“Tandiyandi”
1 Ooku nkokwiingula kudumide kumulumbe wesu mumasena amwi. Ino ncinzi ciyootugwasya kutatyompwa ciindi bantu bamucilawo nobatabikkili maanu? Ino inga twabagwasya buti kutegwa babe aluyandisyo kumakani mabotu?
2 Amuzumanane Kukkomana: Ikwiibaluka twaambo tupa kuti bantu banji kabatabikkili maanu kuyootugwasya kuzumanana kukkomana. Bantu bakayiisyigwa kaambo kaamba kuti zintu zyakasanduka buya naa aabo bakakomezyegwa muciinga cisyoma kuti Leza tako balakonzya kuti ambweni tiibakabubona bubotu bwa Bbaibbele. Bamwi ambweni bakatyompwa kwiinda mukuupa-upa ameso nkobakabona mubukombi. Kuli bamwi, kutabikkila maanu kulakonzya kutondezya kucimwa alimwi akubula bulangizi. (Ef. 2:12) Ibamwi ‘tababikkili maanu’ akaambo kakuti balityompedwe kuzintu zipa kulibilika mubuumi.—Mt. 24:37-39.
3 Kunyina makani ambobalimvwa bamwi, tulakonzya kuzumanana kukkomana mumulimo katuzi kuti milimo yesu imupa bulemu Jehova. (1 Pet. 4:11) Kuyungizya waawo, kubandika kujatikizya kasimpe nokuba kuli baabo ibatana kuziba bubotu bwankako, kuyumya lusyomo lwesu. Atusoleke kubona bantu bali mucilawo mbuli Jehova mbwababona. Wakabafwida luzyalo bantu baku Nineve ‘batakalina kwiiya kwaandaanya ijanza lyabo lyalulyo ajanza lyabo lyalumwensi.’ (Jon. 4:11) Aabo bakkala mucilawo cesu bayandika makani mabotu. Aboobo tatweelede kucileka, pele tweelede kuyandaula nzila zyakubagwasya kuti babe aluyandisyo kumulumbe wamu Bbaibbele.
4 Amubandike Zintu Zicitika Mucilawo Canu: Ambweni inga mwaamba kaambo nkobabikkila maanu bantu mucilawo mumajwi aanu aantalisyo akubuzya uuli aŋanda kwaamba mbwayeeya. Amuswiilile nabandika, mpoonya amumutondezye mulumbe wamu Bbaibbele uumbulizya mukwiingula nzyabikkila maanu. Nokwakamana kucitika ntenda mucilawo cabo, umwi Kamboni wakatondezya kuusa kwini-kwini amunzi aumwi. Wakaamba kuti: “Mpoonya-mpoonya, bantu bakatalika kwaambaula. Ndakajisi mibandi mibotu buzuba oobo akaambo kakuti ndakatondezya kubikkila maanu kubuumi bwabo.”
5 Penzi limwi alimwi licitikila bantu liyoomanizyigwa a Bwami bwa Leza. Amusoleke kuziba penzi ndyabikkilide maanu kapati uuli aŋanda. Ulakonzya kumuzumizya kupandulula mulumbe wamu Bbaibbele uupa bulangizi. Ikuti kacitali boobo, inga waanguluka kuyooswiilila ‘ciindi ciboola.’—Inc. 17:32.