookukkomanina kuyanzana kwesu kwaluyando kwa Bunakristo.