Amubayiisye Bana Banu Ikuba Bakambausi
1. Ino lugwalo lwa Intembauzyo 148:12, 13 lubakulwaizya kucita nzi bazyali Banakristo?
1 Jehova utamba bana kuti bamutembaule. (Int. 148:12, 13) Aboobo, bazyali Banakristo, tabayiisyi buyo bana babo kasimpe kamu Bbaibbele amilawo ya Leza yakulilemeka. Alimwi balabayiisya kuba bakambausi bamakani mabotu. Mbuti mbobakonzya kuzumanana kucita oobo?
2. Ino mbuti cikozyanyo cibotu cabazyali mbocikonzya kubagwasya bana babo?
2 Cikozyanyo Cibotu: Mubetesi Gideoni wakaambila bantu bakwe bali 300 kuti: “Amulange ndime.” (Bab. 7:17) Bana balatobela nzyobacita bazyali babo. Umwi muzyali musankwa uubeleka masiku, aboola kuŋanda mu Mujibelo, muciindi cakoona ulaunka mumulimo wakukambauka abana bakwe nokuba kuti ulikatede. Kwiinda mucikozyanyo cakwe, ubayiisya kuti mulimo wakukambauka weelede kubikkwa mubusena bwakusaanguna. (Mt. 6:33) Sena bana banu balabona kuti mulakkomana nomucita zyintu zyakumuuya, mbuli kupaila, kubala Bbaibbele, kwiingula kumiswaangano akukambauka? Eeci tacaambi kuti munoocita kabotu ziindi zyoonse. Pele bana banu bayoomuswiilila nomusolekesya kubagwasya kukomba Jehova ikuti naa bamubona mbomuli basungu kumubelekela.—Dt. 6:6, 7; Lom. 2:21, 22.
3. Ino nimbaakani nzi zyakumuuya bazyali nzyobeelede kubabikkila bana babo?
3 Amubabikkile Mbaakani: Bazyali balabeleka canguzu kuyiisya bana babo kweenda, kwaambaula, kulisamika, azimwi. Bana mbobayaabukomena, balababikkila mbaakani zipya. Ikuti naa bazyali Mbanakristo, balabagwasya bana babo kuba ambaakani zyakumuuya akuzizuzikizya kweelana aciimo cabo anzyobakonzya kucita. (1 Ko. 9:26) Sena mulabayiisya bana banu kwiingula kumiswaangano mumajwi aabo alimwi akulibambila makani ngobapegwa mu Cikolo Camulimo Weendelezyegwa a Leza? (Int. 35:18) Sena mulabayiisya kubelesya nzila ziindene-indene zyamumulimo wakukambauka? Sena mwakababikkila mbaakani yakubbapatizyigwa alimwi akubeleka mulimo waciindi coonse? Sena mulabakulwaizya kuyanzana abakambausi bakkomene alimwi babeleka cabusungu balo bakonzya kubakulwaizya?—Tus. 13:20.
4. Mbuti bana mbobagwasyigwa akaambo kakuba abazyali babayiisya kukambauka nobacili bana?
4 Sintembauzyo wakaamba kuti: “O Leza, nduwe wandiiyisya kuzwa kubwanike bwangu, lino asunu nciluula malele aako.” (Int. 71:17) Amubayiisye bana banu kuba bakambausi nobacili bana. Ntalisyo iili boobu iyoobagwasya baakukomena.—Tus. 22:6.