NCOMUKONZYA KUCITA ZINTU NOZYADULA

Amukkutile Azintu Nzyomujisi

Bantu ibakkutila azintu nzyobajisi inga balikkomene mubuumi. Kuti bukkale bwacinca abalo balacinca, calo cipa kuti kabatabelesyi mali manji.

IKAAMBO NCOCIYANDIKA

Syaazibwene mukuyeeya kwabantu, Jessica Koehler wakaamba kuti bantu bakkutila inga bazilanga kabotu zintu. Kunze lyaboobo, bantu bali boobu tabanyonokeli zintu nzyobajisi bamwi. Aboobo tacigambyi kuti bantu bakkutila azintu nzyobajisi, inga balikkomene alimwi tabalibiliki kapati. Amana buya, bantu bakkomene kapati inga tabajisi azintu zinji mubuumi. Bantu bali boobu, babikkila maano kuzintu ziyandika kapati mubuumi, mbuli lukkomano luboola akaambo kakujana ciindi cakuba abanamukwasyi alimwi abalongwe.

“Twanoojisi cakulya azisani tunookkutila azintu eezyi.”—1 Timoteyo 6:8.

NCOMUKONZYA KUCITA

Mutanikulyeezyanisyi Abamwi. Ikuti kamulyeezyanisya amuntu muvwubi, eeci cilakonzya kumupa kutakkutila azintu nzyomujisi alimwi akuba amunyono buya. Kayi bakati “Coolwe camweenzinyoko tacoonenwi anze.” Cili boobu, akaambo kakuti bantu bamwi ibavwubide ambweni bakanjila muzikwelete buya. Oobu mbwaakaamba mukaintu wazina lya Nicole, uukkala ku Senegal. Wakati: “Tandiyandiki kuba azintu zinji buya kutegwa ndikkomane. Kuti kandikkutilide azintu nzyondijisi, ndilakonzya kukkomana nokuba kuti bamwi bajisi zintu zinji kwiinda nzyondijisi.”

Amusole nzila eeyi: Mutabikkili maano kuzyaakwaambilizya zijatikizya makwebo naa kulanga aintaneti kutegwa mubone mali ngobajisi bantu alimwi azintu zidula nzyobajisi.

“Nokuba kuti muntu kajisi zintu zinji buti, ibuumi bwakwe tabuzwi kuzintu eezyo nzyajisi.”—Luka 12:15.

Kamulumba. Bantu balumba balakkutila alimwi tabalombozyi kuba azintu zinji kwiinda zeezyo nzyobajisi kale. Ba Roberton, baku Haiti, bakaamba kuti: “Ndilajana ciindi cakuyeeya zintu zibotu bantu nzyobakandicitila mebo alimwi amukwasyi wangu. Mpoonya ndilabaambila kuti, tulabalumba kapati akaambo kazintu eezyo nzyobakatucitila. Kuyungizya waawo, ndilamuyiisya mwanaangu musankwa uujisi myaka iili 8 kuti weelede kulumba kucintu cili coonse ncaatambula.”

Amusole nzila eeyi: Abuzuba amulembe cintu cimwi ncomulumba. Mulakonzya kulumba kujatikizya buumi bubotu mbomupona, mukwasyi uukamantene, balongwe beni-beni naa kweebeka kwazuba ciindi nolibbila.

“Ooyo uulaamoyo uukkomene ulaapobwe ciindi coonse.”—Tusimpi 15:15.

Zimwi ziindi, toonse cilakonzya kutuyumina ikukkutila azintu nzyotujisi. Pele kuti twasolekesya tulakonzya kujana mpindu. Ciindi notukkutila akazintu nzyotujisi, tulakkomano, calo citakonzyi kuulwa amali.