Twakasala Kuubya-ubya Buumi Bwesu

Ba Madián alimwi aba Marcela bakali kukkala kabotu ku Medellín, Colombia. Ba Madián bakali kubeleka mulimo uuvwolwa mali manji alimwi bakali kukkala muŋanda mbotu kapati. Pele kuli cintu cimwi icakabacitikila calo icakabapa kuyeeyesya zintu nzyobakeelede kubikka mubusena bwakusaanguna mbwaanga mbabelesi ba Jehova Leza. Banabukwetene aaba bakaamba kuti, “mu 2006 twakajanika kumuswaangano waalubazu wabuzuba bomwe iwakajisi mutwe wakuti ‘Amuzumanane Kuba Aliso Lyabuuya.’ Makani manji aakali kupegwa akatukulwaizya kuubya-ubya buumi bwesu kutegwa tumubelekele Leza kusikila mpotugolela. Notwakaunka kuŋanda, twakabona kuti twakali kucita ciimpene anzyotwakaiya. Akaambo kalunkuumbwa twakali kuula cuule-ule zintu, aboobo twakajisi zikwelete zinji.”

Makani aakapegwa kumuswaangano akapa kuti banabukwetene aaba baubye-ubye buumi bwabo. Bakaamba kuti, “twakacesya zintu nzyotwakali kuula. Kunze lyaboobo, twakalongela mukaanda kasyoonto, twakasambala moota wesu mpoonya akuula honda.” Kuyungizya waawo, bakacileka kuunka kumantoolo mapati kutegwa batayungwi kuula zintu zitayandiki. Aboobo bakatalika kubelesya ciindi cinji kukambaukila basimukobonyina makani aamu Bbaibbele. Alimwi bakatalika kumvwana abantu ibakali bapainiya baalubazu, balo ibakali kubelesya ciindi cinji kuyiisya bamwi kujatikizya Jehova.a

Tiilyakalampa, ba Madián aba Marcela bakasala kuyungizya mulimo wabo kwiinda mukulongela kubusena bumwi kwakali mbungano iyakabulide. Ikutegwa bacikonzye kulonga, ba Madian bakacileka kubeleka. Bapati-pati bamulimo wabo tiibakacimvwisya cakabapa kuti bacileke kubeleka mulimo mubotu. Aboobo ba Madian bakabandika abalo, akubabuzya kuti: “Mujisi mali manji, pele sena mulikkomene?” Bakazumina kuti tiibakakkomene, nkaambo bakajisi mapenzi manji ngobatakali kukonzya kumana. Mpoonya bakabaambila kuti: “Cintu ciyandika kapati mubuumi taali mali muntu ngajisi pe. Pele nkuzyiba cintu cikonzya kuleta lukkomano. Kuyiisya bantu kujatikizya Leza kupa kuti mebo abakaintu bangu katukkomene, alimwi buya tuyanda kuti tuyungizye ciindi ncotubeleka mumulimo ooyu kutegwa katukkomene kapati.”

Ba Madián aba Marcela balikkomene kapati alimwi akukkutila, nkaambo kubelekela Leza ncecintu ncobabikkila kapati maano mubuumi bwabo. Kwamyaka iili 13, bali kubelekela mumasena aabulide mumbungano zyaku northwest Colombia. Mazuba aano, mbapainiya baalubazu.