Mamanino Aakulwaizya

AMBWENI mwakaavwuntauzya akulibambila kabotu makani aanu. Alimwi mulakonzya mwakalibambila ntalisyo mbotu iikulwaizya. Nokuba boobo, kuli acimbi ciyandika—imamanino aakulwaizya. Mutaaubyi-ubyi pe. Nzyomwaamba kumamanino kanji-kanji nzyezintu zitalubiki. Ikuti mamanino kaatakulwaizyi, nozyiba zyeezyo zyaambwa kale tazyikabakulwaizyi bantu pe.

Amulange-lange makani aaya: Kumamanino abuumi bwakwe, Joshua wakaamba makani aatalubiki kwaambila baalu bamucisi ca Israyeli. Naakamana kubandauka nzyaakabacitila Jehova bana Israyeli kutalikila kumazuba a Abrahamu, sena Joshua wakaile kwiinduluka twaambo tupati-pati mubufwaafwi? Peepe. Pele camoyo woonse wakabakulwaizya bantu kati: “Amumuyoowe Jehova akumumanina milimo cakululama acakusinizya.” Amulibalile mumvwe mbwaakamanizya Joshua, kuli Joshua 24:14, 15.

Aambi makani aayandika ngaayo aajanika ku Incito 2:14-36 aakaambwa amwaapostolo Petro kaambila nkamu mu Jerusalemu lya Pobwe ya Pentekoste wa 33 C.E. Kusaanguna wakapandulula kuti bakali kukambauka kuzuzikizyigwa kwabusinsimi bwa Joeli bwakaamba zyakutilwa kwamuuya wa Leza. Kumane wakatondezya mbocakali kweendelana abusinsimi bwabu Mesiya mu Intembauzyo bwalo bwakasinsima zyabubuke bwa Jesu Kristo akusumpulwa kukkala kujanza lyalulyo lya Leza. Mpoonya mukumanizya, Petro wakaasalazya makani aayo boonse ibakali kumuswiilila ngobakeelede kubikkila maano. Wakati: “Aboobo iŋanda yoonse ya-Israyeli izibisye kuti oyu Jesu nguwenya ngomwakabambula, Leza wamucita abe Mwami a-Kristo.” Aabo bakaliko bakabuzya kuti: “Nobaalumi bakwesu, ino tucite buti?” Petro wakavwuwa kuti: “Amusanduke, mubapatizigwe umwi umwi muzina lya Jesu Kristo.” (Inc. 2:37, 38) Ibuzuba oobo bantu basika ku 3,000 akati kabaabo bakali kumuswiilila bakakulwaizyigwa anzyobakamvwa, bakakazumina kasimpe kaamba zya Jesu Kristo.

Twaambo Ntomweelede Kuyeeya. Nzyomwaamba kumamanino aamakani zyeelede kweendelana amutwe wamakani aanu. Zyeelede kutondezya kuccililana kwatwaambo tupati-pati ntomwapandulula. Nokuba kuti inga mwayanda kubikkilizya amabala aayandika kapati aali mumutwe wamakani naa kwaamba mutwe woonse, cili kulindinywe.

Makanze aakukanana kwanu ngakukulwaizya bamwi ikubweza ntaamu imwi kumakani ngomwaamba. Mulimo mupati watwaambo twakumamanino ngwakubatondezya ncobeelede kucita. Nomwakasala mutwe wamakani atwaambo tupati-pati, sena mwakabikkila maano kubona imakani mbwayoobagwasya baswiilizi ancomuyanda kuzuzikizya nomukanana? Ikuti naa mbuboobo, nkokuti muliizyi ntaamu njomuyanda kuti babweze. Lino mweelede kwiipandulula ntaamu eeyo ambobakonzya kucita boobo.

Kunze lyakwaambila bamuswiilila ncobeelede kucita, mamanino aamakani aanu ayelede kukulwaizya. Ayelede kubikkilizya atwaambo tumvwika twakucitila boobo ambweni ikwaamba mpindu zijanika mukucita boobo. Ikuti twaambo twakumamanino twalibambilwa akwaambwa kabotu, tuyoopa kuti makani aanu oonse kaakulwaizya.

