CIIYO 14

Twaambo Tupati-pati Twasalazyigwa

Bahebrayo 8:1

NCOMWEELEDE KUCITA: Amubagwasye baswiilizi banu kwaatobelezya makani aanu alimwi amusalazye kaambo kapati kamwi akamwi mbokaswaangene amakanze ngomujisi alimwi amutwe wamakani.

MBOMUKONZYA KUCITA OOBO:

Amube amakanze. Amubone naa makani aanu ajisi mbaakani yakubazyibya buyo twaambo, kubagwasya kusinizya naa kukulwaizya baswiilizi banu mpoonya amwaape kweelana ambaakani eeyo. Amube masimpe kuti twaambo tupati-pati toonse twaambwa munzila iikonzya kumugwasya kuzuzikizya mbaakani yanu.

Amulibuzye kuti: ‘Ino mibuzyo nzi njobalangilwa kubuzya baswiilizi kujatikizya makani aaya? Ino mibuzyo eeyo inga baitobelanya buti ciindi nobaibuzya?’ Mpoonya twaambo twanu amututobelanye munzila eeyo kutegwa baswiiilizi banu bacikonzye kwaatobelezya kabotu makani aanu alimwi akwaamvwisya.
Amuukankaizye mutwe wamakani aanu. Ciindi nomupa makani, kamuwaamba mutwe wamakani kwiinda mukwiinduluka mabala amwi aali mumutwe wamakani naa kubelesya mabala aakozyenye.
Amutusalazye twaambo tupati-pati alimwi munzila nguba-uba. Amusale buyo twaambo tupati-pati itweendelana amutwe wamakani alimwi ntomukonzya kupandulula kabotu muciindi ncomupedwe. Mutatuvwuzyi twaambo tupati-pati, amwaambe kaambo kapati kamwi akamwi munzila iimvwika, amwiime asyoonto mwamana kwaamba kaambo kapati kamwi akamwi mpoonya amwaambe katobela munzila iitobeleka.

Mulakonzya kutwaamba twaambo tupati-pati kumatalikilo aamakani aanu kutegwa mubagwasye baswiilizi kutobelezya naa mulakonzya kutwiinduluka alimwi kumamanino aamakani aanu kutegwa mubagwasye kutuyeeya.