Twaambo Tumvwika Twapegwa

NOMWAAMBA kaambo, bamuswiilila baliluzi kubuzya mubuzyo wakuti: “Nkaambo nzi ncocili boobo? Mbumboni nzi buliko bwakuti nzyaamba mwaambi nzyamasimpe?” Mbomuli baiyi, mweelede kwiingula mibuzyo iili boobo naa kubagwasya bamuswiilila kujana bwiinguzi. Ikuti kaambo kakayandika kapati mubumboni bwanu, amubone kuti mwabapa twaambo ibamuswiilila tuyoobapa kukazumina kaambo aako. Eeci ciyoomugwasya kukanana makani aakulwaizya.

Mwaapostolo Paulo wakali kukulwaizya. Kwiinda mukubelesya twaambo tumvwika, munzila iitobeleka alimwi akukombelezya, wakasola kubagwasya kucinca mizeezo yabo aabo mbaakali kwaambila. Wakatusiila cikozyanyo cibotu. (Inc. 18:4; 19:8) Inzya, baambi bamwi bakulwaizya bantu munzila iitali kabotu. (Mt. 27:20; Inc. 14:19; Kol. 2:4) Balakonzya kutalika atwaambo twakuyeeyela buyo, kusyoma twaambo tutaluzi, makani ngobatazyi kabotu, kutabikkila maano kutwaambo tuteendelani alusyomo lwabo naa kukombelezya bantu muciindi cakubagwasya kuyeeya. Tweelede kucenjela anzila zili boobo.

Ziyeeme mu Jwi lya Leza. Nzyotuyiisya tazyeelede kuba zyeezyo nzyotuyeeya tobeni. Tulasoleka kwaambila bamwi eezyo nzyotwakaiya mu Bbaibbele. Mumulimo ooyu, twagwasyigwa kapati amabbuku aaciinga camuzike musyomesi uucenjede. Imabbuku aaya alatugwasya kulingaula Magwalo kabotu. Twamana tulabakulwaizya bamwi kubala Bbaibbele, ikutali amakanze aakubatondezya kuti tuliluzi, pele amakanze aakuyanda kuti balibonene beni ncolyaamba. Tulazuminizya ncaakaamba Jesu Kristo wakaambila Bausyi mumupailo kuti: “Ijwi lyako mbobwini.” (Joh. 17:17) Kunyina umbi weelede kusyomwa kwiinda Jehova Leza, Mulengi wajulu anyika. Itwaambo twesu tuyoomvwika ikuti katuzwa mu Jwi lyakwe.

Zimwi ziindi mulakonzya kubandika abantu batalizyi kabotu Bbaibbele naa batazumini kuti ndi Jwi lya Leza. Mweelede kubelesya bupampu kubona nomweelede ambomweelede kwaamba zilembedwe mu Bbaibbele. Pele mweelede kusoleka kufwambaana kubatondezya oomo mujanika makani aasyomeka.

Sena mweelede kuyeeya kuti kwiile kuzubulula lugwalo kulapa bumboni butadoonekwi? Peepe. Inga mwayanda kuti mubagwasye kubikkila maano kucibalo ikutegwa mutondezye kuti ncobeni ilugwalo lulapa bumboni kumakani ngomwaamba. Ikuti kamuyanda buyo kutondezya njiisyo yabukkale iili mulugwalo alimwi akuti cibalo kacitajatikizyi makani aayo, bumboni abumbi inga bwayandika. Mulakonzya kuyanda kubelesya magwalo aambi aayendelana amakani ikutegwa mubatondezye baswiilizi kuti nzyomwaamba, ncobeni zizwa mu Magwalo.

Mutani kwiindilizyi ncolwaamba lugwalo. Amulubale kabotu. Ilugwalo lulakonzya kalujatikizya makani manji ngomubandika. Pele ikutegwa bumboni bwanu bumvwugwe, uumuswiilila weelede kukabona kaambo mulugwalo oolo ikapa bumboni kumakani ngomwaamba.

Kwasinizyigwa Abumboni Bweendelana. Zimwi ziindi, inga cainda kubota ikubelesya bumboni busyomwa kunze lyaboobo bujanika mu Bbaibbele ikugwasya bantu kumvwisya mbwaaluzi Magwalo.

