CIIYO 40
Twaambo Tuluzi
NKAAMBO nzi Munakristo ncakonzya kwaamba kaambo katali kamasimpe? Ulakonzya kwiile kwiinduluka makani amwi ngaamvwa kakunyina akubona naa ngamasimpe. Cimwi ciindi mukutazyiba ulakonzya kwiindilizya akaambo kakuti tanaakamvwisya naakali kubala ooko nkwaakaajana. Twabikkila maano kwaamba twaambo tuluzi nokuba mutuntu tuniini, ibatuswiilila balakonzya kuba alusyomo lwakuti imulumbe ngotwaamba ngwamasimpe.
Mumulimo Wamumuunda. Babona kuti kucili zinji nzyobeelede kwiiya, ibanji balayoowa ikutalika kuunka mumulimo wamumuunda. Pele bantu aaba bajana kuti ncuuba-uba kupa bumboni nokuba kuti inga kabajisi buyo luzibo lwakasimpe lusyoonto. Munzila nzi? Ikulibambila ngomusamu.
Kamutanaunka mumulimo wamumuunda, amwaazyibe kabotu makani ngomuyanda kuyoobandika. Amwiiyeeyele mibuzyo njobakonzya kumubuzya bamuswiilila. Amujane bwiinguzi bwamu Bbaibbele bulimvwisya. Eeci ciyoomugwasya kupa bwiinguzi buluzi amoyo kuukkede. Sena muunka kwaakusololela ciiyo ca Bbaibbele? Amusitikile kulanga makani aayooyiigwa. Amubone kuti mwabumvwisya bwiinguzi bwamu Magwalo kumibuzyo iisimbidwe.
Ino mbuti ikuti mwiniŋanda naa ngomubeleka limwi wabuzya mubuzyo ngomwatalibambila? Ikuti kamutaazyi kabotu makani, mutataliki kweezyeezya. “Moyo wamululami ulayeeya kabotu mbweelede kuvuwa.” (Tus. 15:28) Mulakonzya kujana lugwasyo ndomuyanda mubbuku lya Kukambitsirana za m’Malemba naa mukabbuku kategwa “Nkhani Zokambirana za m’Baibulo.” Ikuti kamutaajisi mabbuku aaya, amumwaambile kuti amupe ciindi cakuvwuntauzya ikutegwa mukaingule kabotu. Ikuti sikubuzya mubuzyo kayandisya kumvwa, uyookkazyika moyo akulindila bwiinguzi buluzi. Mucimwi ciindi ulakonzya kukondwa abona kulicesya kwanu.
Ikubeleka abasikumwaya bacibwene mumulimo wamumuunda, kulakonzya kumugwasya kuba aluzibo mukupandulula Jwi lya Leza mbokweelede. Amubikkile maano kumagwalo ngobabelesya ambobaapandulula. Cakulibombya, amuzumine kufwumbwa muzeezo naa kululamika nkobaamba. Sikwiiya musungu Apolo wakagwasyigwa alugwasyo lwakazwa kuli bamwi. Luka wakaamba Apolo kuti wakali “kunongosola kwaamba,” “wakalaazi kapati Malembe,” akuti wakali ‘sungweede kapati,’ imwaalumi wakali “kwiisya zya Munanike wa Leza buluzi.” Nokuba boobo, kwakali mbazu zimwi mwaatakali kumvwisya. Pele Pulisila a Akwila nobakamumvwa, “bakamutola kuŋanda yabo akuyoomupandulwida kabotu zya Nzila ya Leza.”—Mili. 18:24-28.
“Kujatisya Makani Aasyomeka.” Nzyotwaamba kumiswaangano zyeelede kulimvwisya kuti tulalulemeka lubazu ndoijisi mbungano kuti “ngomusemu, alimwi ncecisiko calusinizyo.” (1 Tim. 3:15) Ikutegwa tuzumanane mukasimpe, cilayandika kumvwisya ncaamba magwalo ngotuyanda kuyoobelesya mumakani eesu. Amulange icaambwa kubikkilizya ambwaabelesyegwa.
