“Ndakali Kulangilila Zilenge Eezyo Zyuumi”

Ezekieli cakutadooneka wakali kuzibona zibumbwa zipati zyabapoho abasyuumbwa izijisi mababa alimwi amitwe yabantu izyakabikkidwe ikupa lukwabililo kumbele lyamaanda aabami alimwi amatempele. Zibumbwa eezyo zyakali kujanika mumasena oonse aamu Asuri alimwi a Babuloni yansiku. Mbubwenya mbuli basikulangilila boonse, Ezekieli weelede kuti wakali kuzilanga cakugambwa zibumbwa zyazilenge eezyi zipati alimwi ziyoosya, zimwi zyakali kulampa mamita aasika ku 6. Pele, nokuba kuti zintu eezyi zyakali kulibonya kuba anguzu kapati, zyakali buyo zintu zitaponi izibezedwe kuzwa kumabwe.

Mukwiimpana, zilenge zyone Ezekieli nzyaakabona mucilengaano zyakali “zilenge zyuumi.” Eelo kaka nkwiindana kupati ooko! Ikubona zilenge eezyi kwakamujatikizya kapati Ezekieli cakuti mabala aakuti ‘zilenge zyuumi’ wakaayinduluka ziindi zili 11 mumajwi aantalisyo aabusinsimi bwakwe. (Ezk. 1:5-22) Cilengaano cazilenge zyuumi zyone izyeenda kugama kuntu komwe aciindi comwe kunsi aacuuno cabwami ca Leza ceelede kuti cakamunjila kapati mumoyo Ezekieli kuti Jehova ulijisi nguzu zyakweendelezya zilenge zyoonse cakumaninina. Mazuba aano, cilengaano ncimunya cilatugwasya kapati kubona bupati anguzu zya Jehova alimwi abupati bwabweendelezi bwakwe.—1Mak. 29:11.