Amwiinduluke Twaambo Tupati-pati Ntomwaiya

Sena zimwi ziindi cilamuyumina kuyeeya nzyomwaiya? Bunji bwaziindi, eeci cilatucitikila toonse. Ncinzi ncomukonzya kucita? Amutwiinduluke twaambo tupati-pati.

Ciindi nomubala, amwiime asyoonto kutegwa muzinzibale kuyeeya nzyomwaiya. Nceeci mwaapostolo Paulo ncaakakulwaizya bakwesu abacizyi kuti kabacita ciindi nobabala lugwalo lwakwe. Wakati: ‘Lino ikaambo kapati nkaaka.’ (Heb. 8:1) Munzila eeyi, wakabagwasya ikumvwisya ncaakali kwaamba alimwi anzyaakaamba mbozyakaswaangene amutwe wamakani.

Ambweni mulakonzya kubelesya maminiti aali 10 kumamanino aciiyo canu kuzinzibala kuyeeya twaambo tupati-pati ntomwaiya. Kuti kamutacikonzyi kutuyeeya twaambo ntomwaiya, amutulange alimwi tutwe twamakani naa kubala muzila wakusaanguna wamuncali umwi aumwi kutegwa mutuyeeye. Ikuti mwaiya cintu cimwi cipya, amusole kucipandulula mumajwi aanu. Ciindi nomuzinzibala kuyeeya zintu nzyomwaiya, ciyoomuubila kuziyeeya. Alimwi muyoobona mbomukonzya kuzibelesya mubuumi bwanu.