Ncomwaamba lyamiswaangano yambungano cilakonzya kwiindulukwa. Inzya, “toonse tulalubya muziyanza zinji.” (Jak. 3:2) Pele muya kugwasyigwa ikuti mwaba acilengwa cakwaamba zintu ziluzi. Ibakwesu banji ibakalilembya mu Cikolo Camulimo Weendelezyegwa a Leza mukuya kwaciindi bayooba baalu. ‘Nzinji’ zilangilwa kuli baabo bapedwe mukuli ooyu. (Lk. 12:48) Ikuti mwaalu cakutabikkila maano wapa lulayo lutaluzi akupa kuti kube manyongwe mumbungano, mwaalu ulakonzya kuliletela mulandu kuli Leza. (Mt. 12:36, 37) Aboobo imukwesu uusika aceelelo cakuba mwaalu weelede kuti kazyibidwe kuba ‘sikujatisya makani aasyomeka mukuyiisya kakwe.’—Tit. 1:9.
Amubone kuti bupanduluzi bwanu buleendelana a “majwi menimeni” aakasimpe kajanika mu Magwalo. (2 Tim. 1:13) Eeci taceelede kumuyoosya pe. Ambweni muli afwaafwi akumanizya kubala Bbaibbele mbolizulwa. Amuzumanane kucita oobo. Pele kwaciindi cino, amubone twaambo ootu mbotukonzya kumugwasya kulanga-langa makani ngomuyanda kuyoobelesya mukuyiisya kwanu.
Kusaanguna amulibuzye kuti: ‘Sena makani aaya aleendelana anzyondakaiya kale mu Bbaibbele? Sena ayoobagwasya bandiswiilila ikuba acilongwe a Jehova, ambweni sena asumpula busongo bwanyika ibukulwaizya bantu kuti kabeendelezyegwa ambubo?’ Jesu wakati: “Ijwi lyako mbobwini.” (Joh. 17:17; Dt. 13:1-5; 1 Kor. 1:19-21) Mpoonya amuzyibelesye kabotu zibelesyo zibelesyegwa kwiiya zipegwa aciinga camuzike musyomesi uucenjede. Eezyi tazyikamugwasyi buyo kumvwisya magwalo, pele ziyoomugwasya akwaapandulula kabotu alimwi bweelede. Ikuti makani aanu kayeeme ‘amajwi meni-meni’ akuti kamusyoma munzila njabelesya Jehova nomupandulula anomutondezya magwalo mbwaabelesyegwa, twaambo twanu tunooluzi.
Ikubona Kuti Ncobeni Makani Aliluzi. Makani aacitika ino-ino, aazubuludwe azyakuluula, inga zyagwasya nomupandulula akutondezya mbokubelesyegwa twaambo tumwi. Ino mbuti mbomunga mwazyiba kuti makani aayo ngamasimpe? Nzila imwi njakujana makani aayo mumabbuku aalembwa abantu basyomeka. Mutalubi kulanga naa makani aayo acibeleka asunu. Myeelwe imwi mukuya kwaciindi ilacinca; busyaabusongo musayaansi buya buyaambele; alimwi muntu mbwaya buyaambele kumvwisya makani aansiku amyaambo yansiku, iluzibo ndwaakajisi musyule luyandika kucincwa. Amucenjele kapati ikuti kamuyanda kuyoobelesya makani aamumuteende, aamucipekupeku, aamuwailesi, naa makani aamukkompyuta. Tusimpi 14:15 yaamba kuti: “Uuongelezeka ulazuminina makani oonse, pele muntu uucenjede ulayeeya kabotu kweenda kwakwe.” Amulibuzye kuti: ‘Sena aabo bamwaya makani aaya mbantu basyomeka? Sena makani aaya kuli mbwaakonzya kusinizyigwa?’ Ikuti kamwaadooneka makani, mutaabelesyi pe.
Kunze lyakusinizya nkwaazwa makani, amulibambile kabotu mbomuya kwaabelesya. Amubone kuti mbomubelesya makani aazubuludwe alimwi amyeelwe imwi kuleendelana acali kwaambwa ooko nkomwaajana. Mukusola kukankaizya kaambo, amubone kuti “bantu bamwi” batabi “bunji bwabantu,” akuti “bantu banji” batabi “bantu boonse,” alimwi a “muziindi zimwi” litabi “lyoonse.” Ikuciindilizya kwaamba twaambo tumwi naa makani aajatikizya myeelwe, ambocibede cimwi cintu, naa mbwaayandika kapati makani kupa kuti bantu bazyidooneke nzyomwaamba.
Ikuti kamwaamba zintu ziluzi lyoonse, muyoozyibwa kuti muli bantu baamba zyamasimpe. Eeci ciletela mpuwo mbotu kuli Bakamboni ba Jehova boonse. Kwiinda waawo, cipa bulemu kuli ‘Jehova Leza uusyomeka.’—Int. 31:5.