Mucikozyanyo, mulakonzya kwaamba zyabubumbo buboneka kuba bumboni bwakuti Mulengi nkwali. Mulakonzya kwaamba mbozyibeleka zilengwaleza, mbuli nguzu zikwelelaansi akupandulula kuti ikweendelana ooku kutondezya kuti nkwali Sikupa Milawo. Bupanduluzi bwanu bunooluzi ikuti kabweendelana azyaambwa mu Jwi lya Leza. (Job. 38:31-33; Int. 19:1; 104:24; Rom. 1:20) Ibumboni buli boobo bulagwasya nkaambo butondezya kuti ncolyaamba Bbaibbele cileendelana abumboni buboneka.

Sena muyanda kugwasya umwi kubona kuti ncobeni Ibbaibbele ndi Jwi lya Leza? Mulakonzya kuzubulula bahaabupampu mulwiiyo bazumina oobo, pele sena mbumboni buzwide oobo? Kuzubulula ooko kugwasya buyo bantu babalemeka bahaabupampu aabo. Sena inga mwabelesya sayaansi kutondezya kuti Ibbaibbele ndyamasimpe? Ikuti kamubelesya mizeezo yabasayaansi batalondokede kuba mbobumboni mbomusyoma, muyooba mbuli muntu uuyaka ŋanda antalisyo iilangilwa kuwa. Kulubazu lumwi, ikuti kamutalika a Jwi lya Leza nomuya mutondezye nzyobakajana basayaansi kutondezya mboliluzi Bbaibbele, nkokuti twaambo twanu tunooli antalisyo njumu.

Kufwumbwa ncomuyanda kutondezya, amupe bumboni buzwide. Kuvwula kwabumboni buyandika, kuya kuba mbuli mbobabede baswiilizi. Mucikozyanyo, ikuti kamwaamba zyamazuba aakumamanino mbuli mbokwaambidwe ku 2 Timoteo 3:1-5, mulakonzya kwaambila bamuswiilila makani aadumide aatondezya kuti bantu ‘mbaasikancimwa.’ Cikozyanyo eeco comwe cilakonzya kuzulila mukutondezya kuti cibeela eeci cazitondezyo zyamazuba aakumamanino cili mukuzuzikizyigwa.

Ikukozyanisya zintu zyobilo ziindeene zyalo zijisi mbazu zimwi zyeelene, kanji-kanji kulagwasya. Kukozyanisya ooku takupi bumboni buzwide; ibumboni oobu bweelede kusinizyigwa ancolyaamba Bbaibbele. Pele ikweelanya zintu kulakonzya kumugwasya muntu ikubona mbwaaluzi makani. Kukozyanisya kuli boobu kulakonzya kubelesyegwa, mucikozyanyo, mukupandulula kuti Bwami bwa Leza nimfwulumende. Mulakonzya kutondezya kuti mbubwenya mbuli mfwulumende zyabantu, Bwami bwa Leza bulijisi beendelezi, balelwa, milawo, nkuta abubambe bwakuyiisya.

Zintu zyakacitika ncobeni zilakonzya kubelesyegwa kutondezya mbocili camaano kubelesya lulayo lwamu Bbaibbele. Zyakatucitikila azyalo zilakonzya kubelesyegwa kupa bumboni kutwaambo twaambwa. Mucikozyanyo, nomutondezya muntu mbociyandika kubala akwiiya Bbaibbele, mulakonzya kumupanduluda mbokwamugwasya ikucita boobo mubuumi bwanu. Mukukulwaizya ibanyina, imwaapostolo Petro wakaamba zyakusanduka ooko nkwaakalibonena ameso. (2 Pet. 1:16-18) Paulo awalo wakaamba zintu zyakamucitikila. (2 Kor. 1:8-10; 12:7-9) Pele mutavwuzyi makani aazintu zyakamucitikila kutegwa mutabi ampuwo.

Mbwaanga bantu baliindene mbobapona akuyeeya, ibumboni mbwakonzya kumvwa umwi inga tabumugwasyi umwi. Aboobo, amubikkile maano mbobayeeya bamuswiilila nomusala twaambo twakubelesya ambomuya kutwaamba. Ku Tusimpi 16:23 kulategwa: “Moyo wamusongo ulasongwaazya milomo yakwe, alimwi ulayungizya luzibo kukwaamba kwakwe.”