Kuyungizya Luzyibo Lwesu Mumulimo Wakukambauka—Kukambaukila Mumasena Mucitilwa Makwebo

Ikaambo Ncociyandika: Mbwaanga bantu banji ciindi cinji bacimanina kumilimo yabo, nzila mbotu yakubakambaukila mulumbe wa Bwami nkubaunkila kumasena nkobabelekela. Kukambaukila mucilawo mucitilwa makwebo kulakonzya kukkomanisya alimwi akuzwidilila nkaambo bantu tulabajana alimwi babelesi balabikkila maano kubantu mbobayeeyela kuti mbaasikuula. Ikutegwa tuzwidilile, basikumwaya beelede kubelesya bupampu akuba cikozyanyo cibotu munsamino yabo alimwi ambobalibamba. (2 Kor. 6:3) Aboobo, mulangizi wamulimo weelede kubikkila maano kubona mbwaavwula kubelekelwa masena mucitilwa makwebo alimwi akuti mbaani babelekela mumo.

Mbotukonzya Kucita Oobo:

Amulibambile ntalisyo iijisi buyo majwi masyoonto. Ikuti naa twatola ciindi cilamfwu katubandika amubelesi, ambweni cilakonzya kupa kuti ciindi ciboola atakazumini kubandika andiswe.
Amusale ciindi nokutakwe bantu banji baula, mbuli ciindi nobajalula buyo.
Amusaangune kubandika amupati wamulimo. Amubandike munzila iisangalizya alimwi yabulongwe. Mulakonzya kwaamba kuti, “Tuyabuswaya bantu kwakaindi kasyoonto buyo mumasena mobabelekela nkaambo cilakatazya kubajana aŋanda.” Amubandike mubufwaafwi, akwaabila katulakiti, mamagazini, naa bbuku limwi. Ikutegwa batatuyeeyeli kuti tusambala buya, ziindi zinji cilagwasya kutabwaamba bubambe bwakusanga ccita kuti batubuzya mbougwasyilizyigwa mulimo wesu.
Ikuti mupati wamulimo kali muntu uusangalizya, amumulombe kuti mubandike asyoonto ababelesi bambi. Mumasena aamwi mucitilwa makwebo, inga cabota kubuzya naa inga mwabasiila mabbuku aakubala mubusena mobalyookezyela babelesi.
Amubelesye bupampu, alimwi akuba bantu banyoneka. Mucikozyanyo, kuti mubelesi kabandika asikuula naa kajisi bubi, amulindile kusikila wamana.

Amusole Kucita Eeci Mwezi Uuno:

Mwaakucita kukomba kwamumukwasyi kutobela, amukasole kucita citondezyo cifwaafwi ncomukonzya kubelesya ikuti kamubelekela mucilawo mucitilwa makwebo.