CIIYO 11

Amupye Moyo Nomubandika

Baroma 12:11

NCOMWEELEDE KUCITA: Amubakulwaizye baswiilizi banu kwiinda mukukanana cabusungu.

Makani ayelede kumunjila mumoyo. Ciindi nomulibambila kuyoopa makani aanu, amuzinzibale kuyeeya kujatikizya mbouyandika kapati mulumbe uuli mumakani aanu. Amwaazyibe kabotu makani aanu kutegwa mukakonzye kwaabandika kuzwa ansi aamoyo.
Amubabikke mumizeezo baswiilizi banu. Amuzinzibale kuyeeya kujatikizya makani ngomuyoobala naa kuyiisya mbwaakonzya kubagwasya bamwi. Amulange-lange nzila mbomukonzya kwaakanana makani aayo kutegwa baswiilizi banu babone mbobakonzya kugwasyigwa amakani aayo.
Amukanane kuzwa ansi aamoyo. Amukanane cabusungu. Amutambaike munzila yeelede alimwi akucinca-cinca abusyu ikutondezya mbomulimvwa.

Amubikkile maano kutegwa mutabanyonganyi baswiilizi banu kwiinda mukutambaika munzila yomwe cakuti kaile kuba kalengwa buya. Amutambaike munzila iigwasya baswiilizi kubona kaambo. Amukanane cabusungu kwaambisya ciindi nomuyanda kwaamba twaambo tupati-pati alimwi akukulwaizya baswiilizi banu kubweza ntaamu. Mutabapi kusululwa baswiilizi banu kwiinda mukuciindizya kukanana cabusungu mumakani aanu oonse.