Cibeela 2—Ikweendelezya Ziiyo zya Bbaibbele Ziyaambele
Kulibambila Kweendelezya Ciiyo
1 Notweendelezya ciiyo ca Bbaibbele munzila iigwasya, takuli buyo kwiile kubandika zyili mucibalo alimwi akubala magwalo aatazubuludwe. Tweelede kutwaamba twaambo munzila sikwiiya motukonzya kumunjila mumoyo. Eeci ciyanda kulibambila ncobeni kumwi sikwiiya katumubikkide mumizeezo yesu.—Tus. 15:28.
2 Mbokulibambilwa: Amutalike kwiinda mukupaila kuli Jehova kujatikizya sikwiiya alimwi atwaambo twayandika kugwasya. Amumulombe Jehova kuti amugwasye kukonzya kwaamba twaambo tukonzya kumunjila mumoyo sikwiiya. (Kol. 1:9, 10) Ikutegwa mucimvwisye ciyiigwa, amwiime kwakaindi kaniini kulanga-langa cibalo naa ciiyo, tutwe, zifwanikiso, mamaapu alimwi amaccaati kuti kazyiliko. Amulibuzye kuti, ‘Ino makanze nzi mapati aaciiyo eeci?’ Eeci ciya kumugwasya kutubikka atuba twaambo tupati-pati nomweendelezya ciiyo.
3 Cakubikkila maano, amuciinduluke cibalo imuncali amuncali. Amujane bwiinguzi kumibuzyo iibikkidwe kwiinda mukubona buyo mabala aajisi twaambo tuyandika kapati. Amulange-lange magwalo aatazubuludwe mbwaayendelana atwaambo tupati-pati tuli mumuncali, alimwi akubona ngomweelede kubala nomweendelezya ciiyo. Cilakonzya kumugwasya kuti kamulemba twaambo tuniini twalugwalo alumwi mumbali-mbali aabbuku. Sikwiiya weelede kubona kuti masimpe nzyaiya zizwa mu Jwi lya Leza.—1 Tes. 2:13.
4 Acimugwasye Ciiyo Sikwiiya: Iciccilila, amulange-lange ciiyo kumwi sikwiiya kali mumizeezo ngomuyanda kuya kugwasya. Amuyeeyele mibuzyo njalangilwa kubuzya yalo njatamvwisyi naa njatazumini. Amulibuzye kuti: ‘Ino ncinzi nceelede kuti asalazyilwe naa mpayelede kuti abelekele kutegwa aye ambele kumuuya? Ino mbuti mbondikonzya kwaamba twaambo tukonzya kumunjila mumoyo?’ Aboobo kuyiisya kwanu akube kooko kweendelana azyeezyo nzyayandika. Muziindi zimwi, inga mwayandika kubelesya cikozyanyo, bupanduluzi naa mibuzyo iili mbwiibede kugwasya sikwiiya kumvwisya kaambo kamwi naa lugwalo. (Neh. 8:8) Pele mutabikkilizyi atwaambo tutagwasyi kapati mukusalazya kabotu mutwe wamakani. Ikwiinduluka ciiyo mubufwiifwi kumamanino aaciiyo kuya kumugwasya sikwiiya kuti atatulubi twaambo.
5 Elo kaka tulakkomana mupya nazyala micelo yabululami iitembaula Jehova! (Flp. 1:11) Ikutegwa bagwasyigwe kusika ambaakani eeyo, amulibambile ncobeni nomweendelezya ciiyo acimwi ca Bbaibbele.