Mbomukonzya Kulilekelela

BUYUMUYUMU

Nywebo angomukwetene limwi mwali kukazyanya. Mpoonya mwalyaambauzya akuti: ‘Tandiyandiki buya akulilekelela. Tandili ndime ndatalisya kukazyanya.’

Mwasala kwaaleka buyo makani, pele kunyina luumuno. Mpoonya mwayeeya kuti mweelede kulilekelela, pele camuyumina kuti mwaambe majwi aatakatazyi aakuti, “Amundijatile.”

IKAAMBO NCOCIKATAZYA

Kulisumpula. Mulumi wazina lya Charlesa waamba kuti: “Zimwi ziindi cilandikatazya kwaamba kuti ‘Amundijatile’ akaambo kakulisumpula.” Kulisumpula cakuzwa munzila kulakonzya kupa kuti ufwe nsoni kwaamba buyo kuti ayebo ulilubizyide.

Mbomutulanga twaambo. Mulakonzya kulimvwa kuti inga ceelela kulilekelela lilikke buyo kuti mulilubizyide. Mukaintu wazina lyakuti Jill waamba kuti: “Ikuti naa ndilizyi kuti ndililubizyide cakumaninina, cilanduubila kwaamba kuti ‘amundilekelele.’ Pele kuti toonse tobilo twaamba zintu zitali kabotu, cilandikatazya. Mumoyo inga ndaamba kuti, nkaambo nzi ncondeelede kulilekelela kakuli toonse twalubizya?”

Mulakonzya kulimvwa kuti nywebo tamukwe mulandu ikapati kuti kamulimvwa kuti ngomukwetene limwi ngowakapa kuti zintu zibe boobo. Mulumi wazina lyakuti Joseph waamba kuti: “Ikuti cakusinizya kamusyoma kuti kunyina ncomwalubizya, kutalilekelela iba nzila yakutondezya kuti tamukwe mulandu.”

Mbomwakakomezyegwa. Ambweni mwakakomezyegwa mubusena mobatavwuli kulilekelela. Ikuti kacili boobo, nkokuti tiimwakaiya kuzumina kulubizya kwanu. Mbokunga tiimwakali kucita oobo nomwakacili bana, kulilekelela kuzwa ansi aamoyo nomwakomena tacili ncecintu ncomuvwula kucita.

NCOMUKONZYA KUCITA

Amumubikkile maano ngomukwetene limwi. Amusole kuyeeya ciindi muntu umwi naakalilekelela kulindinywe alimwi ambomwakalimvwa kabotu. Sena tamukonzyi kupa kuti ngomukwetene limwi alimvwe boobo? Noliba leelyo nomulimvwa kuti tamuli ndinywe mwalubizya, mulakonzya kulilekelela akaambo kakubijilwa kwayooyo ngomukwetene limwi naa akaambo kazintu zitali kabotu nzyomwacita. Kucita boobo kulakonzya kupa kuti ngomukwetene limwi aleke kubijilwa.—Njiisyo yamu Bbaibbele: Luka 6:31.

Amubikkile maano kucikwati canu. Mutanooboni kulilekelela mbuli kuti nkuzundwa, pele kamukubona kuti kupa cikwati canu kuzwidilila. Kweelana alugwalo lwa Tusimpi 18:19, muntu uuzumanana kubijilwa “ulaamoyo muyumu kwiinda munzi uukwabilidwe.” Kuba muciimo eeci kupa kuti cikatazye naa kuti citakonzyeki kubamba luumuno. Kulubazu lumwi, kulilekelela kupa kuti kubijilwa nkwajisi muntu kutakomeni. Kucita boobo citondezya kuti mubikka cikwati canu mubusena bwakusaanguna.—Njiisyo yamu Bbaibbele: Bafilipi 2:3.

Mutanoomuki kulilekelela. Masimpe kuti cilakatazya kulilekelela ikapati kuti toli nduwe walubizya. Pele kuti ngomukwetene limwi walubizya, tacaambi kuti andinywe mweelede kucita zintu zitali kabotu. Aboobo mutanoomuki kulilekelela, kumwi kamuyeeya kuti kwainda ciindi zintu zilaba buyo kabotu. Kuti mwalilekelela, cilakonzya kupa kuti ngomukwetene limwi awalo kacimuubila-ubila kulilekelela. Alimwi andinywe kuti mwazumanana kulilekelela nkokuti cinoomuubila-ubila kucita boobo lyoonse.—Njiisyo yamu Bbaibbele: Matayo 5:25.

Amutondezye kuti mwalilekelela ncobeni. Kujana cilitamizyo kujatikizya ncomwacita kuliindene akulilekelela. Alimwi kwaamba majwi aatazwi ansi aamoyo mbuli aakuti “mundijatile, tiindalizyi kuti mujisi moyo muniini” takuli kulilekelela pe! Amuzumine kuti mwalubizya alimwi ambocamucisa ngomukwetene limwi nokuba kuti mwabona kuti weelede kulimvwa boobo naa pe.

Mutatuyumbili ambali twaambo twamasimpe. Amuzumine kuti mulakonzya kulubizya. Alimwi buya toonse tulalubizya. Nokuba kuti inga mwaamba kuti tamuli ndinywe mwalubizya, amuzyibe kuti nzyomukonzya kwaamba kujatikizya icacitika taali makani alikke aajatikizyidwe. Bbaibbele lyaamba kuti: “Uusaanguna kwaamba kaambo kakwe ulibonya kuti uliluleme, kusikila mane mweenzinyina waboola akumubuzyisisya.” (Tusimpi 18:17) Cilakonzya kumuubila kulilekelela kuti kamuzyi kuti andinywe mulakonzya kulubizya.