Kamuyeeya kuti makani ayaabumana. Nzyomwaamba zyeelede kutondezya oobo. Abwalo mbomukanana bweelede kutondezya. Mutani kwaambi cakubinda kusikila kumamanino mpoonya akumanizya cakutayeeyelwa. Kulubazu lumwi, tamweelede kutola ijwi ansi. Ijwi lyanu lyeelede kulimvwisya pele ikutali cakwiindilila. Majwi aanu aamamanino ayelede kulimvwisya kuti mumanizya buya. Nomukanana mweelede kumvwika kuti nzyomwaamba zilayandika alimwi mulazyisyoma. Nomulibambila mbomuya kukanana, amulibambile ambomuya kumanizya.

Ino mamanino ayelede kutola ciindi cilamfwu buti? Taakonzyi kupegwa ciindi cini cigaminide. Mamanino taayelede kutola ciindi cilamfwu. Bulamfwu bwamamanino bulakonzya kuzyibwa kweelana ambwaabakulwaizya baswiilizi. Majwi mauba-uba aagaminide aakulwaizya, alagwasya. Mamanino malamfwu aniini aabikkilizya acikozyanyo cifwaafwi aalo inga agwasya ikuti alibambilwa kabotu. Amukozyanisye mamanino mafwaafwi aabbuku lya Mukambausi aajanika ku Mukambausi 12:13, 14 amamanino aa Mulumbe waa Cilundu mufwaafwi aalembedwe ku Matayo 7:24-27.

Mumulimo Wamumuunda. Taku kumbi nkomuya kujana penzi ciindi aciindi lyakumanizya makani munzila mbotu kunze lyamumulimo wamumuunda. Kwiinda mukulibambila akubabikkila maano bantu, mulakonzya kugwasyigwa kapati. Ilulayo lwaambwa musyule lulakonzya kubelesyegwa noliba leelyo notubandika amuntu omwe.

Mubandi inga kuuli mufwaafwi kapati. Muntu ulakonzya kajisi bubi. Mubandi wanu ulakonzya kutola buyo miniti yomwe. Ikuti kacikonzyeka, mulakonzya kwaamba kuti: “Ndabona kuti mujisi bubi. Pele amumvwe kaambo aaka kakulwaizya. Ibbaibbele litondezya kuti Mulengi wesu ulijisi makanze aataliboteli—aakubamba nyika eeyi ikuba busena bwalo bantu mobakonzya kutangala abuumi kukabe kutamani. Tulakonzya kuba mu Paradaiso eeyo, pele tweelede kwiiya nzyayanda Leza.” Antela inga mwabaambila buyo kuti muya kuboola kabotu.

Ikuti mubandi watyokezyegwa akaambo kakuti mwiniŋanda uladaula—naa kali sicisapi—ncibotu kumuvwiila kabotu. Amuyeeye lulayo lujanika ku Matayo 10:12, 13 a Ba-Roma 12:17, 18. Ikwiingula amoyo mubombe kulakonzya kumugwasya kucinca mbwababona Bakamboni ba Jehova. Mwacita boobo, inga mwawoonda mulimo.

Kulubazu lumwi, mulakonzya mwajisi mubandi uukondelezya amwiniŋanda. Amutwiinduluke twaambo tupati-pati ntomuyanda kuti atuyeeye. Amubikkilizye atwaambo tumukulwaizya kucita cimwi cintu kumakani aayo.

Mwabona kuti inga cakonzyeka kuzumanana amubandi ciindi ciboola, amumwaambile kaambo kamwi kayoomupa kulangila. Amubuzye mubuzyo—ulakonzya kuzwa mubbuku lya Kukambitsirana za m’Malemba naa mubbuku limwi lyakabambilwa kuyiisya ziiyo zya Bbaibbele zyaaŋanda. Mutalubi makanze ngomujisi kweelana ambwaakacita Jesu alimwi ambokulembedwe ku Matayo 28:19, 20.

Sena mumanizya ciiyo ca Bbaibbele caaŋanda? Ikwiinduluka mutwe wamakani kuyoomugwasya sikwiiya ikutaluba zyali kubandikwa. Ikubelesya mibuzyo yakwiinduluka kuyoomugwasya sikwiiya ikutubikka mumoyo twaambo tupati-pati ikapati kuti kwacitwa cakukkazyika moyo. Imubuzyo kujatikizya makani aayiigwa mbwaakonzya kumugwasya sikwiiya naa mbwakonzya kugwasya bamwi, kulakonzya kumugwasya kubona mbwakonzya kuzibelesya nzyaiya.—Tus. 4:7.

Kamuyeeya kuti—mamanino aanu ngaapa kuti ube mubandi uukulwaizya.